Maliferensi gha Uteŵeti na Umoyo Wachikhristu—Kabuku ka Maungano
MEYI 6-12
Ivyo Tasambira
it-2-E 445
Phiri, Mapiri
Kuleka kusunkhunyika, kukhazikika, panji kutumphuka. Mapiri ghakusunkhunyika yayi kweniso ghakuŵa ghakukhazikika. (Yes 54:10; Hab 3:6; yaniskani na Sa 46:2.) Ntheura apo wamasalimo wakayowoyanga vya urunji wa Yehova kuti uli nga ni “mapiri gha Chiuta” (Sa 36:6) wakwenera kuti wakang’anamuranga kuti urunji wa Yehova ukusunkhunyika yayi. Panji, pakuti mapiri ghakuŵa ghakutumphuka, fundo iyi yingalongora kuti urunji wa Chiuta ngwapachanya chomene kuluska wa ŵanthu. (Yaniskani na Yes 55:8, 9.) Pakuyowoya za kupungulika kwa bakule ya nambara 7 ya ukali wa Chiuta, lemba la Chivumbuzi 16:20 likuti: “Mapiri ghakasangika yayi.” Fundo iyi yikung’anamura kuti nanga vingaŵa vinthu vyakutumphuka nga ni mapiri vingachimbira yayi ukali wa Chiuta.—Yaniskani na Yer 4:23-26.
MEYI 20-26
Ivyo Tasambira
it-2-E 16
Yehova
Fundo yikuru ya Baibolo lose njakukhwaskana na kuthuwuskika kwa muwuso wa Yehova, ndipo chilato chikuru cha Yehova Chiuta, nkhutuŵiskika kwa zina lake. Kutuŵiskika kwa zina lake kuzamuwuskapo viheni vyose ivyo ŵanthu ŵayowoyera zina la Chiuta. Kweni chikuru chomene ntchakuti, ŵangelo kuchanya kweniso ŵanthu pa charu chapasi ŵakwenera kuchindika zina la Chiuta ilo ndapadera. Ichi chikung’anamura kuti ŵakwenera kumanya na kuchindika muwuso wa Yehova, kuchita ichi na mtima wose, kukhumbisiska kuchita khumbo lake na kumuteŵetera chifukwa chakuti ŵakumutemwa. Lurombo ulo Davide wakalomba kwa Yehova, ulo luli pa Salimo 40:5-10 lukulongora kuti wakakhumbanga chomene kutuŵiska zina la Yehova. (Pa Ŵahebere 10:5-10 mpositole wakayowoya kuti salimo ili likuyowoya vya Yesu Khristu.)
MEYI 27–JUNI 2
Ivyo Tasambira
it-1-E 1242
Kambwe
Mu Malemba, mazgu ghakuti kambwe kanandi ghakuyowoyeka mu ntharika. Apo Yobu wakadandawuranga za masuzgo ghake wakayowoya kuti wazgoka “mubali wa ŵakambwe.” (Yob 30:29) Pakuyowoya za kuthereskeka kwa ŵanthu ŵa Chiuta, panji wamasalimo wakayowoyanga vya pa malo gha nkhondo, apo pakuwungana ŵakambwe kuti ŵarye nyama ya ŵanthu awo ŵakomeka. (Yaniskani na Sa 68:23) Iyo wakalira kuti: “Mwatitekenyulira uko ŵakambwe ŵakukhala.” (Sa 44:19) Ŵababuloni ŵakati ŵazingilizga Yerusalemu mu 607 B.C.E. kukaŵa njara yikuru, mwakuti ŵamama ŵakamba kuchitira nkhaza ŵana ŵawo. Lekani Yeremiya wakati ‘ŵanthu ŵake’ ŵakaŵa ŵakupambana na ŵakambwe pakupwelelera ŵana ŵawo.—Chit 4:3, 10.
JUNI 3-9
MAZGU GHA CHIUTA MBUSAMBAZI SALIMO 45-47
it-2-E 1169
Nkhondo
Para nkhondo iyi yazakamara, pa charu pazamuŵa mtende kwa vyaka 1,000. Wamasalimo wakayowoya kuti “[Yehova] wakulekeska nkhondo pa charu chose chapasi. Wakuphyora uta na kuswa mkondo. Wakotcha na moto magileta ghankhondo.” Mazgu agha ghakafiskika kakwamba apo Chiuta wakapeleka mtende mu charu cha Israyeli mwa kupangiska vyankhondo vya ŵalwani ŵawo kuti vileke kugwira ntchito. Para Khristu wazakaparanya awo ŵakwambiska nkhondo, pa Haramagedoni, charu chose chizamukondwa na mtende ukuru. (Sa 46:8-10) Ŵanthu awo ŵazamupika umoyo wamuyirayira ni awo ŵaskana “malupanga ghawo kuŵa vyakulimira, mikondo yawo kuŵa vyakuphatilira makuni” kweniso awo ‘ŵakusambiraso nkhondo chara.’ “Pakuti mulomo wa Yehova wa mawumba wayowoya.”—Yes 2:4; Mik 4:3, 4.
