IVYO ŴACHINYAMATA ŴAKUFUMBA

Kasi Baibolo Linganovwira Wuli?—Chigaŵa 3: Ivyo Ungachita Kuti Upindurenge Para Ukuŵerenga Baibolo

Para ungajura waka Baibolo, uwonenge kuti muli malemba ghanandinandi. Kweni ivi vileke kukugongoweska kuŵerenga Baibolo. M’malo mwake, ukwenera kuwona Baibolo nga ntchakurya chakupambanapambana icho chaŵikika pathebulu. Ungarya yayi chakurya chose icho wachiwona. Kweni unenesko ngwakuti ungasankhapo waka chekha icho chingakukwana kuti urye na kukhuta.

Kuti nawe upindurenge na kuŵerenga Baibolo, ukwenera kuŵika mahara ku ivyo ukuŵerenga. Nkhani iyi yikovwirenge kuchita nthena.

Mu nkhani iyi

Chifukwa wuli ukwenera kuŵikako mahara ku ivyo ukuŵerenga mu Baibolo?

Para ukufwilirapo kuŵerenga Baibolo, ndipo ungapinduraso chomene. Ghanaghanira chiyelezgero ichi: Para ungazuŵika kathumba ka masamba gha tiyi mu maji ghakotcha kwa nyengo yichoko waka, maji ghangambako waka kusintha mtundu. Kweni para masamba ghakhaliskamo mu maji ghakotcha, ndipo mtundu wa maji ungasintha chomene.

Kapu ya tiyi yagwalika mzere pakati. Chigaŵa chinyake tiyi wake wandabinkhe chomene, masamba gha tiyi ghanguzuwulikamo luŵiro. Kweni chigaŵa chinyake tiyi wake wabinkha chomene chifukwa masamba gha tiyi ghangukhaliskamo.

Vikuyana waka na kuŵerenga Baibolo. M’malo mwa kuŵerenga Baibolo mwakuchimbilira, uŵenge na nyengo ya kughanaghanira ivyo waŵerenga. Ivi ndivyo wakachita uyo wakalemba Salimo 119. Pakuyowoya vya dango la Chiuta iyo wakati: “Ndilo nkhughanaghanirapo zuŵa lose.”—Salimo 119:97.

Ichi chikung’anamura kuti zuŵa lose mbwenu utandalirenge waka kuŵerenga na kughanaghanira ivyo Baibolo likuyowoya yayi. Kweni fundo njakuti: Wamasalimo wakaŵanga na nyengo ya kughanaghanira Mazgu gha Chiuta. Ivi vikamovwiranga kuti wasankhenge vinthu mwamahara.—Salimo 119:98-100.

“Amama ŵakaniphaliranga kuti, ‘Mu sabata yiliyose uli na mazuŵa 7, ndipo mu sabata yose ukuchita vinthu vinandi vya iwe wamwene. Walekerachi kuti nyengo yinyake umupeko Yehova? Ntchiwemi chomene kuchita nthena!’”—Melanie.

Para ukughanaghanira fundo za mu Baibolo, chikuŵa chipusu kusankha vinthu mwamahara; mwachiyelezgero, usange ukusankha ŵabwezi panji usange wayezgeka kuchita chinthu chinyake chiheni.

Kasi ungachita wuli kuti upindurenge mwakukwana para ukuŵerenga Baibolo?

Upange ndondomeko. Julia uyo wali na vyaka 15 wakuti: “Ukwenera kuŵa na ndondomeko yiwemi ya kuŵerenga Baibolo. Umanye ivyo uŵerengenge, nyengo iyo uŵerengerenge, ndiposo apo uŵerengenge.

Msungwana muwukirano wakulemba ndondomeko yake ya kuŵerenga Baibolo pa kalendara.

Usankhe malo ghawemi. Mama munyake muwukirano zina lake Gianna wakayowoya kuti: “Sangani malo ghawemi ghambura chiwawa. Mukweneraso kumanyiska waliyose wa mu mbumba yinu vya ndondomeko yinu ya kuŵazga Baibolo mwakuti ŵaleke kumutimbanizgani.”

Usange ugwiliskirenge ntchito foni, tabuleti panji kompyuta, ukwenera kuyichuna kuti yileke kukutimbanizga. Nyengo zinyake chingaŵa chiwemi kuyezga kugwiliskira ntchito Baibolo lakuchita kupulinta. Nakuti kafukufuku walongora kuti kuŵazga mabuku ghakuchita kupulinta kukovwira kuti munthu wapulikiske makora ivyo wakuŵerenga. Chikuŵa chakusuzga kuti munthu waghanaghanirepo chomene usange wakuŵelengera pa sikirini.

