Nangauli Nkhaŵa Wasoni Kweni Nkhafiska Kuŵa Mishonale

Nkhababika mu 1951 ku Vienna, Austria, ndipo ŵapapi ŵane ŵakaŵa Ŵakatolika. Nkhaŵa wasoni, kweni nkhagomezganga Chiuta ndipo kanandi nkhalombanga. Apo nkhaŵa na vyaka 9, adada ŵakamba kusambira Baibolo na Ŵakaboni ŵa Yehova; ndipo pamanyuma amama nawo ŵakamba kusambira Baibolo.

Nakalinga tikamba kuwungana na mpingo wa Döbling ku Vienna. Nga mbumba, tikachitiranga vinandi lumoza. Tikaŵazganga na kusambira Baibolo, kuluta ku maungano gha mpingo, na kujipeleka kuchitako mauteŵeti ghakupambanapambana pa maungano ghakurughakuru. Kufuma waka pa wana, adada ŵakanisambizga kutemwa chomene Yehova. Nakuti nyengo zose adada ŵakalombanga kuti ine na munung’una wane tizakaŵe ŵapayiniya. Kweni ichi ndicho chikaŵa chilato chane yayi.

KWAMBA UTEŴETI WANYENGOZOSE

Nkhabatizika mu 1965, ndipo nkhaŵa na vyaka 14. Ndipouli, vikanisuzganga kuti nambe kuyowoya na ŵanthu awo nkhuŵamanya yayi mu uteŵeti. Kweniso kanandi nkhajiwonanga wapasi chomene kuluska ŵanyane ndipo nkhadokeranga kuti ŵanyane ŵanitemwenge. Ntheura nyengo yichoko waka nati nabatizika, nkhamba kuchezga chomene na ŵanthu awo ŵakateŵeteranga Yehova yayi. Nangauli nkhakondwanga kuchezga nawo, kweni njuŵi yikanisuzganga chifukwa cha kumalira nyengo yinandi na ŵanthu awo Mbakaboni yayi. Kweni vikanisuzganga kuti nisinthe. Kasi ntchivichi chikanovwira kuti nisinthe?

Mu vyaka vyenevivi, msungwana munyake wa vyaka 16 zina lake Dorothée wakamba kuwungana na mpingo withu. Wakatemwanga chomene kupharazga nyumba na nyumba ndipo wakanikondweska. Iyo wakaŵako muchoko kwa ine, kweni wakaŵa wamwamphu chomene mu uteŵeti. Ntheura mu mtima nkhati: ‘Ine ŵapapi ŵane Mbakaboni, kweni Dorothée kwawo waliko yekha Kaboni. Iyo wakukhala na amama ŵake awo mbalwari, kweni nyengo zose wakuŵa mu uteŵeti.’ Chiyelezgero chake chiwemi chikanichiska kuti nane niŵikepo mtima kumuchitira vinandi Yehova. Pati pajumpha nyengo yichoko waka, ine na Dorothée tikamba kuchitira lumoza upayiniya. Pakwamba tikaŵa ŵapayiniya ŵakanyengo ndipo kufuma apo tikaŵa ŵapayiniya ŵanyengozose. Chifukwa chakuti Dorothée wakalimbikiranga kupharazga, vikanovwira kuti naneso nambe kuwutemwa chomene mulimo uwu. Iyo wakanovwira kuti nambiske sambiro la Baibolo lakwamba. Nyengo yati yajumphapo, nkhamba kufwatuka kupharazgira ŵanthu pa nyumba zawo, munthowa, kweniso malo ghanyake.

Mu chaka chakwamba icho nkhaŵira mupayiniya wanyengozose, mu mpingo withu mukiza mubali munyake wa ku Austria zina lake Heinz. Wakasambira unenesko ku Canada apo wakaluta kukawona mukuru wake uyo wakaŵa Kaboni. Heinz wakatumika kuzakachita upayiniya wapadera mu mpingo withu ku Vienna. Nati namuwona waka, nkhatoleka nayo mtima. Kweni iyo wakakhumbanga kuti wazakaŵe mishonale, apo ine nkhaŵavya chilato ichi. Ntheura pakwamba nkhawoneskera yayi kuti natoleka nayo mtima. Ndipouli, pati pajumpha nyengo tikamba chibwezi, kufuma apo tikatorana, na kwamba kuchitira lumoza upayiniya ku Austria.

