Sambizgani Makora Ŵanthu Baibolo
1. Kasi tili na mulimo wuli para tikuchitiska sambiro la Baibolo?
1 Palije uyo wangateŵetera Chiuta kwambura kuti Yehova ‘wamuguza.’ (Yoh. 6:44) Ndipouli, tili na mulimo wakovwira ŵanthu kuti ŵaŵe paubwezi na Yehova. (Yak. 4:8) Kweni tikwenera kunozgekera. Kuŵazga waka ndime na kufumba fumbo kungamovwira yayi uyo tikusambira nayo kupulikiska ivyo wakusambira kweniso kukura mwauzimu.
2. Kasi tikwenera kuŵawovwira ŵanthu kuti ŵachite vichi?
2 Kuti tisambizge makora ŵanthu, tikwenera kuŵawovwira (1) kupulikiska ivyo Baibolo likusambizga, (2) kuvigomezga na (3) kuchita ivyo ŵasambira. (Yoh. 3:16; 17:3; Yak. 2:26) Nangauli pangatora nyengo kuti munthu wachite vinthu ivi, kweni vingamovwira kuti waŵe paubwezi na Yehova na kujipeleka kwa iyo.
3. Chifukwa wuli ŵasambizgi ŵawemi ŵakufumba mafumbo?
3 Manyani Maghanoghano Ghake: Tikwenera kumupa m’pata uyo tikusambira nayo kuti wayowoyepo mwakuti timanye usange wakupulikiska na kugomezga ivyo wakusambira. (Yak. 1:19) Kasi wakupulikiska ivyo Baibolo likuyowoya pa nkhani iyi? Kasi wangayilongosora mu mazgu ghake na ghake? Kasi wakuchita wuli na ivyo wasambira? Kasi wakugomezga kuti ivyo Baibolo likusambizga ni vyaunenesko? (1 Tes. 2:13) Kasi wakumanya kuti wakwenera kusintha vinthu vinyake kuti wakolerane na ivyo wakusambira? (Kol. 3:10) Tileke kumuphalira mazgoro gha mafumbo agha. M’malo mwake, timufumbe kuti timanye maghanoghano ghake, na kutegherezga para wakuzgora.—Mat. 16:13-16.
4. Kasi tikwenera kuchita wuli para uyo tikusambira nayo wakutondeka kupulikiska panji kulondezga ivyo Baibolo likusambizga?
4 Pakutora nyengo kuti munthu wasinthe nkharo kweniso maghanoghano ghake. (2 Kor. 10:5) Wuli usange uyo tikusambira nayo wakugomezga yayi nesi kuchita ivyo wakusambira? Tingagongowanga yayi, chifukwa pangatora nyengo kuti Mazgu gha Chiuta na mzimu utuŵa vigwire ntchito mu mtima wake. (1 Kor. 3:6, 7; Heb. 4:12) Para tawona kuti wakutondeka kupulikiska panji kulondezga ivyo Baibolo likusambizga, ntchiwemi kwamba nkhani yinyake. Wangasintha para wakuwona kuti tikusambira nayo mwakuzikira kweniso mwachitemwa.