Maliferensi gha Uteŵeti na Umoyo Wachikhristu—Kabuku ka Maungano

OKUTOBALA 14-20

Ivyo Tasambira

it-2-E 565 ¶3

Mulaŵiliri

Mulaŵiliri Mulara. Mazgu gha pa lemba la 1 Petrosi 2:25 ghakwenera kuti ghali kufuma pa lemba la Yesaya 53:6, ndipo ghakayowoyanga za ŵanthu awo ŵakaŵa “nga ni mberere zakupuluka.” Ndipo pamanyuma Petrosi wakati: “Kweni sono mwawelera kwa muliska na mulaŵiliri wa umoyo winu.” Lemba ili likwenera kuti likuyowoya za Yehova Chiuta, chifukwa awo Petrosi wakaŵalemberanga ŵakaŵa kuti ŵandapatukeko kwa Yesu. M’malo mwake ŵanthu aŵa kwizira mwa Yesu ŵakaŵa kuti ŵawelera kwa Yehova Chiuta, uyo ni Muliska Mulara wa ŵanthu ŵake. (Sa 23:1; 80:1; Yer 23:3; Eze 34:12) Kweniso Yehova ni mulaŵiliri uyo wakuskora panji kuti kwendera ŵanthu. (Sa 17:3) Para wakwendera (Gr., e·pi·sko·peʹ) nyengo zinyake wangapelekaso uthenga wa cheruzgo, nga umo vikaŵira mu Yerusalemu mu nyengo ya Ŵakhristu ŵakwambilira. Pa nyengo iyi Yerusalemu wakamanya yayi “nyengo ya kweruzgika [Gr., e·pi·sko·pesʹ]” kwake. (Lu 19:44) Kweni nyengo zinyake ‘mu zuŵa lake ilo wakwendera,’ [Gr., e·pi·sko·pesʹ] yikuŵa nyengo yakukondweska ku ŵanthu awo ŵakuchindika Chiuta.”—1Pe 2:12.