Ŵawukirano, Ŵani na Mtima Wakuteŵetera Yehova
VILIMIKA pafupifupi 3,500 ivyo vyajumpha, Mozesi uyo wakaŵa nchimi ya Yehova, wakalangura ŵasofi na ŵanalume ŵalara ŵa Israyeli kuti: “Wunjikani ŵanthu, ŵanalume na ŵanakazi, na ŵana, . . . kuti ŵapulike na kusambira kuwopa Yehova Ciuta winu, na kupwelera kucita mazgu ghose gha dango ili.” (Dute. 31:12) Wonani kuti awo ŵakaphalirika kuti ŵawungane ŵakaŵa ŵanalume, ŵanakazi, na ŵana. Ŵana nawo ŵakaŵa pakati pa ŵanthu awo ŵakaphalirika kuti ŵapulike, ŵasambire, na kulondezga ulongozgi wa Yehova.
Kasi mazuŵa ghano napo ŵawukirano ŵakupempheka kuti ŵawunganenge mwakuti ŵasope Yehova? Enya! Ntheura, ŵateŵeti wose ŵa Ciuta mbakukondwa kuwona ŵawukirano ŵanandi awo ŵakuteŵetera Ciuta ŵakupulikira ulongozgi wa Paulosi. Iyo wakati: “Tiyeni tighanaghanirane yumoza na munyake na kuciskirana ku citemwa na milimo yiwemi, kusulako cara kuwungana kwithu pamoza, umo kaliri kaluso ka ŵanji, kweni tikhwimiskanenge yumoza na munyake, ndipo comenecomene apo tikuwona zuŵa likuneng’enera.” (Heb. 10:24, 25) Kweniso, ŵana ŵanandi ŵakupharazga makani ghawemi gha Ufumu wa Ciuta lumoza na ŵapapi ŵawo. (Mat. 24:14) Cilimika cilicose ŵawukirano ŵanandi ŵakubapatizika, kulongora kuti ŵakutemwa Yehova kufumira pasi pa mtima, ndipo ŵakutumbikika cifukwa ca kuŵa ŵasambiri ŵa Khristu.—Mat. 16:24; Mrk. 10:29, 30.
Pa Mupharazgi 12:1 pakuti: “Kumbuka Mlengi wako mu mazuŵa gha uphya wako.” Kasi ŵawukirano mukukhumba kufika pa msinkhu wuli kuti mupulikire nchemo ya kusopa na kuteŵetera Yehova? Malemba ghakuyowoya yayi msinkhu uwo muwukirano wangacitira nthena. Ntheura, lekani kughanaghana kuti mucali ŵanici comene mwakuti mungafiska yayi kumupulikira Yehova na kumuteŵetera. Msinkhu ulije kanthu, nchakuzirwa nchakuti mupulikire nchemo iyi mwaluŵiro.
Mwaŵanandi mukusambizgika na mupapi yumoza panji wose ŵaŵiri kuti mukure mwauzimu. Para ndimo viliri, mukuyana waka na Timote uyo wakuzunulika mu Baibolo. Kufuma waka pa ubonda, anyina a Yunike, na abuya ŵake a Loyisi ŵakamusambizganga malemba ghatuŵa. (2 Tim. 3:14, 15) Ndimo ŵapapi ŵinu ŵakwenera kuti ŵakucitira. Ŵakusambira namwe Baibolo, kulomba namwe lumoza, kuluta namwe ku maungano gha mpingo na ghakurughakuru, ndiposo mu uteŵeti wa m’munda. Mulimo wakumusambizgani nthowa za Yehova uwo ŵapapi ŵinu ŵali kupika, ngwakuzirwa comene. Kasi mukuwonga kuti ŵakumutemwani na kumughanaghanirani?—Zinth. 23:22.
Ndipouli, apo imwe ŵawukirano mukukura, Yehova wakukhumba kuti “mupime kwa mwaŵene ico nchiwemi na cakuzomerezgeka na khumbo lakufikapo la Ciuta,” nga umo Timote wakacitira. (Rom. 12:2) Usange mungacita nthena, mbwenu mucitenge milimo ya mpingo, cifukwa ca ŵapapi ŵinu yayi, kweni cifukwa cakuti mukukhumba kucita khumbo la Ciuta. Yehova wakukondwa usange mukumuteŵetera na mtima wose.—Sal. 110:3.