Maliferensi gha Uteŵeti na Umoyo Wachikhristu—Kabuku ka Maungano
MEYI 2-8
MAZGU GHA CHIUTA MBUSAMBAZI | 1 SAMUYELI 27-29
“Umo Davide Wakalweranga Nkhondo”
it-1-E 41
Akishi
Davide apo wakachimbiranga Sauli, kaŵiri kose wakabisama mu chigaŵa icho Themba Akishi likawusanga. Paulendo wakwamba apo Davide wakawona kuti ŵamba kumukayikira kuŵa mulwani, wakamba kuchita vinthu nga ni munthu wakufuntha, ndipo Akishi wakamuleka waka kuti walutenge kwambura kumupweteka. (1Sa 21:10-15; Sa 34:Sup; 56:Sup) Paulendo wachiŵiri Davide wakaluta na ŵanalume ŵankhondo 600 pamoza na mbumba zawo, ndipo Akishi wakaŵapa msumba wa Zikilagi kuti ndimo ŵakhalenge. Pa nyengo ya chaka chimoza na myezi yinayi, apo ŵakaŵira ku malo agha, Akishi wakagomezganga kuti Davide na ŵanalume ŵake ŵakawukiranga misumba ya Ŵayuda, apo Davide wakawukiranga Ŵageshuri, Ŵagizi, na Ŵaamaleki. (1Sa 27:1-12) Ntheura chifukwa cha pulani iyi, Davide vikamwendera mwakuti Akishi wakafika na pakumuŵika kuŵa mulinda wake panyengo iyo Ŵafilisiti ŵakanozganga vyakuwukira Themba Sauli. Paumaliro mwakovwirika na “mafumu” gha Ŵafilisiti, ndipo Davide ŵakamuwezga kuti wawelere ku Zikilagi. (1Sa 28:2; 29:1-11) Davide wati waŵa themba na kurwa nkhondo na Gati, Akishi wakakomeka yayi. Iyo wakaŵa wamoyo m’paka mu nyengo ya ufumu wa Solomoni.—1Ma 2:39-41; wonani GATH.
it-2-E 245 ¶6
Utesi
Nangauli Baibolo likukana utesi, kweni ichi chikung’anamura kuti munthu waphalirenge ŵanthu unenesko pa vinthu ivyo vikuleka kuŵakhwaska yayi, ndipo pa nkhani zinyake wangasankha kukhala waka chete. Yesu Khristu wakapeleka ulongozgi wakuti: “Lekani kupeleka ku ntcheŵe icho ntchituŵa, panji kuponya ngale zinu panthazi pa nkhumba, kuti zileke kukandapo na malundi ghake ndipo zing’anamuke na kumufwemburani.” (Mt 7:6) Lekani nyengo zinyake Yesu wakaŵaphaliranga vyose yayi panji kupeleka zgoro lakudunjika pa mafumbo ghanyake para wawona kuti usange wangavumbura vyose pangaŵa masuzgo. (Mt 15:1-6; 21:23-27; Yoh 7:3-10) Ndimo wakachitiraso Abrahamu, Yisake, Rahabi, na Elisha. Iwo ŵakavumburanga vyose yayi kuphalira ŵanthu ŵambura kusopa Yehova na chilato chakuti paleke kuŵa masuzgo.—Ge 12:10-19; chaputara 20; 26:1-10; Jos 2:1-6; Yak 2:25; 2Ma 6:11-23.
MEYI 16-22
MAZGU GHA CHIUTA MBUSAMBAZI | 2 SAMUYELI 1-3
“Kasi Tikusambirako Vichi ku Chiliro Chakuchemeka ‘Uta’?”