KWAMBA KUŴA NA CHILATO CHA UMISHONALE

Kanandi mfumu wane Heinz wakatemwanga kuniphalira vya khumbo lake lakuchita umishonale. Nangauli wakanichichizganga yayi, kweni wakanifumbanga mafumbo ghakunovwira kuti nighanaghanirepo, nga lakuti, “Pakuti tilije ŵana, kasi tingasazgirako yayi uteŵeti withu kuti timuchitire vinandi Yehova?” Chifukwa chakuti nkhaŵa wasoni nkhawopanga kuŵa mishonale. Mbunenesko kuti nkhachitanga upayiniya wanyengozose, kweni nkhawonanga kuti ntchakusuzga chomene kuchita umishonale. Ndipouli, mfumu wane wakalutilira kunovwira kuti nighanaghanirengepo vya kuŵa mishonale. Iyo wakanichiskaso kuti niŵikenge mtima chomene pa ŵanthu m’malo mwa kufipa mtima na suzgo lane. Ulongozgi wake ukanovwira chomene.

Pachoko na pachoko, nkhamba kuŵa na khumbo la kuchita umishonale, ntheura tikapempha kunjira Sukulu ya Giliyadi. Ndipouli, muteŵeti wa munthavi wakasachizga kuti nisambire dankha kuyowoya makora Chingelezi. Pati pajumpha vyaka vitatu nkhusambira kuyowoya makora Chingelezi, tikazizwa kuti tikatumika kukateŵetera mu mpingo wa chiyowoyero cha ku Yugoslavia ku Salzburg, Austria. Kwa vyaka 7 tikapharazgiranga ŵanthu awo ŵakayowoyanga chiyowoyero ichi, ndipo kwa chaka chimoza tikachita mulimo wakwendera dera. Chiyowoyero ichi chikaŵa chakusuzga chomene, kweni tikambiska masambiro ghanandi gha Baibolo.

Mu 1979, ŵabali awo ŵakalongozganga ŵakatipempha kuti kwanyengo yichoko waka tilute ku Bulgaria. Chifukwa chakuti mulimo withu ukaŵa wakukanizgika ku charu ichi, ŵakatipempha kuti tipusikizgire kuti tikuluta ku holide. Ŵakatiphalira kuti tingakapharazganga yayi kweni mwakubisirizga tinyamureko tumabuku tuchokotuchoko kuti tikapeleke ku ŵadumbu ŵankhondi awo ŵakakhalanga ku Sofia, msumba ukuru wa Bulgaria. Nkhaŵa na wofi chomene, kweni Yehova wakanovwira. Nkhati nawona umo ŵadumbu aŵa ŵakalongoleranga chikanga kweniso umo ŵakaŵira ŵakukondwa nangauli ŵakaŵa kuti ŵangakakika, vikanovwira kuŵa na chikanga kuchita vyose ivyo ningafiska pa uteŵeti uliwose uwo gulu la Yehova linganipa.

Nyengo yikati yajumphapo, tikapemphaso kunjira Sukulu ya Giliyadi, ndipo panyengo iyi ŵakatizomerezga. Tikaghanaghananga kuti tamuchita sukulu iyi mu Chingelezi ku United States. Kweni mu Novembala 1981, gulu likazomerezga kuti makilasi ghanyake ghachitikirenge ku Germany. Ntheura sukulu iyi tikachita mu Chigerman, icho chikaŵa chipusu chomene kwa ine. Kweni kasi tikatumika nkhu?

KUTEŴETERA MU CHARU CHA NKHONDO

Tikatumika ku Kenya! Ndipouli, ofesi ya munthavi ya Kenya yikatipempha usange tingatemwa kukateŵetera mu charu chapafupi cha Uganda. Vyaka vyakujumpha 10 kumasinda, mulara wa ŵasilikari Idi Amin wakapoka boma la Uganda. Mu vyaka vyakulondezgapo, muwuso wake ukaŵa wankhaza chomene ndipo ŵanthu ŵanandi ŵakakomeka. Kufuma apo, mu 1979 boma ili likapokekaso na ŵanthu ŵanyake. Pakuwona vyose ivi, panji munganipulikiska chifukwa icho nkhawoperanga kuluta ku charu ichi. Kweni Sukulu ya Giliyadi yikatinozgekereska kuti tigomezgenge Yehova. Ntheura tikazomera.

Vinthu vikaŵa makora yayi mu charu cha Uganda. Mu Buku Lapachaka la 2010 mfumu wane Heinz wakalongosorapo kuti: “Vinthu vinandi, . . . nga ni maji, netiweki, na mendero vikaŵa kuti vyatimbanizgika. . . . Unkhungu na kulasana vikaŵa waka palipose, chomenechomene nausiku. . . . Waliyose wakakhalanga waka panyumba, ndipo wakalombanga waka kuti mphanyi kwacha waka kwambura kwizako ŵankhungu.” Nangauli pakaŵa masuzgo ghose agha, ŵabali ŵakalutilira kuchita makora mwauzimu.

