Kukhuŵirizga kuŵazga Baibolo

CILATO cithu ncakuti tiwovwire muntu waliyose kuti waŵazge Mazgu gha Ciuta, Baibolo. Buku ili ndilo lufura lwa uthenga uwo tikupharazga, ndipo tikukhumba kuti ŵantu ŵagomezge kuti ivyo tikuyowoya kuti ni vithu yayi, kweni ni vyakufuma kwa Ciuta. Ŵantu ŵakwenera kuŵika cigomezgo cawo mu Baibolo.

Mu Uteŵeti wa m’Munda. Para mukunozgekera uteŵeti wa m’munda, nyengo zose mukwenera kusanka lemba limoza panji ghanandi ghakuti mukaŵazge lumoza na ŵantu awo ŵamurongora kukondweskeka. Nanga pangaŵa apo mukukhumba kumupharazgira muntu mwakudumura mwakugaŵira mabuku ghakurongosora za Baibolo, ncakuzirwa kuti muŵazge lemba lakwenelera lakufumira mu Baibolo. Baibolo liri na nkongono zikuru comene zakuti zirongozge ŵantu ŵakuyana na mberere kuruska cintu cinyake cilicose ico tingayowoya. Para ncamacitiko yayi kuŵazga Baibolo, mungazunura waka mazgu gha lemba ilo mwate muŵazgenge. Mu virimika vya mu handiredi lakudanga, mipukutu ya Malemba yikaŵa yinandi yayi. Kweni ndipouli, Yesu na ŵapostole ŵake ŵakazunuranga comene mazgu gha mu Malemba. Ise nase tikwenera kuyezgayezga kuti tisungilire pamtima malemba na kughagwiriskira ncito apo mpakwenelera para tili mu uteŵeti wa m’munda, nyengo zinyake tingazunura waka ivyo lemba ilo likuyowoya.

Para mukuŵazga Baibolo, likolerani makora kuti mweneko nyumba wamurondezgani para mukuŵazga. Para mweneko nyumba wakumurondezgani uku wakuŵazga mu Baibolo lake, vingamukondweska comene ivyo waŵazga.

Ndipouli, mukwenera kumanya kuti ŵang’anamuli ŵa Baibolo ŵanyake ŵasinta Mazgu gha Ciuta. Mang’anamuliro yawo nyengo zinyake yakuyana yayi na umo likalembekera Baibolo pakwambilira peneco. Mabaibolo ghanandi agho ghang’anamulika sono mulije zina la Ciuta, ghatimbanizga mavesi umo ghakalembekera pakwambilira peneco pakuyowoya za ŵantu ŵakufwa, ndiposo ghakubisa ivyo Baibolo likuyowoya vyakukhwaskana na khumbo la Ciuta kurazga ku caru capasi. Kuti mumurongore muntu mazgu agho ghasintika, mukwenera kuyaniska fundo iyo mwaŵazga na Mabaibolo ghanyake panji yaniskani na Baibolo ilo likadanka kung’anamurika mu ciyowoyero cinu. Pa nkani zakupambana-pambana, buku la Kukambitsirana za m’Malemba likuyaniska Mabaibolo ghakupambana-pambana umo ghakurongosolera mazgu ghanji gha mavesi agho ghali na fundo zikuru ndiposo agho kanandi ghakugwiriskirika ncito. Muntu uyo wakutemwa unenesko wangakondweskeka comene na cimanyisko canteura ici.

Pa Maungano gha Mpingo. Waliyose wakwenera kukhuŵirizgika kuti wagwiriskirenge ncito Baibolo lake pa maungano gha mpingo. Ici cikuŵa na vyakufumapo viweme comene. Cikovwira ŵategherezgi kuti maghanoghano ghawo ghaŵe pa ivyo vikuyowoyeka. Mwakusazgirapo, cikupangiska ŵategherezgi kukumbukira urongozgi uwo muyowoyi wapereka. Kulwande linyake, kacitiro aka kakupangiska ŵakukondweskeka ŵapya kuti ŵamanye kuti vigomezgo vithu vyose nvyakuzikika nadi mu Baibolo.

Kuti ŵategherezgi ŵamurondezgani mu Mabaibolo ghawo para mukuŵazga Malemba, imwe mukwenera kuŵakhuŵirizga kucita nteura. Ŵapemphani kuti ŵaŵazgire namwe lumoza.

Ni ncito yinu imwe nga ni muyowoyi kuti musanke mavesi agho mukukhumba kuyarongosora panyengo iyo muŵazgirenge lumoza na ŵategherezgi ŵinu. Nciweme kuti muŵazge malemba agho ghakurongosora fundo zinu zikuru. Para nyengo yikuzomerezga, ŵazganiso ghanyake agho ghakukhozgera ivyo mukuyowoya.

Ncakukwanira yayi kuzunura waka lemba panji kupempa ŵategherezgi kuti ŵasange lemba ilo liŵazgikenge. Usange mwaŵazga lemba lakudanka na kuruta pa linyake pambere ŵategherezgi ŵinu ŵandalisange lakudanga, iwo ŵakugongoweskeka ndipo ŵakuleka kuŵazga Baibolo lawo. Ŵalaŵiskani. Para ŵanandi ŵalisanga, ŵazgani.

Ghanaghanirani ivyo mukukhumba kucita. Werezgani kuzunura lemba ilo mukukhumba kuŵazga, pumulirani ndipo pamanyuma pake ŵazgani. Para mwazunura lemba mwakupulikikwa makora, cikucepeska nyengo yikuru iyo yikutayika para ŵategherezgi ŵakuwulawura pakupenja lemba ilo mwanguzunura mwambura kupulikikwa makora. Nangauli mukucepeskako vyakuti muyowoye cifukwa cakupereka mwaŵi kuti ŵategherezgi ŵasange malemba agho mukuti muŵazge, kweni vyandulo ivyo ŵavisangenge viŵenge vikuru comene.