w00-E 6/15 13 ¶9
Chindikani Awo Ŵali na Mazaza pa Imwe
Kasi Davide wakasoŵa kwakunjilira apo ŵakamuchitiranga nkhaza? Davide wakalilira kwa Yehova kuti: “Ŵanthu ŵankhaza ŵakupenja umoyo wane.” (Salimo 54:3) Wakapungulira mtima wake kwa Yehova kuti: “Nithaskani ku ŵalwani ŵane, A Chiuta wane . . . Ŵanthu ŵankhongono ŵaniwukira, kweni ntchifukwa chakuti nagaluka panji kwananga yayi, A Yehova. Nangauli nindabude, ŵakuchimbira kuti ŵaniwukire. Wukani apo nkhumuchemani, muwone.” (Salimo 59:1-4) Kasi namwe muli kujipulikapo nthena kuti mundamuchitirepo chinthu chiheni munthu uyo wali na mazaza, kweni wakulutilira kumusuzgani? Davide wakamuyuyurapo yayi Sauli. Sauli wati wafwa, m’malo mwakukondwa, Davide wakata sumu ya chiliro yakuti: “Sauli na Yonatani, ŵanthu ŵakutemweka na ŵakuchindikika apo ŵakaŵa ŵamoyo . . . ŵakaŵa ŵaluŵiro kuluska nombo, ŵankhongono chomene kuluska nkhalamu. Imwe ŵana ŵasungwana ŵa Israyeli, lilirani Sauli.” (2 Samuyeli 1:23, 24) Ichi ntchiyelezgero chiwemi chomene pa nkhani ya kuchindika wakuphakazgika wa Yehova, nangauli Sauli ndiyo wakamuchitiranga viheni Davide.
Ivyo Tasambira
it-1-E 369 ¶2
Mubali
Mazgu ghakuti “mubali” ghakugwiraso ntchito ku ŵanthu awo mbakukolerana ndipo ŵali na chilato chimoza. Mwachiyelezgero, Themba la ku Ture Hiramu, likachema Solomoni kuti mubali wake. Likayowoya nthena chifukwa chakuti waka wose ŵakaŵa na udindo wakuyana yayi, kweniso chifukwa chakuti wose ŵakaŵa na chilato chimoza kuti ŵasange mathabwa na vinthu vinyake vya pa tempile. (1Ma 9:13; 5:1-12) Davide wakalemba kuti: “Wonani! Ntchiwemi na chakukondweska nadi kuti ŵabali ŵakukhala pamoza mwakukolerana!” Apa Davide wakang’anamuranga kuti ŵanthu awo mphaubali wa ndopa yimoza ndiwo ŵakuŵa pa mtende na kukolerana pera yayi. (Sa 133:1) Nakuti Davide wakachema Yonatani kuti mubali wane chifukwa chakuti wakamutemwanga kweniso ŵakaŵa na vilato vyakuyana. (2Sa 1:26) Ŵanthu awo ŵali na vyakuchita vimoza panji maghanoghano ghakuyana, nanga vyakuchita vyawo vingaŵa viheni, ŵakuŵa paubali.—Zi 18:9.
MEYI 23-29
Ivyo Tasambira
w96-E 4/1 29 ¶1
Nyengo Zose Thwikiskani Yehova Katundu Winu
Davide pakuŵa themba, wakaŵa na mulandu pa nkhani iyi. Umo wakachitira apa vikulongora kuti nanga ni ŵanthu awo ŵali paubwezi uwemi na Yehova nyengo zinyake ŵangachita vinthu mwambura mahara para ŵayezgeka. Pakwamba Davide wakakwiya. Pamanyuma wakachita wofi. (2 Samuyeli 6:8, 9) Ubwezi wake na Yehova ukayezgeka chomene. Panyengo iyi wakatondeka kuthwikiska Yehova katundu wake ndipo wakalondezga yayi malango ghake. Kasi ndimo nyengo zinyake vikuŵira kwa ise? Kasi nyengo zinyake tikumwimba mulandu Yehova para tasangana na suzgo chifukwa chakuti tangutondeka kulondezga malango ghake?—Zintharika 19:3.
MEYI 30–JUNI 5
Ivyo Tasambira
it-2-E 206 ¶2
Munthazi
Uchimi wa Balamu. Yikaŵa nyengo apo Ŵaisrayeli ŵakaŵa kuti ŵandanjire mu Charu cha Layizgano apo Balamu wakayowoya kwa Balaki, themba la Mowabu kuti: “Zanga, leka nikuphalire icho ŵanthu aŵa [Ŵaisrayeli] ŵazamuchitira ŵanthu ŵakwako munthazi. . . . “Nyenyezi yifumenge mwa Yakhobe, nthonga yaufumu yiwukenge mwa Israyeli. Ndipo wazamuphwanya chisko cha Mowabu na bwaza la ŵana wose awo ŵali na ukali wa nkhondo.” (Maŵ 24:14-17) Uchimi uwu uli kufiskika kale kakwamba, ndipo Themba Davide ndilo likalongora kuti likaŵa “nyenyezi” apo likathereska Ŵamowabu. (2Sa 8:2) Ntheura ntchakuwonekerathu kuti pakufiska uchimi uwu, “munthazi” mukamba mu mazuŵa agho Davide wakamba kuŵa themba. Pakuti Davide wakachitiranga muzgezge Yesu pakuŵa Themba la Umesiya, uchimi uwu uzamufiskaso pa Yesu apo wazamuparanya ŵalwani ŵake.—Yes 9:7; Sa 2:8, 9.
