Kasi Charu Chili Pafupi Kumara? Kasi Mazgu Ghakuti Chivumbuzi Ghakung’anamura Vichi?
Kasi ntchivichi chikwiza mu maghanoghano ghinu para mwapulika mazgu ghakuti “chivumbuzi”? Mungaghanaghana vya soka likuru la pa charu chose, panji ilo lingakoma chamoyo chilichose pa charu. Ŵanyake ŵakughanaghana kuti sonosono apa charu chapasi chisanganenge na soka ili, ŵakughanaghana nthena chifukwa cha kuŵazga malipoti nga ni agho ghali pasi apa:
“Vikulongora kuti vingachitika kuti kwambe nkhondo ya nyukiliya. Yingamba mwakuchita kukhumba, mwangozi, panji chifukwa cha kupambana maghanoghano.”—Bulletin of the Atomic Scientists.
“Mu vyaka 10 ivyo vyajumpha kwachitika masoka ghanandi ghakofya chomene, nga ni kubuka kwa moto mu nkhorongo, chilangalanga, kunangika kwa vyamoyo vya mu maji, kotcha chomene kwa charu na kututuka kwa maji.”—National Geographic.
“Viwuru vya zombe ni vinandi chomene ku Africa ndipo vyasakaza chomene vinthu kuluska vyaka vinandi ivyo vyajumpha.”—The Associated Press.
Kasi charu chizamuparanyika? Kasi Baibolo likuyowoya vichi?
Kasi charu icho tikukhalapo chizamumara?
Yayi. Mazgu gha Chiuta, Baibolo, ghakutisimikizgira kuti charu chikhalilirenge muyirayira. (Mupharazgi 1:4) M’malo mwa kuparanya charu icho wakalenga, Chiuta ‘wazamuparanya awo ŵakunanga charu chapasi’.—Chivumbuzi 11:18.
Kasi charu chili pafupi kumara?
Kuyana na ivyo Baibolo likuyowoya, “charu” icho chizamuparanyika, ni ŵanthu awo ŵakulondezga yayi fundo za Chiuta ndipo ŵakuchita waka chilichose icho ŵakukhumba. Nga ni umo Chiuta wakachitira mu nyengo ya Nowa, sono napo waparanyenge charu cha “ŵanthu ŵambura kopa Chiuta.”—2 Petrosi 2:5; 3:7.
Pa 1 Yohane 2:17 pakuti, “charu na makhumbiro ghake vikuluta.” Vesi ili likulongora kuti Chiuta wazamuparanya charu icho tikukhalapo yayi, kweni ŵanthu awo ŵakulutilira kuchita vinthu viheni.
Kasi umaliro wizenge pawuli?
Baibolo likuyowoya mwakudunjika yayi apo umaliro wizirenge. (Mateyu 24:36) Ndipouli, likulongora kuti umaliro uli pafupi chomene. Baibolo likayowoyerathu vinthu vyakulondezgapo ivi:
Vinthu nga ni nkhondo, kusoŵa kwa chakurya, miliri, na vindindindi vyankhongono vizamuŵa “mu malo na malo.”—Mateyu 24:3, 7, 14; Luka 21:10, 11; Chivumbuzi 6:1-8.
Ŵanthu ŵazamujighanaghaniranga waka ŵekha. Mwachiyelezgero, ŵazamuŵa “ŵakutemwa ndalama,” “ŵambura kuwonga,” na “ŵambura kujikora.”—2 Timote 3:1-5.
Ŵanthu ŵanandi ŵakuzomerezga kuti kwamba mu chaka cha 1914, vinthu pa charu vikamba kuchitika mwakukolerana na ivyo Baibolo likayowoyerathu kuti vizamuŵa vimanyikwiro vyakuti charu chili pafupi kumara. Kuti mumanye vinandi wonani nkhani yakuti “Kasi Baibolo Likuti Wuli pa nkhani ya Chaka Cha 1914?” na yakuti “Kasi Chimanyikwiro cha “Mazuŵa Ghaumaliro” Panji Kuti “Nyengo Zaumaliro” Ntchivichi?”
Kasi Baibolo likung’anamura vichi para likuyowoya vya “chivumbuzi?”
Mu Chigiriki chakwambilira mazgu agho mu Baibolo ghali kung’anamulika kuti “Chivumbuzi” chomene ghakung’anamura “kuvumbura” panji “kubenura.” Kanandi lizgu ili likuyowoya vya kuvumbura nkhani iyo njachisisi. Baibolo likuyowoyaso vya ‘kuvumbukwa kwa Fumu Yesu,’ uko kuzamuchitika apo Yesu wazamulongora kuti wali na nkhongono zakuwuskirapo uheni uwo ukuchitika pa charu, na kupeleka njombe ku awo ŵakusopa Chiuta.—2 Ŵatesalonika 1:6, 7; 1 Petrosi 1:7, 13.
Buku laumaliro la mu Baibolo likumanyikwa na zina lakuti A·po·kaʹly·psis, panji kuti Chivumbuzi, chifukwa likuvumbura za vinthu ivyo vizamuchitika nadi kunthazi. (Chivumbuzi 1:1) Buku ili lili na uthenga uwemi kweniso wakupa chigomezgo. (Chivumbuzi 1:3) Likulongora kuti Chiuta wazamuwuskapo vinthu vyose vyambura urunji na kuzgora charu kuŵa paradiso. Panyengo iyo, ŵanthu ŵazamupulikaso vyakuŵinya yayi, kusuzgika, panji kufwa.—Chivumbuzi 21:3, 4.
Kasi mungatemwa kuti mumanye vinandi vya malayizgo ghakukondweska gha mu Baibolo? Ŵakaboni ŵa Yehova ŵakusambizga ŵanthu Baibolo kwambura kulipiliska ndipo ŵangamovwirani. Mungachita makora kuyowoya nawo.