Mayere na Ufwiti Nviheni

Satana wakukhumba kuti imwe mucitenge mayere. Ŵantu ŵanandi ŵakusopa ŵapapi ŵawo ŵakufwa ŵamwaka panji mizimu kuti ŵajivikilire iwoŵene ku maurwani. Iwo ŵakucita ivi cifukwa ŵakopa nkongono za ku caru ca mizimu. Iwo ŵakuvwara mpete za mayere panji makhoza. Ŵakumwa panji kuphakara pa mathupi ghawo “munkwala” weneuwo ŵakuwughanaghanira kuti wuli na nkongono ya mayere. Ŵantu ŵanyake ŵakubisa mu nyumba zawo panji kujimira pasi munkwala weneuwo ŵakugomezga kuti wuli na nkongono za kuŵavikilira. Ŵanji ŵakugwiriskira ncito “munkwala” wa mayere cifukwa ŵakugomezga kuti bizinesi yawo yingaŵa yacandulo, ndiposo kuti ŵakwere vilingwa vya ku sukulu, panji kufikira mwanakazi panji mwanarumi.

Cirwero cinu ciweme cakumuvikilirani kwa Satana ndico kuŵa pa ubwezi na Yehova. Yehova Ciuta na ŵangelo ŵake ŵali na nkongono zikuru kuruska Satana na viŵanda vyake. (Yakobe 2:19; Civumbuzi 12:9) Yehova ngwakunweka kurongora nkongono zake kwa mabwezi ghake—gheneagho ngakugomezgeka comene kwa iye.—2 Midauko 16:9.

Mazgu gha Ciuta ghakuyowoya kuti: “mungacitanga munkwala wa uryarya [cara.]” Yehova wakutinka mayere na ufwiti cifukwa maluso agha ghanganjizga muntu mu nkongono za Satana Diabolosi.—Leviticus 19:26.