Kasi Mukumwemwetera?

KASI mukuchita wuli para munthu wamuwonani na kwamba kumwemwetera? Namwe mukwamba kumwemwetera. Nadi, para munthu wamuwonani na kwamba kumwemwetera, kwali mwamumanya panji yayi, namwe mukumwemwetera. Mwanakazi munyake zina lake Magdalena wakati: “Apo mfumu wane Georg wakaŵa wamoyo, wakatemwanga kunimwemwetera. Para talaŵiskana waka, nkhakondwanga ndipo nkhajipulikanga kuti nili wakuvikilirika.”

Para munthu wakumwemwetera kufuma pasi pa mtima, vikulongora kuti wakukondwa nase. Magazini yinyake yikati: ‘Mwakawiro, taŵanthu tikumwemwetera.” Nanga ni ŵana awo ŵababika waka para ŵawona chisko chithu, ŵakumanya usange takwiya panji yayi. Munthu wakumwemwetera kuti walongore umo wakujipulikira, kweniso kuti walongore wunthu wake.’a

Kafukufuku munyake uyo wakachitika pa Harvard University ya ku United States wakalongora umo ŵalwari ŵakajipulikiranga para munthu ŵamwemwetera. Awo ŵakachita kafukufuku uyu ŵakati: ‘Para awo ŵakapweleleranga ŵalwari aŵa ŵakaŵalongoranga lusungu na kuŵamwemwetera,’ ŵalwari ŵakajipulikanga makora chomene. Kweni para awo ŵakaŵapweleleranga ŵaleka kuyowoyeskana nawo na kuŵamwemwetera, ŵalwari ŵakajipulikanga makora yayi ndipo ŵakasuzgikanga maghanoghano.

Kumwemwetera kukovwiraso kuti thupi linu liŵe makora. Kafukufuku munyake wakalongora kuti munthu uyo wakumwemwetera wakuŵa wakukondwa, wachikanga ndipo wakusuzgika bweka yayi maghanoghano. Kweni kuleka kumwemwetera, kungapangiska kuti thupi lileke kwenda makora.

KUMWEMWETERA “KUKANOVWIRA KUTI NIŴE WAKUKONDWA NA WACHIKANGA”

Magdalena uyo tamuzunura mu ndime za pachanya apa, wakaŵa Kaboni ŵa Yehova mu nyengo ya Nkhondo Yachiŵiri ya Charu Chose. Iyo pamoza na ŵabali ŵake ŵakatumizgika ku msasa wakuyuzgirako ŵanthu ku Ravensbrück ku Germany chifukwa cha kukana kunjira ndyali. Iyo wakati: “Nyengo zinyake ŵakatikanizganga kuyowoyeskana na ŵakayidi ŵanyithu. Kweni tikaŵa na wanangwa wakumwemweterana. Nakuti para nawona waka amama na mudumbu wane ŵakumwemwetera, ine nkhongono zikakweranga ndipo nkhaŵanga na chikanga na kulutilira kuzizipizga.”

Panyake mukusangana na masuzgo ghanyake agho ghakumupangiskani kuti muleke kumwemwetera. Kweni manyani ichi, kuti munthu waŵe wakukondwa vikuthemba pa ivyo wakughanaghana. (Zintharika 15:15; Ŵafilipi 4:8, 9) Ntheura nyengo zose mukwenera kuyezgayezga kuti muŵenge na maghanoghano ghakwenelera na kuŵa wakukondwa.b Kuŵazga Baibolo na kulomba kwa Yehova vyawovwira ŵanthu ŵanandi kuŵa ŵakukondwa. (Mateyu 5:3; Ŵafilipi 4:6, 7) Nakuti mazgu ghakuti ‘kukondwa’ na ‘chimwemwe’ ghakusangika kanandi waka mu Baibolo. Ntheura mukwenera kupatura nyengo kuti muŵazgenge Baibolo. Namwe lingamovwirani kuti muŵe ŵakukondwa na kulutilira kumwemwetera.

Ntheura kulindilira waka kuti ŵanyinu ndiwo ŵamumwemweteraninge yayi. Yambanipo ndimwe, ndipo woneseskani kuti mukumwemwetera zuŵa lililose. Nyengo zose muwonenge kuti kumwemwetera ntchawanangwa icho chingawovwira imwe na ŵanyinu wuwo kuŵa ŵakukondwa.