Kasi Mukusanga Chandulo Chifukwa cha Kusanda Malemba Zuŵa na Zuŵa?

Kasi zuŵa lililose mukuchita lemba la zuŵa? Usange mukuchita yayi, mungachita makora kwambapo. Ŵanthu ŵanandi ŵakutemwa kuchita lemba la zuŵa ku mulenji, mwakuti ŵaghanaghanirengepo fundo izo ŵasambira para ŵakuchita milimo yawo ya zuŵa na zuŵa. (Jos 1:8; Sa 119:97) Kasi mungachita wuli kuti musangenge chandulo chikuru na lemba la zuŵa? Ŵerengani vesi lose mu Baibolo kuti muwone makora fundo yake. Yezgani kughanaghanira nkhani ya mu Baibolo iyo yikukolerana na lemba la zuŵa ilo. Kufuma apo, wonani umo mungalondezgera fundo iyo pa umoyo winu. Vinthu vimwenderaninge makora usange pakusankha vyakuchita mukulondezga Mazgu gha Chiuta.—Sa 119:105.

Pa Beteli yiliyose pa charu chapasi, ŵakuchita lemba la zuŵa pa nyengo ya chakurya cha mulenji. Ndipo ivyo ŵadumbiskana, kanandi ŵakuviŵika pa JW Broadcasting^® pa chigaŵa cha mavidiyo MAPULOGIRAMU NA VYAKUCHITIKA VINYAKE. Kasi mphawuli apo mukawonelerako mapulogiramu agha? Panji zinyake mwa fundo izo zili mu mavidiyo agha, zingamovwirani chomene. Mwachiyelezgero, kasi nkhani ya Loti yikumovwirani wuli para mukukhumba kusankha vinthu?

WONELERANI VIDIYO YA MUTU WAKUTI MUNGATEMWANGA CHARU YAYI (1YOH 2:15), NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi ni fundo wuli ya mu Baibolo iyo pakajintha chidumbirano cha lemba la zuŵa ili?

• Mwakuyana na nkhani ya Loti, kasi pali uheni wuli usange munthu wakutemwa charu na vinthu ivyo vili mu charu?—Ge 13:12; 14:12; 19:3, 12, 13, 24-26

• Kasi tikulongora wuli kuti tikutemwa Chiuta m’malo mwa charu panji vinthu ivyo vili mu charu?