Kuyowoya Nkani Mwakuyana na Umo Mukuyowoyera na Ŵantu

KANANDI para ŵantu ŵakuyowoya na mabwezi ghawo ŵakuŵa ŵakufwatuka. Ŵakuyowoya mwakawiro kawo. Ŵanji ŵakuyowoya mwakufwatuka comene; peneapo ