Maliferensi gha Uteŵeti na Umoyo Wachikhristu—Kabuku ka Maungano

Maliferensi gha Uteŵeti na Umoyo Wachikhristu—Kabuku ka Maungano

JANYUWALE 16-22

Ivyo Tasambira

it-1-E 911 ¶3-4

Mdauko

Mazina gha Ŵanakazi. Nyengo zinyake mazina gha ŵanakazi ghakazunulikanga mu ndondomeko ya ŵanthu awo ŵali kulembeka mu Baibolo para pali nkhani yakuzirwa yakukhwaskana na mdauko. Baibolo likumuzunura Sarayi (Sara) pa Genizesi 11:29, 30, chifukwa chakuti mphapu iyo Chiuta wakalayizga yikeneranga kufuma mwa iyo, kuti kwizira mwa mwanakazi munyake uyo Abrahamu wakatora yayi. Milika wakuzunulika mu mavesi agha chifukwa wakaŵa buya wa Rabeka uyo wakaŵa muwoli wa Yisake. Ntheura vikutovwira kumanya kuti Rabeka wakaŵa wa mzere wa Abrahamu, chifukwa Yisake wakatora mwanakazi kufuma ku mitundu yinyake yayi. (Ge 22:20-23; 24:2-4) Pa Genizesi 25:1, Baibolo likuzunuraso za mwanakazi munyake zina lake Ketura uyo Abrahamu wakatora pamasinda. Ivi vikulongora kuti Abrahamu wakatoraso mwanakazi munyake, Sara wati wafwa, ndipo pa nyengo iyi Abrahamu wakaŵa kuti wachali na nkhongono zakuti wangababa nangauli vyaka 40 vikaŵa kuti vyajumphapo kufuma apo Yehova wakamupira nkhongono izi mwamunthondwe. (Ro 4:19; Ge 24:67; 25:20) Kweniso vikuvumbura ubali wa Ŵamidiyani, na mafuko ghanyake gha Ŵaarebiya ku Ŵaisrayeli.

Baibolo likuzunura Leya, Rakelo, na ŵanakazi ŵanyake awo Yakhobe wakatora kweniso ŵana ŵawo awo ŵakababa. (Ge 35:21-26) Ivi vikutovwira kupulikiska umo Chiuta wakachitiranga vinthu na ŵana aŵa. Mazina gha ŵanakazi ŵanyake ghakuzunulika mu Baibolo pa vifukwa vyakuyana waka. Mazina ghawo ghakazunulikangaso para ŵapika chiharo. (Maŵ 26:33) Kweni Tamara, Rahabi, na Rute mazina ghawo ghakuzunulika mu Baibolo pa nkhani zapadera. Pakachitika vinthu vyapadera kuti ŵanakazi aŵa nawo ŵasangike mu mzere wa Mesiya, Yesu Khristu. (Ge 38; Ru 1:3-5; 4:13-15; Mt 1:1-5) Padera pa nkhani izi, mazina gha ŵanakazi ghakuzunulikaso mu Baibolo pa 1 Midauko 2:35, 48, 49; 3:1-3, 5.

FEBULUWALE 6-12

Ivyo Tasambira

it-1-E 1058 ¶5-6

Mtima

Kuteŵetera na “Mtima Wakufikapo.” Mtima wa munthu kuti ugwire makora ntchito ukwenera kuŵa wose wanthunthu, kweni mtima wakuyezgera ungagaŵanika. Davide wakalomba kwa Yehova kuti: “Lungani mtima wane kuti wopenge zina linu,” kulongora kuti mtima wa munthu ungagaŵanika pa nkhani yakutemwa panji kopa. (Sa 86:11) Munthu wanthena wangaŵa kuti wali na “mtima wapaŵiri” panji kuti wakulopwa pakusopa Chiuta. (Sa 119:113; Chiv 3:16) Munthu wangaŵaso na “mitima yiŵiri” (mitima yiŵiri yakuyelezgera), kuteŵetera mabwana ghaŵiri pa nyengo yimoza, panji munthu mwaupusikizgi wangayowoya chinthu apo maghanoghano ghake ghali kunyake. (1Mi 12:33; Sa 12:2, mazgu ghamusi) Yesu wakasuska mwankhongono upusikizgi wanthena wa kuŵa na mitima yiŵiri.—Mt 15:7, 8.

Kuti munthu wakondweske Chiuta wakwenera kuŵa na mtima wakugaŵikana yayi kweni wakwenera kuteŵetera Chiuta na mtima wakufikapo. (1Mi 28:9) Munthu wakwenera kulimbikira chomene chifukwa mtima nguheni wambura kukoleka pakuchita viheni. (Yer 17:9, 10; Ge 8:21) Tingaŵa na mtima wakufikapo para: tikulomba kufumira pasi pamtima (Sa 119:145; Chit 3:41), tikusambira Mazgu gha Chiuta zuŵa lililose (Ezr 7:10; Zi 15:28), tikuŵikapo mtima kupharazga makani ghawemi (yaniskani na Yer 20:9), kweniso para tikuchezga na ŵanthu awo ŵali na mtima wakufikapo kwa Yehova.—Yaniskani na 2Ma 10:15, 16.