Maliferensi gha Uteŵeti na Umoyo Wachikhristu—Kabuku ka Maungano
JANYUWALE 7-13
MAZGU GHA CHIUTA MBUSAMBAZI | MILIMO 21-22
Ivyo Tasambira
nwtsty mazgu ghakulongosora vesi Mil 22:16
suka zakwananga zako pakuchema pa zina lake: Panji kuti “suka zakwananga zako na kuchema pa zina lake.” Zakwananga zikusukika para munthu wabizgika waka mu maji yayi, kweni zikusukika para wakuchema pa zina la Yesu. Tikuchema pa zina la Yesu para tili na chipulikano mwa iyo kweniso para tikulongora milimo ya chipulikano.—Mil 10:43; Yak 2: 14, 18.
JANYUWALE 14-20
MAZGU GHA CHIUTA MBUSAMBAZI | MILIMO 23-24
Ivyo Tasambira
nwtsty mazgu ghakulongosora vesi Mil 23:6
Ndine Mufarisi: Ŵanji awo ŵakategherezganga ŵakamumanyanga Paulosi. (Mil 22:5) Ntheura apo Paulosi wakati ndine mwana wa Ŵafarisi, ŵakwenera kuti ŵakamanya kuti Paulosi nayo wali na wanangwa wakuyana na wawo. Ŵakawona kuti Paulosi wakayowoyanga unenesko chifukwa Ŵafarisi ŵa mu Khoti Likuru la Ŵayuda ŵakamanya kuti wakazgoka Mkhristu wamwamphu. Kweni mu nkhani iyi, mazgu ghakuti ndine Mufarisi agho Paulosi wakayowoya wakakhumbanga kuti wajiyaniske na Ŵafarisi m’malo mwa Ŵasaduki chifukwa ivyo iyo wakagomezganga pa nkhani ya chiwuka vikayananga na Ŵafarisi. Ntheura apa, Paulosi wakambiska nkhani iyo Ŵafarisi wose awo ŵakaŵapo ŵangakolerana nayo. Panyake Paulosi wakamanya kuti para wangambiska nkhani yakusuzga iyi, ŵanthu ŵanyake ŵa mu khoti ili ŵakoleranenge nayo, ndipo ivi ndivyo vikachitika nadi. (Mil 23:7-9) Mazgu agho Paulosi wakayowoya pa Mil 23:6 ghakuyanako waka na agho wakayowoya panyengo iyo wakakhumbanga kujivikilira panthazi pa Themba Agripa. (Mil 26:5) Panyengo iyo Paulosi wakaŵa ku Romu, wakalemberaso Ŵakhristu ŵanyake ku Filipu kuti iyo wakaŵa Mufarisi. (Fil 3:5) Kweniso lemba la Mil 15:5 likuyowoya umo Ŵakhristu ŵanyake awo pakwamba ŵakaŵa Ŵafarisi ŵakachitira.—Wonani mazgu ghakulongosora vesi Mil 15:5.
nwtsty mazgu ghakulongosora vesi Mil 24:24
Durusila: Durusila wakaŵa mwana msungwana wa Herode. Wakaŵa mwana wachitatu ndipo ndiyo wakaŵa muchoko chomene. Herode uyo wakuzunulika pa Mil 12:1, ni Herode Agripa I. Durusila wakababika cha m’ma 38 C.E ndipo wakaŵa mudumbu wa Agripa II na Berenike. (Wonani mazgu ghakulongosora vesi Mil 25:13 na Mang’anamuro gha Mazgu gha mu Baibolo, “Herode.”) Kazembe Felike ndiyo wakaŵa mfumu wachiŵiri wa Durusila. Pakwamba Durusila wakatengwa kwa Themba Azizus la ku Emesa ku Siriya kweni wakamazga nthengwa na kutengwa kwa Felike cha m’ma 54 C.E., panji apo wakaŵa na vyaka vya m’ma 16. Durusila wakwenera kuti wakaŵapo apo Paulosi wakayowoyanga na Felike “vya urunji, kujikora, na cheruzgo icho chikwiza.” (Mil 24:25) Panyengo iyo Felike wakapeleka udindo wake kwa Fesito, wakamuleka Paulosi mu jele chifukwa “wakakhumbanga kutemweka na Ŵayuda,” ndipo ŵanthu ŵanyake ŵakughanaghana kuti wakachita nthena kuti wakondweske muwoli wake wachisungwana uyo wakaŵa Muyuda.—Mil 24:27.
