Yezgani Zinchimi—Amosi
1. Kasi tingakhozgeka wuli na ivyo vikacitikira Amosi?
1 Kasi nyengo zinyake mukujiwona kuti ndimwe ŵambura kwenelera kupharazga cifukwa cakuti muli ŵakavu panji mundasambire comene? Usange ni nthena, mungakhozgeka na ivyo vikacitira Amosi. Iyo wakaŵa muliska wa ng’ombe panji mberere. Kweniso wakatonthoranga vikuyu. Ndipouli, Yehova wakamutuma kuti wakapharazge uthenga wakuzirwa. (Am. 1:1; 7:14, 15) Mazuŵa ghano napo, Yehova wakusora ŵanthu ŵakuzika na ŵakujiyuyura kuti ŵapharazge uthenga wake. (1 Kor. 1:27-29) Ni vinthu wuli vinyake ivyo tingasambirako kwa nchimi Amosi apo tikucita uteŵeti withu?
2. Cifukwa wuli tikucita wofi yayi para ŵakutisuska mu uteŵeti?
2 Lutilirani Kuŵa Ŵakukhora Para Ŵakumususkani: Amaziya wakaŵa musofi uyo wakasopanga tholi mu ufumu wa kumpoto wa mafuko 10 wa Israyeli. Ivyo wakayowoya wati wapulika ucimi wa Amosi, wakaŵa nga ni para wakumuphalira kuti: ‘Lutanga kwako! Utileke! Tili kale na cisopa cithu!’ (Am. 7:12, 13) Amaziya wakabendezga ivyo Amosi wakayowoya mwakuti themba Yeroboamu lilekeske mulimo wake. (Am. 7:7-11) Amosi wakacita wofi yayi. Mazuŵa ghano napo, ŵavisopa ŵakuphalira ŵandyali kuti ŵatambuzgenge ŵanthu ŵa Yehova. Ndipouli, Yehova wakutisimikizgira kuti palije homwa ilo lafulikira ise lisakatenge.—Yes. 54:17.
3. Kasi ni vigaŵa viŵiri vini vya uthenga uwo tikupharazga mazuŵa ghano?
3 Pharazgani Ceruzgo ca Ciuta na Vitumbiko vya Munthazi: Nangauli Amosi wakacima vinthu viheni ivyo vicitikirenge ufumu wa mafuko 10 wa Israyeli, kweni kuumaliro wa buku lake wakayowoya vitumbiko ivyo Yehova wakaŵalayizga. (Am. 9:13-15) Nase tikuyowoya za “zuŵa la ceruzgo” ilo tikulindilira. Kweni ici nchigaŵa cicoko waka ca “makani ghawemi gha ufumu” agho tikwenera kupharazga. (2 Pet. 3:7; Mat. 24:14) Para Yehova waparanya ŵaheni pa nkhondo ya Haramagedoni, caru capasi cizamuŵa paradiso.—Sal. 37:34.
4. Cifukwa wuli tili na cigomezgo kuti tifiskenge khumbo la Yehova?
4 Para ŵanthu ŵanandi ŵakususka makani gha Ufumu agho tikupharazga, ŵakutiyezga usange tikaneneskanga apo tikalayizganga Yehova kuti ticitenge khumbo lake. (Yoh. 15:19) Ndipouli, tili na cigomezgo kuti Yehova walutilirenge kutovwira kuti tifiske khumbo lake nga umo wakacitira Amosi.—2 Kor. 3:5.