JUNI 10-16
Ivyo Tasambira
it-2-E 805
Usambazi
Pakuŵa mtundu usambazi, Ŵaisrayeli ŵakakondwanga na chakurya na vyakumwa (1Ma 4:20; Mu 5:18, 19), ndipo usambazi uwu ukaŵavikiliranga ku masuzgo agho ghakwiza chifukwa cha ukavu. (Zi 10:15; Mu 7:12) Ndipouli, nangauli usambazi uwu ukaŵa wakukolerana na khumbo la Yehova lakuti Ŵaisrayeli ŵasambazgikenge para ŵakulimbikira ntchito (yaniskani na Zi 6:6-11; 20:13; 24:33, 34), kweni wakaŵachenjezgaso kuti ŵaleke kumuluwa Mweneko wa usambazi uwu na kwamba kugomezga usambazi uwo ŵakaŵa nawo. (Do 8:7-17; Sa 49:6-9; Zi 11:4; 18:10, 11; Yer 9:23, 24) Iwo ŵakakumbuskika kuti usambazi ukaŵa wakanyengo waka (Zi 23:4, 5), ungapelekeka yayi kwa Chiuta kuŵa sembe yakuwombolera munthu ku nyifwa (Sa 49:6, 7), nakuti ngwambura ntchito para munthu wafwa (Sa 49:16, 17; Mu 5:15). Iwo ŵakasambizgika kuti para munthu wakuzirwiska chomene usambazi wangaŵa na mikhaliro yawakawaka na kukwiyiska Yehova. (Zi 28:20; yaniskani na Yer 5:26-28; 17:9-11.) Ŵakachiskikaso kuti ‘ŵachindikenge Yehova na vinthu vyawo vyakuzirwa.’—Zi 3:9.
JUNI 17-23
Ivyo Tasambira
it-1-E 644
Dowegi
Wakaŵa Muedomu ndipo wakateŵeteranga Themba Sauli nga mulongozgi wa ŵaliska ŵake, ndipo ndiyo wakaŵalaŵiliranga. (1Sa 21:7; 22:9) Vikuwoneka kuti Dowegi wakang’anamukira ku Chiyuda. Iyo wakajalirika “pamaso pa Yehova” pa Nobu, panji chifukwa cha kuchita chilapo, kufipiskika, panji kumughanaghanira kuti wali na vyoni. Apo wakaŵa pa Nobu, Dowegi wakawonanga apo Wasembe Mukuru Ahimeleki wakapeleka kwa Davide chingwa chakulongora na lupanga lwa Goliyati. Pamanyuma, apo Sauli wakaphaliranga ŵateŵeti ŵake kuti ŵakumwendera mphiska, Dowegi wakavumbura ivyo wakawona ku Nobu. Sauli wati wachemeska wasembe mukuru na ŵasembe ŵanyake ŵa ku Nobu na kufumba Ahimeleki, wakaphalira ŵalinda kuti ŵakome ŵasembe. Ŵalinda ŵakati ŵakana, Dowegi wakapulikira Sauli ndipo mwaluŵiro wakakoma ŵasembe 85. Pamanyuma pa nkhaza izi, Dowegi wakaparanya Nobu, ŵanthu wose awo ŵakakhalanga mu charu ichi, ŵana, ŵalara, na vinyama wuwo.—1Sa 22:6-20.
Nga umo mazgu ghakujulira Salimo 52 ghakulongolera, Davide wakalemba vya Dowegi kuti: “Lulimi lwako ndwakuthwa nga ntchakumetera, ndipo lukwata vyakupweteka na kuchita uryarya. Ukutemwa uheni kuluska uwemi, utesi kuluska kuyowoya unenesko. Ukutemwa mazgu ghose ghakupweteka, Iwe lulimi lwauryarya!”—Sa 52:2-4.
JUNI 24-30
Ivyo Tasambira
it-1-E 857-858
Kumanyirathu, Kunozgerathu
Kwendera mphiska uko Yudasi Isikariyoti wakachita kukafiska uchimi na kulongora kuti Yehova na Mwana wake ŵakumanyirathu vyamunthazi. (Sa 41:9; 55:12, 13; 109:8; Mil 1:16-20) Kweni tileke kughanaghana kuti fundo iyi yikung’anamura kuti Chiuta wakanozgerathu vyakuti Yudasi ndiyo wazamupeleka Yesu. Mauchimi ghakayowoyerathu kuti mubwezi wapamtima wa Yesu ndiyo wazamumwendera mphiska, kweni ghakayowoya mwakudunjika yayi vya munthu uyo wazamuchita ichi. Nakuti Chiuta wanozgerengethu vyakuti Yudasi wendere mphiska Yesu, mphanyi vikasuskana na fundo za mu Baibolo. Fundo ya mu Malemba iyo mpositole munyake wakayowoya yikuti: “Ungachimbiliranga yayi kuŵika mawoko pa munthu, nesi kupokako zakwananga za ŵanyake, ujisungilire mutuŵa.” (1Ti 5:22; yaniskani na 3:6.) Chifukwa chakuti wakakhumbanga kusankha mwamahara ŵapositole ŵake 12, Yesu wakatchezera usiku wose kulomba kwa Adada ŵake pambere wandayowoye awo wasankha. (Lu 6:12-16) Chiuta waŵenge kuti wakanozgerathu vyakuti Yudasi ndiyo wazakendere mphiska Yesu, mphanyi vikalongora kuti watondeka kumulongozga makora Yesu ndipo kuyana na dango, mphanyi wakapokako zakwananga za Yudasi.
Ichi chikung’anamura kuti panyengo iyo wakasankhikanga kuŵa mpositole, Yudasi wakalongorapo yayi mikhaliro yakuti wangendera mphiska munthu. Iyo wakazomerezga “msisi wapoyizoni” kumunanga na kumupangiska kutalikirana na Chiuta. Pamanyuma wakamba kulondezga Dyabulosi ndiposo kwiba na kuchita ukhuluku. (Heb 12:14, 15; Yoh 13:2; Mil 1:24, 25; Yak 1:14, 15; wonani YUDA Na. 4.) Mtima wa Yudasi ukati wafika paheni, Yesu wakawumanya ndipo wakayowoyerathu kuti ndiyo wazamumupeleka.—Yoh 13:10, 11.