Mweneumo Ncito Yikwendera mu Gulu Lawo la Pacaru Cose

PALI ntowa zakupambana-pambana izo zikugwiriskirika ncito pakurongozga ncito yakucitira ukaboni mu vyaru vyakujumpa 230 umo ncito iyi yikucitika. Urongozgi wose wukufumira ku Wupu Wakurongozga uwo wuli ku cinyina ca pacaru cose ku Brooklyn, New York. Wupu Wakurongozga uwu wukutumizga ŵimiliri cirimika cilicose kuruta ku vigaŵa vyakupambana-pambana pacaru cose capasi kuti ŵakadumbiskane na ŵimiliri ŵa mintavi ŵa mu vyaru ivyo. Pa mintavi iyi pakuŵa Makomiti gha Mintavi agho ghakuŵa na viŵaro vitatu panji vinkondi na viŵiri kuti gharongozge ncito mu vyaru ivyo vili pasi pa urongozgi wawo. Mintavi yinyake yili na makina ghakusindikizgira, ndipo yinyake yili na makina ghakusindikizgira ghankongono comene nkanira. Caru panji cigaŵa ico cikurongozgeka na muntavi cikugaŵika mu vigaŵa, ndipo vigaŵa ivi vikugaŵikaso kupanga madera. Dera lirilose liri na mipingo pafupifupi 20. Mlaŵiliri wa cigaŵa wakwendera madera agho ghali mu cigaŵa cake mwakuwerezgawerezga. Maungano gha dera ghaŵiri ghakucitika cirimika cilicose mu dera lirilose. Paliso mlaŵiliri wa dera, ndipo iye wakwendera mpingo wuliwose mu dera lake, wakucita nteura kaŵiri pa cirimika, ndipo wakovwira Ŵakaboni umo ŵangalinganizgikira pakugwira ncito yakupharazga mu cigaŵa ca mpingo wawo.

Mpingo uwo wuli kufupi na imwe pamoza na Nyumba yake ya Ufumu wuli na ncito yakumuphalirani makani ghaweme mu cikaya cinu. Vigaŵa vyose vya mpingo vikujamburika pa mapu na kugaŵika mu tuvigaŵa tucokotucoko. Tuvigaŵa utu tukugaŵirika kwa Kaboni waliyose uyo wakuyezgayezga kufikira ŵantu mu nyumba zawo mu cigaŵa ico na kudumbiskana nawo. Mu mpingo wuliwose, uwo wukuŵa na Ŵakaboni ŵakujumpa pa 200, wukuŵaso na ŵarara awo ŵakugaŵirika ncito zakupambana-pambana. Mupharazgi waliyose wa makani ghaweme ngwakuzirwa comene mu gulu la Ŵakaboni ŵa Yehova. Kaboni waliyose, kwali wakuteŵetera pa cinyina ca pacaru cose, kwali mpa mintavi, panji mu mipingo, nayeso payekha wali na ncito yakupharazga Ufumu wa Ciuta ku ŵanji.

Malipoti ghose gha ncito iyi paumaliro pake ghakutumizgika ku cinyina ca pacaru cose, ndipo Yearbook ya cirimika cilicose yikulembeka na kusindikizgika. Mwakusazgirapo, cirimika cilicose mu kope la magazini ya Gongwe la Mulinda ya January 1 mukuŵa ndondomeko ya malipoti agha. Vyakupharazga viŵiri ivi vikuŵa na malipoti ghose gha umo ncito yayendera mu cirimika cose yakucitira ukaboni Yehova na Ufumu wake kwizira mwa Kristu Yesu. Mu virimika vya sono-sono apa, Ŵakaboni pafupifupi 14,000,000 pamoza na ŵantu ŵakukondweskeka ŵakasangikapo pa Cikumbusko ca nyifwa ya Yesu ico cikucitika cirimika cilicose. Ŵakaboni ŵa Yehova ŵakugwiriskira ncito maora ghakujumpa pa 1,000,000,000 cirimika cilicose pakupharazga makani ghaweme, ndipo ŵantu ŵacasono ŵakujumpa pa 300,000 ŵakubapatizika. Mamiliyoni ghanandi gha Mabuku ghakugaŵirika.