Mu 1982, ine na mfumu wane Heinz tikafika ku Kampala, msumba ukuru wa Uganda. Mu myezi yinkhondi yakwambilira tikakhalanga na mbumba ya Sam na Christina Waiswa lumoza na ŵana ŵawo ŵankhondi kweniso ŵana ŵanayi ŵa ŵachibali ŵawo. Kanandi mbumba yose ya Mubali na Mudumbu Waiswa yikalyanga kamoza pa zuŵa, kweni yikaŵa yakukhumbisiska kutigaŵirako vichoko ivyo yikaŵa navyo. Apo tikakhalanga na mbumba ya Waiswa, ine na mfumu wane Heinz tikasambira vinthu vinandi ivyo vikatovwira apo tikachitanga umishonale. Mwachiyelezgero, tikasambira kugwiliskira ntchito makora maji, mwakuti wamunthu ukagezanga maji ghachoko waka agho pamanyuma tikaghagwiliskirangaso ntchito ku vimbuzi. Mu 1983, ine na mfumu wane Heinz tikasanga nyumba yithu ku malo ghanyake agho ghakaŵako ghakuvikilirika ku Kampala.

Tikakondwanga chomene na uteŵeti withu. Nkhukumbuka kuti mu mwezi umoza pera tikagaŵira magazini ghakujumpha 4,000! Kweni chakukondweska chomene ni umo ŵanthu ŵakachitiranga na makani ghawemi. Ŵakamuchindikanga Chiuta ndipo ŵakakhumbanga chomene kudumbiskana vya Baibolo. Kanandi ine na mfumu wane Heinz tikaŵanga na masambiro gha Baibolo pakati pa 10 na 15 waliyose. Ndipo tikasambirako vinandi ku ŵasambiri ŵithu ŵa Baibolo. Mwachiyelezgero, tikakondwanga chomene na mzimu uwo ŵakalongoranga apo ŵakendanga wapasi kuluta na kuwera ku maungano sabata yiliyose, kweni ŵakaŵa ŵachimwemwe ndipo palije zuŵa ilo ŵakadandawurapo.

Mu 1985 na 1986, pakachitikaso nkhondo ziŵiri ku Uganda. Kanandi tikawonanga ŵana ŵanyamura futi zikuruzikuru, ndipo ŵakaŵagwiliskanga ntchito nga mbasilikari awo ŵakasechanga waliyose uyo wakwenda pa msewu. Panyengo izi, tikalombanga Yehova kuti watipe vinjeru mwakuti tigege vinthu ivyo vingaŵika umoyo withu pangozi apo tikupharazga. Ndipo Yehova wakazgoranga malurombo ghithu. Kanandi para takumana na munthu uyo ngwakunweka, tikaluwangako vyose ivyo vikatichitiskanga wofi.

Tikapharazgirangaso ŵanthu awo ŵafuma ku vyaru vinyake. Mwachiyelezgero, tikasangana na Murat na Dilbar Ibatullin, mbumba iyo yikafuma ku Tatarstan (Central Russia), ndipo tikamba kusambira nayo Baibolo. Murat wakaŵa dokotala. Mbumba iyi yikabatizika ndipo yichali kuteŵetera Yehova mwakugomezgeka m’paka sono. Kufuma apo, nkhasangana na mwanakazi munyake wa ku Ukraine zina lake Tatjana Vileyska, uyo wakaghanaghananga vya kujikoma. Pamanyuma pakuti Tatjana wabatizika, wakawelera kwake ku Ukraine ndipo wakamba kovwirapo pa mulimo wakung’anamura mabuku mu chiyowoyero cha ku Ukraine.a

KUTEŴETERA MU CHARU CHINYAKE

Mu 1991, apo ine na mfumu wane Heinz tikaŵa ku holide ku Austria, ofesi ya munthavi ya Austria yikatilembera kalata kutimanyiska vya uteŵeti uphya wa ku Bulgaria. Muwuso wa chikomyunizimu wati wamara ku Eastern Europe, mulimo wa Ŵakaboni ŵa Yehova ukazomerezgeka ku Bulgaria. Nga umo nangulongosolerapo kale, ine na mfumu wane Heinz tikalutapo na mabuku mwakubisirizga mu charu ichi apo mulimo withu ukaŵa wakukanizgika. Kweni sono tikatumizgika uku kuti tikapharazgenge.