“Nawona kuti wamunthu ukutimbanizgika para ukuŵazgira pa sikirini. Pa foni pakwizanga tumameseji twakuti batire lamara moto panji intaneti yaleka kugwira ntchito. Kweni para ukuŵazga pa buku lakuchita kupulinta, vyanthena ivi pakuŵavya. Ivyo nkhukhumbanga pa nyengo iyi mbungweru wakukwana mbwenu.”—Elena

Ulombenge dankha. Mupempha Yehova kuti wakovwire kupulikiska, kukumbuka, kweniso kuti upindure na ivyo uŵerengenge mu Baibolo.—Yakobe 1:5.

Kuti uchite vinthu kuyana na ivyo walomba, ukwenera kughanaghanirapo chomene pa nkhani iyo waŵerenganga. Kasi ungachita wuli? Usange ukugwiliskira ntchito JW Library panji ukuŵazga Baibolo la pa Intaneti, ungadofya vesi kuti usange mavesi ghanyake ghakuyowoya vya nkhani iyo kweniso nkhani zinyake zakusazgikira.

Ufumbenge mafumbo. Mwachiyelezgero: ‘Kasi nkhani iyi yikunisambizga vichi vya Yehova? Kasi nkhani iyi yikulongosora vya mukhaliro wuli wa Chiuta ndipo ningamuyezga wuli?’ (Ŵaefeso 5:1) ‘Kasi nasambirapo vichi pa nkhani iyi, ndipo ningalondezga wuli pa umoyo wane?’ (Salimo 119:105) ‘Kasi ivyo naŵerenga ningawovwira navyo wuli ŵanji?’—Ŵaroma 1:11.

Kweniso ungajifumba kuti, ‘Kasi ivyo naŵerenga apa vikukolerana wuli na fundo yikuru ya mu Baibolo?’ Fumbo ili ndakuzirwa chomene. Chifukwa wuli? Chifukwa vyose ivyo vili mu Baibolo, kwamba Genizesi m’paka Chivumbuzi; nkhani zake zose zikukolerana pa fundo yikuru yimoza, yakuti: Yehova watuŵiskenge zina lake kwizira mu Ufumu wake wakuchanya na kulongora kuti iyo pera ndiyo ngwakwenelera kulamulira kweniso nthowa zake ni zaurunji.

Ivyo ŵanyinu ŵakuyowoya

“Usange ukutemwa vyakukhwaskana na mbiri, ungaŵazga nkhani zakukhwaskana na nyengo kweniso vinthu vyakale ivyo vikuzunulika mu Baibolo. Para ukutemwa kumanya vyakukhwaskana na mikhaliro ya ŵanthu, mbwenu ungasambira vya munthu nga Davide. Pali vinandi waka ivyo munthu waliyose wangatemwa. Ungasankha wekha ivyo ungakhumba kusambira kuti umanye vinandi.—Judah.

“Para nkhuŵazga nkhani yinyake mu Baibolo, nkhutemwa chomene kuti munthu waliyose uyo wakuzunurika nimumanyenge makora, kwali wakachita viwemi panji viheni ndipo nkhujifumba kuti, ‘Ntchivichi chikamuchitikira munthu uyu? Kasi wakaŵa na nkharo wuli, ndipo ntchivichi chikachitika pamanyuma?’ Paumaliro mbwenu nkhujifumba kuti, Kasi nkhani iyi yinganovwira wuli?’”—Mackenzie.

“Nkhutemwa kuchita kafukufuku nkhani iyo niŵerengenge mu Baibolo. Mwachiyelezgero, mphawuli apo nkhani iyi yikalembekera? Ni njani wakalemba, ndipo chilato chikuru cha buku ili ntchakuti wuli? Nkhani zinandi zikukolerana chomene na ivyo vikuchitika mazuŵa ghano, kweni kupenjerezga fundo zakunyang’amira kukunovwira kuti niwonenge umo ŵanthu ŵakakhwaskikiranga na nkhani izi pa nyengo iyo zikalembekeranga.”—Elle.

“Para nkhuŵerenga Baibolo, nkhujitora nga kuti ivyo naŵerenga namulongosolera munthu munyake. Kasi ningamovwira wuli munthu kuti wapulikiske? Kasi ntchiyelezgero wuli icho ningagwiliskira ntchito kuti wapulikiske fundo yikuru? Usange nkhughanaghanira mazgoro gha mafumbo agha vikunovwira kuti nipulikiskenge makora ivyo nkhuŵerenga. Mbunenesko nadi kuti nthowa yiwemi yakumanyira chinthu chinyake ni para nawe ukusambizgaso ŵanji.”—Owen.