Maliferensi gha Uteŵeti na Umoyo Wachikhristu—Kabuku ka Maungano
FEBULUWALE 3-9
MAZGU GHA CHIUTA MBUSAMBAZI | 12-14
“Phangano Ilo Namwe Likumukhwaskani”
it-1-E 522 ¶4
Phangano
Phangano na Abrahamu. Phangano ilo Chiuta wakachita na Abrahamu likamba kugwira ntchito apo Abramu (Abrahamu) wakambuka Mlonga wa Yufurate pa kuya ku Kenani. Phangano la Dango likapangika pati pajumpha vyaka 430. (Ga 3:17) Yehova wakayowoya na Abrahamu apo wakakhalanga mu Uri, mu charu cha Ŵakalidi, ndipo wakamuphalira kuti walute ku charu icho wamulongorenge. (Mil 7:2, 3; Ge 11:31; 12:1-3) Lemba la Ekisodo 12:40, (LXX) likutiphalira kuti paumaliro wa vyaka 430 ivyo Ŵaisrayeli ŵakakhalira ku Eguputo kweniso ku Kenani, “pa zuŵa lenelili,” ŵakafwatulika ku wuzga ku Eguputo. Ŵaisrayeli ŵakafwatulika ku wuzga pa Nisani 14, 1513 B.C.E., pa zuŵa la Paska. (Ek 12:2, 6, 7) Ichi chikulongora kuti Abrahamu wakambuka Mlonga wa Yufurate pa Nisani 14, 1943 B.C.E. Ndipo pa nyengo iyi ndipo phangano la Abrahamu likwenera kuti likambira kugwira ntchito. Chiuta wakawonekeraso kwa Abrahamu panyengo iyo wakafika mu Kenani kuya ku Shekemu. Ndipo Chiuta wakayowoyaso kuti: “Nizamupeleka charu ichi ku mphapu yako.” Ivyo Chiuta wakayowoya apa vikukolerana na ivyo wakalayizga mu Edeni, ndipo wakavumbura kuti “mphapu” yizamubabika kwizira mu ŵanthu. (Ge 12:4-7) Vinyake vyakukhwaskana na phangano ili ivyo Yehova wakayowoya vikusangika pa Genizesi 13:14-17; 15:18; 17:2-8, 19; 22:15-18.
w89 7/1 3 ¶4
Chifukwa Wuli Mukwenera Kumumanya Makora Abrahamu?
Layizgo ili ndakuzizwiska, ndipo Abrahamu wakalipulika pa vyakuchitika viŵiri. (Genizesi 18:18; 22:18) Kuti wafiske layizgo ili, Yehova wazamuwuska nanga ni ŵanthu awo ŵali kufwa. Uwu ni mwaŵi wapadera chomene ku awo ŵazamuwuskika, chifukwa ŵanandi ŵazamukhala mu charu cha pasi icho chizamuŵa paradiso nga ni munda uwo munthu wakwamba wakataya. Pamanyuma ŵazamusambizgika umo ŵangasangira umoyo wamuyirayira.—Genizesi 2:8, 9, 15-17; 3:17-23.
it-2-E 213 ¶3
Dango
Mwakuyana na ukaboni unyake wakale, ŵakaswiri ŵanyake ŵakugomezga kuti kale para ŵanthu ŵaguliskanenge malo, uyo wagurenge wakaghawonanga dankha malo agha na kuwona ukuru wake. Usange wakugura wayowoya kuti, “Naghawona,” wakalongoranga kuti wazomerezga mwakuyana na dango. Apo Yehova wakaphaliranga Abrahamu kuti wazamumupa charu cha Kenani, wakamuphalira dankha kuti wawone charu chira kufuma mu vigaŵa vyose vinayi. Abrahamu wakayowoya yayi kuti “Naghawona,” panji chifukwa chakuti Yehova wakati wazamupeleka charu ichi ku Mphapu yake. (Ge 13:14, 15) Mozesi, uyo wakimiranga Ŵaisrayeli, wakaphalirika kuti “wachiwone” charu ndipo para “wachiwona” mwakuyana na ndondomeko iyo tayowoya pachanya apa, ndikuti charu chira chikaŵa nga chapelekeka kale ku Ŵaisrayeli mwakuyana na dango ndipo Joshuwa ndiyo wakaŵadangilira pakupoka charu ichi. (De 3:27, 28; 34:4; wonaniso ivyo vikachitika apo Satana wakakhumbanga kupeleka charu kwa Yesu pa Mt 4:8.) Vinyake ivyo vikukoleranako na ndondomeko iyi ni: kunjira na kwendera charu na chilato chakuti ŵachipoke. (Ge 13:17; 28:13) Vikalata vinyake vyakale vikulongora kuti ŵakalemberananga malo agho munthu wagura kweniso makuni usange ghalipo.—Yaniskani na Ge 23:17, 18.