JUNI 6-12
Ivyo Tasambira
it-1-E 266
Mwembe
Kale ŵanthu ŵanandi ŵakumafumiro gha dazi kusazgapo Ŵaisrayeli, ŵakawonanga mwembe kuŵa chinthu chakuzirwa chomene, ndipo munthu wakachindikikanga para wali na mwembe. Dango ilo Chiuta wakapeleka ku Ŵaisrayeli likakanizganga kumeta “sisi la mumphepete” la pakati pa khutu na jiso kweniso mwembe. (Le 19:27; 21:5) Chiuta wakaŵakanizga chifukwa kaluso aka kakaŵa kakuzara chomene pakati pa ŵanthu awo ŵakasopanga ŵangoza.
JUNI 13-19
Ivyo Tasambira
it-1-E 590 ¶1
Davide
Ndipouli, Yehova wakawonanga viheni vyose ivyo vikachitika. Yehova wazomerenge kuti ŵanthu ndiwo ŵeruzge nkhani ya Davide na Batisheba mwakuyana na Dango la Mozesi, mphanyi wose ŵaŵiri ŵakakomeka. Nanga ni mwana uyo wakaŵa kuti wandababike mphanyi nayo wakafwira lumoza na amama ŵake. (Do 5:18; 22:22) Kweni Yehova wakasankha kweruzga yekha nkhani iyi ndipo wakamulongora lusungu Davide chifukwa cha phangano la Ufumu (2Sa 7:11-16), kweniso tikukayika yayi kuti chikaŵa chifukwa chakuti Davide nayo wakachitiranga ŵanji lusungu (1Sa 24:4-7; yaniskani na Yak 2:13) kweniso chifukwa chakuti Chiuta wakawona kuti ŵakwananga aŵa ŵakalapa. (Sa 51:1-4) Ndipouli, iwo ŵakalekerathu yayi kulangika. Yehova wakayowoya kwizira mwa ntchimi Natani kuti: “Wona nkhukukhizgira soka lakufuma mu nyumba yako.” (2Sa 12:1-12)
JUNI 20-26
MAZGU GHA CHIUTA MBUSAMBAZI | 2 SAMUYELI 13-14
“Amunoni Wakasangana na Suzgo Chifukwa cha Kujighanaghanira”
it-1-E 32
Abisalomu
Kukomeka kwa Amunoni. Tamara mudumbu wa Abisalomu wakaŵa wakutowa chomene mwakuti vikapangiska mudumbu wake munyake zina lake Amunoni kwamba kumudokera. Pakupusikizgira kuti walwara, Amunoni wakapempha kuti Tamara wize ku nyumba yake kuti wakamuphikire ndipo wakamukolelera. Kweni sono vinthu vikasintha, Amunoni wakamba kumutinkha chomene Tamara, ndipo wakapangiska kuti Tamara ŵamufumiske mu nyumba kuluta nayo ku msewu. Tamara wakakelura munjilira wake wapadera uwo ŵana ŵa themba awo ŵandagonepo na mwanalume ŵakavwaranga ndipo wakajithira vyoto ku mutu. Ndipo Abisalomu wakamusanga. Iyo wakamanya mwaluŵiro ivyo vikachitika ndipo wakakayikira Amunoni na kumanya chifukwa icho wakamutemweranga Tamara. Abisalomu wakaphalira mudumbu wake kuti waleke kumususka mudumbu wake ndipo wakamba kukhala nayo mu nyumba yake.—2Sa 13:1-20.
