IVYO ŴACHINYAMATA ŴAKUFUMBA
Kuŵa Pachibwezi—Chigaŵa 3: Kasi Chimare Waka?
Mwaŵa pachibwezi kwakanyengo, ndipouli pasono mwamba kukayika. Mukumanya makora yayi usange mukwenera kulutilira panji kumazga waka chibwezi. Nkhani iyi yimovwiraninge umo mungachitira.
Ivyo vili mu nkhani iyi
Umo mungachitira para mwamba kukayika
Pamanyuma pakuŵa pachibwezi kwa kanyengo, munyamata panji msungwana wangawona kuti mbakupambana chomene. Vinthu vili nga umo ŵakaghanaghaniranga yayi. Mwachiyerezgero:
Munyake wakutemwa chomene kuluta ku nyanja apo munyake wakutemwa kukwera mu mapiri.
Munyake wakutemwa vyakuyowoya apo munyake wakuvitemwa yayi.
Munyake wakutemwa kuchita vinthu mwaukhuluku apo munyake nyengozose wakuchita vinthu mwaunenesko.
Mungawona kuti vyakuchitika ivi ni vyakupambana. Chakwamba nkhani yagona pakutemwa vinthu vyakupambana, chachiŵiri nkharo ni zakupambana, ndipo chachitatu vyakuchita ni vyakupammbana.
Fundo yakuti mughaghanirepo: Kasi pa vyakuchitika vitatu ivi ni ntchi icho mukuwona kuti chingaŵa chakusuzga chomene kwa imwe para mungatorana? Ni ntchi pa vyakuchitika ivi icho mukuwona kuti mose mungasintha?
Mfumu na muwoli ŵangapambana vyakuchita na ivyo ŵakutemwa, ndipouli ŵangaŵa ŵakukondwa mu nthengwa. Nakuti kuŵa ŵakukolerana kukuthemba pakuŵa ŵakuyana pera yayi. Pakuŵa vinyake ivyo mfumu panji muwoli wangamba kuvitemwa chifukwa cha munyake wa munthengwa.a
Ndipouli ntchakuzirwa chomene kutorana na munthu uyo wakuzirwiska vinthu ivyo mukuwona kuti ni vyakuzirwa. Ivi vingaŵa vinthu nga ni vigomezgo vya chisopa, nkharo kweniso ivyo mukugomezga pa nkhani ya chiwemi na chiheni. Para mukupambana chomene pa nkhani iyi mbwenu mukwenera kugonthapo.
Mwachiyerezgero, ghanaghanirani vyakupambana pa nkhani ya vigomezgo vyachisopa. Buku la Fighting for Your Marriage likuti: “Kafukufuku wakulongora kuti ŵakutorana awo ŵakupambana ivyo ŵakugomezga pa nkhani ya chisopa ŵakuŵa pangozi yakuti nthengwa yawo yingamara.”
Fundo ya mu Baibolo: “Mungakakikanga mu joko pamoza na ŵambura kugomezga yayi. Pakuti urunji ukukolerana wuli na kwananga?”—2 Ŵakorinte 6:14.
Kupanga chakusankha
Baibolo likuti awo ŵanjira mu nthengwa “ŵaŵenge na suzgo mu thupi lawo.” (1 Ŵakorinte 7:28) Ntheura kuzizwa yayi usange mukusangana na masuzgo uku muchali pachibwezi.
Kupambana maghanoghano pachoko waka, uku muli pachibwezi chikung’anamura kuti mbwenu vyamutondani yayi. Fumbo ilo mungajifumba ndakuti, kasi tingamazga wuli suzgo ilo lilipo mwamtende? Mose mwaŵaŵiri mwamukhumbikwira kuchita vinthu mwamtende para mwazakatorana.
Fundo ya mu Baibolo: “Muchitiranenge lusungu, ndipo muŵe na mtima wa chiwuravi, mugowokeranenge na mtima wose.”—Ŵaefeso 4:32.
Ndipouli, kupambana maghanoghano pafupafupi panji kupambana pa nkhani yinyake yikuru kungalongora kuti ndimwe ŵambura kwenelera kutorana. Para ndimo viliri ntchiwemi kuchitapo kanthu mwaluŵiro pambere mundatorane.
Kupambana maghanoghano kaŵikaŵiri panji kupambana nkhani yikuru kungalongora kuti mukwenera yayi kutorana
Fundo yikuru: Usange uyo muli nayo pachibwezi ngwakukayikiska chomene panjiso usange imwe mwaŵene mukuwona kuti mundanozgeke kunjira mu nthengwa mbwenu chitanipo kanthu kusulako waka yayi.
Fundo ya mu Baibolo: “Munthu wakuchenjera wakuwona ulwani na kubisama, kweni muzeleza wakujendera bweka ndipo wakupwetekeka.”—Zintharika 22:3.
Para mwasankha kuti chimare waka
Kumara kwa chibwezi kungaŵa kwakuŵinya. Ndipouli, usange yumoza panji mose mwaŵaŵiri mukuwona kuti masuzgo ghakukata yayi, vingaŵa makora kuti mbwenu chimare waka.
Kasi mungachita wuli? Vingaŵa makora kuti mukadumbirane maso na maso kuluska kulemba waka imelu panji meseji pa foni. Mungachita makora kusankha nyengo na malo ghawemi ghakuti mukadumbiskirane nkhani iyi.
Fundo ya mu Baibolo: “Yowoyani unenesko kwa yumoza na munyake.”—Zekariya 8:16.
Kasi para chibwezi chamara ndikuti ndimwe munthu wakutondeka? Ndimo viliri yayi. Kuluwa yayi chilato cha chibwezi nkhumovwirani kupanga chakusankha chakuti mutorane panji yayi. Nanga vingaŵa kuti chibwezi chamara nipera mungasambirapo vinyake pa ivyo vikachitika.
Jifumbani kuti: ‘Kasi chilipo icho ine nasambirapo apo nanguŵa pachibwezi? Kasi pa ivyo vyachitika chilipo chinyake icho nasambira kuti nkhwenera kusintha pambere nindanjire mu nthengwa? Kasi ningachita vichi mwakupambanako na ivyo nkhachita pakwamba para ningasankhaso kuŵa pachibwezi?’
a Kuti mupulikiske umo masuzgo agha ghangakhwaskira mfumu panji muwoli, wonani nkhani yakuti, “Vyakovwira Mabanja—Umo Mungachitira Para Mukupambana Vyakuchita” na yakuti “Vyakovwira Mabanja—Nthowa Yiwemi Yakuwonera Tunthu Uto Tukumukhuŵazgani.”