Ivyo Tasambira
it-2-E 683 ¶1
Wasembe
Melekizedeki themba la Salemu wakaŵa wasembe (ko·henʹ) wapadera chomene. Baibolo likuzunura yayi kuti ŵapapi ŵake ŵakaŵa anjani, nesi kuyowoya zuŵa ilo wakababikira panji ilo wakafwira. Wakachita kuhara yayi usembe wake ndipo palije uyo wakamupokera usembe. Melekizedeki wakaŵa themba kweniso wasembe. Usembe wake ukaluskanga usembe wa Ŵalevi chifukwa Levi tingayowoya kuti wakapeleka vyakhumi kwa Melekizedeki kwizira mwa Abrahamu. Vili nthena pakuti apo Abrahamu wakapeleka vyakhumi kwa Melekizedeki Levi wakaŵa kuti wali mu chiwuno. (Ge 14:18-20; Heb 7:4-10) Mu vinthu ivi Melekizedeki wakimiranga Yesu Khristu uyo ni “wasembe muyirayira nga umo vikaŵira na Melekizedeki.”—Heb 7:17.
FEBULUWALE 10-16
MAZGU GHA CHIUTA MBUSAMBAZI | GENIZESI 15-17
“Chifukwa Wuli Yehova Wakasintha Zina la Abramu na Sarai?”
it-1-E 817
Kafukwa, Kusanga Kafukwa
Kanandi munthu wakubudiska ivyo wakuchita. Kwananga na kubudiska ni vinthu ivyo tili kuhara kufuma kwa Adamu. (Ro 5:12; Sa 51:5) Kweni Yehova walije kafukwa kalikose ndipo “wakumanya makora umo tili kupangikira, wakukumbuka kuti tili fuvu” ndipo wakutichitira lusungu. (Sa 103:13, 14) Mwachiyelezgero, iyo wakawonanga Nowa kuti “wakaŵa wambura kafukwa mu muwiro wake.” (Ge 6:9) Iyo wakaphalira Abrahamu kuti: “Yenda pamaso pane ndipo uŵe wambura kafukwa.” (Ge 17:1) Nangauli ŵanthu ŵaŵiri aŵa ŵakaŵa ŵambura kufikapo, kweni Yehova uyo “wakuwona mu mtima” wakaŵawonanga kuti ŵakaŵa ŵambura kafukwa. (1Sa 16:7; yaniskani na 2Ma 20:3; 2Mi 16:9) Chiuta wakaphalira Ŵaisrayeli kuti: “Muŵenge ŵambura kafukwa pamaso pa Yehova Chiuta winu.” (Do 18:13; 2Sa 22:24) Iyo wakapeleka Mwana wake wambura kafukwa (Heb 7:26) kuŵa sembe, ndipo chifukwa cha sembe iyi, Chiuta wakuŵawona kuŵa (Heb 7:26; Ro 3:25, 26) ‘ŵarunji’ ŵanthu awo ŵali na chipulikano mu sembe iyi, kweniso awo ŵakupulikira. Nangauli vili nthena kweni wakulutilira kuŵa Mweruzgi wa ‘urunji’ na wambura kafukwa.—Ro 3:25, 26; wonani mazgu ghakuti INTEGRITY; PERFECTION.
it-1-E 31 ¶1
Abrahamu
Nyengo yikajumphapo. Abrahamu na Sara ŵakakhala mu Kenani vyaka 10, kweni ŵakaŵavya mwana. Ntheura wakatora muteŵeti wake wa ku Eguputo, Hagara na kumupeleka kwa mfumu wake Abrahamu kuti waŵe muwoli wake kuti panji ŵangaŵa na mwana kwizira mwa iyo. Abrahamu wakazomera. Ntheura mu 1932 B.C.E., apo Abrahamu wakaŵa na vyaka 86, Ishumayeli wakababika. (Ge 16:3, 15, 16) Vyaka vikajumphapo. Mu 1919 B.C.E., apo Abrahamu wakaŵa na vyaka 99, Yehova wakaphalira Abrahamu kuti ŵanalume ŵake wose ŵakotoleke nga ntchimanyikwiro chakuti pali phangano lapadera pakati pa Yehova na Abrahamu. Pa nyengo yeneyiyi, Yehova wakasintha zina lakuti Abramu kuŵa Abrahamu, chifukwa Chiuta wakati wamuzgorenge kuŵa “wiske wa mitundu yinandi.” (Ge 17:5, 9-27; Ro 4:11) Pamanyuma, Abrahamu wakapokelera ŵangelo ŵatatu awo ŵakiza ku nyumba kwake, ndipo ŵakamuphalira kuti Sara waŵenge na nthumbo na kubaba mwana chaka chakulondezgapo!—Ge 18:1-15.
