Kasi Munthu Wangaleka Kuŵa Kaboni wa Yehova?

Enya. Pali nthowa ziŵiri izo munthu wangachita:

• Wangapempha. Munthu wangayowoya yekha kuti wakukhumbaso yayi kuŵa Kaboni wa Yehova panji wangalemba kalata.

• Nkharo yake. Ivyo munthu wangachita vingapangiska kuti waleke kuŵa Kaboni wa Yehova. (1 Petrosi 5:9) Mwachiyelezgero, wangamba kusopa ku chisopa chinyake ndipo wayowoya kuti wafumengemo yayi.—1 Yohane 2:19.

Kasi para munthu waleka kupharazga na kusopa namwe ndikuti wafuma mu chisopa chinu?

Yayi, ni nthena yayi. Kufuma panji kuleka kuŵa Kaboni wa Yehova vikupambana chomene na kulopwa waka. Kanandi ŵanthu awo ŵaleka kupharazga panji kusopa nase ŵakuŵa kuti ŵakhuŵara waka, kweni ŵachali Ŵakaboni ŵa Yehova. Ntheura m’malo mwa kuŵakana, tikuŵakhozga na kuŵawovwira. (1 Ŵatesalonika 5:14; Yuda 22) Para munthu walopwa, ŵalara ndiwo ŵakumovwira mwauzimu.—Ŵagalatiya 6:1; 1 Petrosi 5:1-3.

Kweni ŵalara ŵakuchichizga munthu yayi kuti walutilire kuŵa Kaboni wa Yehova. Munthu waliyose wakusankha yekha chisopa icho wakukhumba. (Joshuwa 24:15) Tikugomezga kuti waliyose wakwenera kusopa Chiuta kufumira pasi pa mtima.—Salimo 110:3; Mateyu 22:37.