Muŵe Ŵakucenjera Para Muli mu Uteŵeti
1. Cifukwa wuli tikwenera kuŵa ŵakucenjera para tili mu uteŵeti?
1 “Nga ni mberere pakati pa mphumphi,” ŵateŵeti ŵa Ciuta ŵakupharazga ‘pakati pa muwiro wakubendera na wakunyongoloka.’ (Mat. 10:16; Fil. 2:15) Vivulupi, nkhaza, na kwiba ŵanthu vili palipose. Uwu mbukaboni wakuti ŵanthu ŵaheni ŵalutilira “kuhenipa.” (2 Tim. 3:13) Ni fundo wuli za mu Malemba izo zingatovwira kuti ‘tiŵe ŵakucenjera’ para tili mu uteŵeti?—Mat. 10:16.
2. Mphawuli apo cingaŵa ciwemi kufumamo mu cigaŵa ico tikupharazgako?
2 Ghanaghanani Makora: Lemba la Zintharika 22:3 likuti munthu wavinjeru ‘wakubisama’ para wawona ulwani. Tikwenera kuŵa maso! Vinthu vingaŵa makora waka mu cigaŵa, kweni vingasintha mwamabuci. Tingawona gulu la ŵanthu panji ŵapolisi ŵakwendendeka mu msewu. Panji munthu munyake wangaticenjezga. M’malo mwa kuŵa na mtima wakuti nkhawone ivyo vikucitika, nchamahara kufumamo mwaluŵiro mu cigaŵa na kukapharazga kunyake.—Zinth. 17:14; Yoh. 8:59; 1 Tes. 4:11.
3. Kasi fundo iyo yili pa Mupharazgi 4:9, yingatovwira wuli para tili mu uteŵeti?
3 Pharazgani na Ŵanyinu: Pa Mupharazgi 4:9 pakuti: “Kuŵa ŵaŵiri nkhuwemi kwakuluska yumoza.” Panji muli kuzgoŵera kuluta mwekha mu upharazgi. Kweni sono ke, pakuti vinthu vyasintha? Ku vigaŵa vinyake palije suzgo para munthu wakupharazga yekha. Kweni ku malo ghanyake cingaŵa cambura mahara kuti mudumbu panji muwukirano wapharazgenge yekha, comenecomene para dazi lanjira. Cifukwa ca ivyo vyacitikapo kumanyuma uku, nchakuzirwa comene kuŵa na munyithu. (Muph. 4:10, 12) Usange mwanjira mwaŵanandi mu cigaŵa, mukwenera kuwoneseska kuti ŵanyinu mbakuvikilirika. Kweniso para mukukhumba kufumamo mu cigaŵa, mukwenera kumanyiska ŵanyinu.
4. Kasi tingacita wuli kuti tose tiŵe ŵakuvikilirika mu mpingo?
4 Pakuti ŵalara ndiwo ‘ŵakulinda mizimu yithu,’ ŵakwenera kupeleka ulongozgi kuyana na umo vinthu viliri mu cigaŵa cawo. (Heb. 13:17) Yehova watitumbikenge nadi para tikujiyuyura na kupulikira ivyo ŵalara ŵakutiphalira. (Mika 6:8; 1 Kor. 10:12) Mphanyi tose tapharazga mwaluso mu cigaŵa cithu. Apo tikucita nthena, tikwenera kucenjera nyengo zose.