Ivyo Tasambira
it-1-E 460-461
Mu Ndondomeko
Yehova wakaphalira Abramu (Abrahamu) kuti: “Manya kuti mphapu yako yizamukhala mu charu chaŵene, ndipo ŵanthu ŵa mu charu icho ŵazamuŵazgora ŵazga na kuŵayuzga vyaka 400.” (Ge 15:13; Mil 7:6, 7) Yehova wakamuphalira Abrahamu mazgu agha pambere “mphapu” yakulayizgika Yisake wandababike. Mu 1932 B.C.E. Abrahamu wakababa Ishumayeli mwa muzgakazi wake Hagara wa ku Eguputo. Ndipo mu 1918 B.C.E., Abrahamu wakababa Yisake. (Ge 16:16; 21:5) Usange tingapenda kuya kumanyuma vyaka 400, kufuma apo Ŵaisrayeli ŵakafumira ku wuzga (Ge 15:14), tikufika mu chaka cha 1913 B.C.E. Pa nyengo iyi, Yisake wakaŵa na vyaka pafupifupi 5. Vikuwoneka kuti pa nyengo iyi Yisake wakaŵa kuti walumulika, ndipo wakaŵa kale mulendo mu charu icho. Yisake wakaŵa kuti wamba kale kuyuzgika nga umo uchimi ukayowoyera pakuti Ishumayeli uyo panyengo iyi wakaŵa na vyaka 19 ‘wakamusekanga Yisake.’ (Ge 21: 8, 9) Nangauli pasono ivyo Ishumayeli wakachitanga pakuseka Yisake uyo ni Mphapu ya Abrahamu vingawoneka nga ni nkhani yichoko, kweni ndimo vikaŵira yayi panyengo iyo. Ukaboni ni umo Sara wakachitira pakuchichizga Abrahamu kuti wamuchimbizge Hagara na mwana wake ndipo Yehova wakazomerezga. (Ge 21:10-13) Umo nkhani iyi yili kulembeka makora mu Baibolo, vikulongora kuti vyaka 400 vyakuyuzgika ivyo uchimi ukayowoyerathu, vikambika panyengo yeneyiyi.—Ga 4:29.
it-1-E 778 ¶4
Kufwatulika ku wuzga
“Muwiro wa chinayi.” Tikwenera kukumbuka kuti Yehova wakaphalira Abrahamu kuti muwiro wa chinayi wa ŵana ŵake uzamuwelera ku Kenani. (Ge 15:16) Mu vyaka 430 kufuma apo phangano la Abrahamu likambira kugwira ntchito kufika pa nyengo iyo Ŵaisrayeli ŵakafumira ku wuzga pakaŵa kuti pajumpha miwiro yinayi nangauli pa nyengo yira ŵanthu ŵakakhalanga vyaka vinandi nga umo Baibolo likuyowoyera. Kweni vyaka vyeneko ivyo Ŵaisrayeli ŵakakhalira mu Eguputo ni 215. Kuti tipulikiske makora umo miwiro yinayi yikapendekela, tiyeni tiwone chiyelezgero cha fuko la Levi. Muwiro wakwamba, Levi, wachiŵiri, Kohati, wachitatu, Amuramu, ndipo wachinayi ukaŵa wa Mozesi.—Ek 6:16, 18, 20.
FEBULUWALE 24–MALICHI 1
MAZGU GHA CHIUTA MBUSAMBAZI | GENIZESI 20-21
“Nyengo Zose Yehova Wakufiska Ivyo Walayizga”
Ivyo Tasambira
w89 7/1 20 ¶9
Abrahamu Ntchiyelezgero Chiwemi ku Wose Awo Ŵakukhumba Kuŵa Paubwezi na Chiuta
Paliso chinthu chinyake icho chikulongora kuti Abrahamu wakaŵa na chipulikano. Baibolo likuti: “Wakazengera jotchero Yehova.” (Genizesi 12:7) Pa jotchero ili, Abrahamu wakwenera kuti wakapelekerangapo sembe za nyama chifukwa mazgu agho ghali kung’anamulika kuti jotchero, mu Chihebere ghakung’anamura “malo ghakupelekerapo sembe.” Pamasinda, Abrahamu wakazenganga jotchero ku malo ghakupambanapambana uko wakasamukiranga. Kweniso iyo ‘wakachemanga pa zina la Yehova.’ (Genizesi 12:8; 13:18; 21:33) Mazgu Ghachihebere agho ghali kung’anamulika kuti “kuchema pa zina,” ghakung’anamuraso “kupharazga zina.” Ŵamumbumba yake kweniso Ŵakenani ŵakwenera kuti ŵakamupulikanga apo wakapharazganga zina la Chiuta lakuti Yehova mwachikanga. (Genizesi 14:22-24) Mwakuyana waka, wose awo ŵakukhumba kuŵa paubwezi na Chiuta mazuŵa ghano, ŵakwenera kuchema pa zina la Yehova mwa chipulikano. Ivi vikusazgapo kupharazga, uko nkhupeleka kwa “Chiuta sembe ya malumbo nyengo zose, icho ntchipambi cha milomo yithu iyo yikuzomera pakweru zina lake.—Ŵahebere 13:15; Ŵaroma 10:10.