Ŵabali ŵakatiphalira kuti tilute waka ku Bulgaria kwambura kuweleraso ku Uganda. Ntheura tikaweleraso yayi ku Uganda kuti tikatore katundu withu panji kulayirana na ŵabali na ŵadumbu. M’malo mwake, tikaluta ku Beteli ku Germany kukatora galimoto, na kuluta ku Bulgaria. Ŵakatituma ku kagulu ka ŵapharazgi pafupifupi 20 ku Sofia.

Tikakumanaso na masuzgo ghanandi ku Bulgaria. Chakwamba, tikachimanyanga makora yayi chiyowoyero. Kweniso pakaŵa waka mabuku ghaŵiri mu Chibugariya, la Unenesko Weneuwo Ukulongozgera ku Umoyo Wamuyirayira na Buku Lane la Nkhani za mu Baibolo. Ndipo chachitatu, chikaŵa chakusuzga kwambiska masambiro gha Baibolo. Nangauli pakaŵa masuzgo ghose agha, kweni kagulu kithu kakalutiliranga kuluta panthazi. Tchalitchi cha Orthodox chikati chawona, chikakondwa yayi na mulimo withu, ndipo apa ndipo pakambira masuzgo.

Mu 1994, Ŵakaboni ŵa Yehova ŵakafumiskika mu kawundura wa visopa vyakuzomerezgeka ndipo ŵakaŵawonanga nga nkhagulu kakugaluka. Ŵabali ŵanyake ŵakakakikanga. Ŵamutolamakani ŵakathandazganga mautesi ghakukhwaskana na ise, ŵakatenge Ŵakaboni ŵa Yehova ŵakukoma ŵana ŵawo pera yayi, kweni ŵakukhuŵilizgaso Ŵakaboni ŵanyawo kuti ŵajikomenge. Ntheura chikaŵa chakusuzga chomene kwa ine na mfumu wane Heinz kuti tipharazgenge. Kanandi tikasangananga na ŵanthu ŵakali awo ŵakatinenanga, kutichemera ŵapolisi, kweniso kutiswa na vinthu. Chikaŵa chakusuzga kuti mabuku ghithu ghanjire mu charu ichi, ndipo chikaŵaso chakusuzga kuti tichite renti malo ghakuchitirapo maungano. Nakuti ŵapolisi ŵakatimbanizga ungano withu unyake wa chigaŵa. Ine na mfumu wane Heinz tikaŵa tindazgoŵere umoyo wanthena. Ivi vikaŵa vyakupambana chomene na umo ŵanthu ŵakaŵira ku Uganda! Kasi ntchivichi chikatovwira kuti tilutilire kuŵa ŵakukondwa na uteŵeti?

Kuchezga na ŵabali na ŵadumbu, ndiko kukatovwira chomene. Iwo ŵakakondwanga kuti ŵakasanga unenesko ndipo ŵakawonganga chomene wovwiri uwo tikaŵapanga. Tose tikakolerananga na kovwirana yumoza na munyake. Ine na mfumu wane Heinz tikasambira kuti tingaŵa ŵakukondwa pa uteŵeti uliwose uwo tikuchita, chikuru tikulutilira kughanaghanira ŵanji m’malo mwa masuzgo ghithu.

Ndipouli, nyengo yati yajumphapo vinthu vikamba kuŵako makora. Mu 1998, gulu lithu likazomerezgekaso na boma, ndipo mabuku ghithu ghanandi ghakamba kusangika mu Chibugariya. Kufuma apo, mu 2004 tikapatulira ofesi ya munthavi yiphya. Pasono ku Bulgaria kuli mipingo 57 na ŵapharazgi 2,953. Mu chaka chamara cha uteŵeti, ŵanthu 6,475 ŵakiza pa Chikumbusko. Nangauli nyengo yinyake kumasinda uku, ku Sofia kukaŵa waka ŵadumbu ŵankhondi pera, kweni pasono kuli mipingo 9! Tikajiwonera tekha kufiskika kwa uchimi wakuti “muchoko chomene wazamuŵa chikwi.”—Yes. 60:22.

KUZIZIPIZGA MASUZGO GHANYAKE

Pa umoyo wane, nasangikapo na masuzgo ghanandi gha muthupi. Kanandi waka madokotala ghanisangapo na vyakutupa, kusazgapo chinyake icho chikaŵa ku wongo. Ŵakanipa wovwiri wakuti vyakutupa ivi viwelere, kweniso nkhaluta ku India uko ŵakanichita opareshoni iyo yikatora maora 12. Pamanyuma pa opareshoni iyi, tikakhala dankha ku ofesi ya munthavi ya India, ndipo nkhati naŵako makora tikawelera ku uteŵeti withu ku Bulgaria.