it-1-E 33 ¶1
Abisalomu
Vyaka viŵiri vikajumphapo. Yikaŵa nyengo ya kumeta mberere, kweniso ya chiphikiro ndipo Abisalomu wakanozga chiphikiro ku Baala-hazori, mtunda wa makilomita pafupifupi 22 kumpoto cha kumafumiro gha dazi kwa Yerusalemu, ndipo wakachemerako ŵana ŵa Davide kweniso Davide iyomwene. Apo adada ŵake ŵakapempha kuti ŵaleke kulutako, Abisalomu wakakosera kuti ŵazomerezge kutuma Amunoni mwana wawo wakwamba m’malo mwawo. (Zi 10:18) Pa nyengo iyo Amunoni ‘mtima wake ukasangwa na vinyo,’ Abisalomu wakaphalira ŵateŵeti ŵake kuti ŵamukome. Ŵana ŵanyake ŵakachimbira kuwelera ku Yerusalemu ndipo Abisalomu wakachimbilira ku charu cha Geshuri kumafumiro gha dazi kwa Nyanja ya Galileya pamoza na asekuru ŵake ŵa ku Siriya. (2Sa 13:23-38) “Lupanga” ulo ntchimi Natani yikayowoya pa nyengo iyi lukanjira mu “nyumba” ya Davide ndipo lukalutilira m’paka umoyo wake wose.—2Sa 12:10.
Ivyo Tasambira
g04-E 12/22 8-9
Kutowa Uko Nkhwakuzirwa Chomene
Mwakupambana, ghanaghanirani Abisalomu, mwana ŵa Davide. Iyo wakazgoka munthu wambura kukhumbikwa nangauli wakaŵa wakutowa mawonekero. Pakuyowoya za iyo, Baibolo likuti: “Mu Israyeli mose mukaŵavya munthu wakulumbika nga ni Abisalomu chifukwa cha mawonekero ghake ghakutowa. Mwa iyo mukaŵavya kalema kwamba kusi ku lundi lake m’paka pachanya pa mutu wake.” (2 Samuyeli 14:25) Kweni chifukwa cha kujikuzga, Abisalomu wakagalukira adada ŵake ndipo wakakhumbanga kuŵapoka uthemba. Abisalomu wakafika nanga mphakugona na ŵanakazi ŵanyake ŵa adada ŵake. Ntheura Chiuta wakakwiya na Abisalomu ndipo wakafwa nyifwa yakuŵinya chomene.—2 Samuyeli 15:10-14; 16:13-22; 17:14; 18:9, 15.
Kasi mungatemwa kuti Abisalomu waŵe mubwezi winu? Yayi. Nakuti iyo wakaŵa munthu muheni chomene. Nangauli wakaŵa munthu wakutowa mukawonekero, kweni kutowa kwake kukaŵa kanthu yayi pakuyaniska na uchigaluka wake ndipo kukamovwira yayi kuti waleke kuparanyika. M’malo mwake, Baibolo likuzunura ŵanthu ŵanandi ŵavinjeru na ŵakukondweska kweni likuyowoyapo yayi kuti ŵakaŵa ŵakutowa mukawonekero. Apa ntchakuwonekerathu kuti chakuzirwa chomene kukaŵa kutowa kwawo kwa mukati.
JUNI 27–JULAYI 3
MAZGU GHA CHIUTA MBUSAMBAZI | 2 SAMUYELI 15-17
“Abisalomu Wakagaluka Chifukwa cha Kujikuzga”
it-1-E 860
Ŵanthu Ŵakuchimbira Panthazi
Kakaŵa kaluso mu nyengo yakale kuti ŵanthu ŵanyake ŵakachimbiranga panthazi pa gileta la themba na kupharazga za themba kweniso kulovwira munthowa zinyake. (1Sa 8:11) Abisalomu na Adonija ndivyo nawo ŵakachita. Iwo ŵakanozga vyakuti ŵanthu 50 ŵachimbirenge panthazi pa magileta ghawo.—2Sa 15:1; 1Ma 1:5; wonani RUNNERS.
it-1-E 1083-1084
Heburoni
Vyaka vikati vyajumphapo, Abisalomu mwana wa Davide wakawelera ku Heburoni kuti wakaphange ufumu wa awiske kweni vikamwendera yayi. (2Sa 15:7-10) Pakuti Heburoni ukaŵa msumba wakuzirwa, ndipo nyengo yinyake ndiwo ukaŵa msumba ukuru wa Yuda kweniso msumba uwo wakababikiramo, lekani Abisalomu wakasankha msumba uwu kuti ndiko wakambire uthemba wake. Pamanyuma, muzukuru wa Davide Rehobowamu wakazengaso msumba wa Heburoni. (2Mi 11:5-10) Pamanyuma pakuti msumba wa Yuda waparanyika na Ŵababuloni, ndipo Ŵayuda awo ŵakatolekera ku wuzga ŵati ŵawerako, ŵanji ŵakakhazikika ku Heburoni (Kiriyati-ariba).—Ne 11:25.