JANYUWALE 21-27
MAZGU GHA CHIUTA MBUSAMBAZI | MILIMO 25-26
Ivyo Tasambira
nwtsty mazgu ghakulongosora vesi Mil 26:14
kupafura kakhuni kakuthwa panji kuti nkhanjo: Nkhanjo nkhakhuni kakusongoka kunthazi ako ŵakujokera ng’ombe. (Ŵer 3:31) Mazgu agho ghali kung’anamulika kuti “kupafura kakhuni kakuthwa” ni ntharika iyo yikusangika mu mabuku Ghachigiriki. Ntharika iyi yikuyowoya za ng’ombe yamtafu iyo yikubafura nkhanjo para mulimi wakuyijokora. Para yabafura kakhuni aka yikujipweteka yekha. Saulosi wakachitanga mwakuyana waka pambere wandaŵe Mkhristu. Paulosi wakajipwetekanga yekha apo wakalimbananga na ŵalondezgi ŵa Yesu awo Yehova Chiuta wakaŵawovwiranga. (Yaniskani na Mil 5:38, 39; 1Ti 1:13, 14.) Kweni pa Mu 12:11, “nkhanjo” yikuyaniskika na mazgu gha munthu wavinjeru agho ghakuchiska munthu kuti walondezge ulongozgi.
JANYUWALE 28–FEBULUWALE 3
MAZGU GHA CHIUTA MBUSAMBAZI | MILIMO 27-28
Ivyo Tasambira
nwtsty mazgu ghakulongosora vesi Mil 27:9
kuziŵizga kurya kwa Zuŵa la Mphepiska: Panji kuti ‘kuziŵizga kurya uko kukachitikanga mu nyengo ya chihanya.’ Lizgu Lachigiriki ilo lili kung’anamulika kuti “ kuziŵizga,” likuyowoya za kuziŵizga kwekha uko Dango la Mozesi likayowoya kuti ŵanthu ŵachitenge ndipo kukakoleranangako na Zuŵa la Mphepiska ilo likachitikanga kamoza pa chaka. Zuŵa ili likamanyikwangaso kuti Yom Kippur (Chihebere, yohm hak·kip·pu·rimʹ, “zuŵa lakubenekelelera”). (Le 16:29-31; 23:26-32; Maŵ 29:7; wonani Mang’anamuro gha Mazgu gha mu Baibolo, “Zuŵa la Mphepiska.”) Lizgu lakuti “kujisuzga,” likuyowoya za ivyo vikachitikanga pa “Zuŵa la Mphepiska,” ilo kanandi likuyowoya vya kujipata mu nthowa zakupambanapambana, nga nkhuziŵizga kurya. (Le 16:29, mazgu ghamusi.) Lizgu lakuti “kuziŵizga” ilo likusangika pa Mil 27:9 likuyowoya chomene vya kujipata uko kukachitikanga pa Zuŵa la Mphepiska, nga nkhuziŵizga kurya. Zuŵa la Mphepiska likachitikanga kuumaliro wa mwezi wa Seputembala panji kukwambilira kwa Okutobala.
nwtsty mazgu ghakulongosora vesi Mil 28:11
Ŵana ŵa Zeusi: Ŵagiriki na Ŵaroma ŵakagomezganga kuti chiuta Zeusi (Jupiter) na muwoli wake Leda ŵakaŵa na ŵanyamata ŵamleza, Castor na Pollux. Ŵakagomezganga kuti “Ŵana ŵa Zeusi” (Greek, Di·oʹskou·roi) aŵa, ŵakavikiliranga ŵanthu awo ŵakendanga maulendo ghapanyanja. Nkhani yakukhwaskana na chimanyikwiro cha ŵana ŵa Zeusi icho chikaŵa pa ngalaŵa, mbukaboni wakulongora kuti uyo wakalemba nkhani iyi wakawona na maso.