Nyengo yichoko waka yati yajumphapo, mfumu wane Heinz wakamba kulwara nthenda yinyake yakuchemeka Huntington. Wakasuzgikiranga pakwenda, kuyowoya, kweniso thupi lake likamba kunjenjemera waka lekha. Apo nthenda iyi yikalutanga munthazi, wakakhumbikwiranga chomene wovwiri wane. Nyengo zinyake nkhavukanga chomene ndipo nkhafipanga chomene mtima na umo vinthu viŵirenge. Ndipouli, mubali munyake muwukirano zina lake Bobi, kanandi wakamutoranga mfumu wane Heinz kuti ŵalutire lumoza kukapharazga. Bobi wakakhozgekanga soni yayi na umo mfumu wane wakayowoyeranga panji chifukwa chakuti thupi lake likanjenjemeranga lekha. Nakuti nyengo zose Bobi wakaŵangapo kuti wamovwire mfumu wane Heinz para ine natangwanika na vinthu vinyake. Nangauli ine na mfumu wane tikasankha kuleka kuŵa na ŵana mu charu ichi, kweni tikawona kuti Yehova wakatipa Bobi uyo wakaŵa nga ni mwana waka withu!—Mrk. 10:​29, 30.

Mfumu wane Heinz wakaŵaso na kansa. Chachitima ntchakuti mfumu wane wakutemweka wakatayika mu 2015. Nkhamba kumusoŵa chomene mfumu wane chifukwa ndiyo wakanovwiranga kuti nileke kwenjerwa chomene, ndipo nkhapulikiska yayi kuti wafwa nadi. Kweni mu maghanoghano ghane, wachali wamoyo! (Luka 20:38) Kanandi nkhukumbuka mazgu ghake ghalusungu na ulongozgi uwemi uwo wakanipanga. Nkhuwonga chomene chifukwa cha kuteŵetera nayo lumoza kwa vyaka vinandi chomene.

NKHUWONGA YEHOVA CHIFUKWA CHA WOVWIRI WAKE

Yehova wanovwira pa masuzgo ghane ghose. Iyo wakanovwiraso kuti nileke kuŵa wasoni kweniso paumaliro na kuŵa mishonale uyo wakutemwa chomene ŵanthu. (2 Tim. 1:7) Kweniso nkhumuwonga Yehova chifukwa chakuti ine na munung’una wane pasono tose tikuchita uteŵeti wanyengozose. Pasono iyo na mfumu wake ŵakwendera dera ku chigaŵa cha Serbia ku Europe. Yehova wakazgora malurombo gha adada agho ŵakalomba vyaka vinandi kumasinda!

Kusambira Baibolo kukunovwira kuŵa na mtende wa mu mtima. Mu nyengo zakusuzga izi, nasambira kulomba ‘mwakufwilirapo chomene,’ nga umo Yesu wakachitira. (Luka 22:44) Nthowa yimoza iyo malurombo ghane ghakuzgorekera, nkhwizira mu ŵabali na ŵadumbu ŵa mu mpingo wane ku Nadezhda, Sofia, awo ŵakunilongora chitemwa kweniso lusungu. Kanandi ŵakunichema kuti tikachezgere lumoza na kulongora kuti ŵakunitemwa, ndipo ivi vikunovwira kuti niŵenge wachimwemwe.

Kanandi nkhughanaghanirapo nkhani ya chiwuka. Mu maghanoghano, nkhujiwona kuti nili mu Paradiso, nkhuwona ŵapapi ŵane panthazi pa nyumba yithu, ŵakuwoneka ŵachinyamata nga umo ŵakaŵira apo ŵakatorananga. Nkhuwona munung’una wane wakunozga chakurya. Nkhuwonaso mfumu wane Heinz wimilira pafupi na hachi lake. Kughanaghanira vinthu ivi kukunovwira kuti niŵe wachimwemwe kweniso kuzizipizga na kumuwonga chomene Yehova.

Para nkhughanaghanira umo umoyo wane waŵira kweniso para nkhulaŵiska kunthazi, na mtima wose nkhukolerana na mazgu gha Davide gha pa Salimo 27:​13, 14 ghakuti: “Kasi mphanyi nili nkhu niŵavyenge chipulikano chakuti niwonenge uwemi wa Yehova mu charu cha ŵamoyo? Gomezga Yehova. Uŵe wakukhwima na wakukhora mu mtima. Nadi, gomezga Yehova.”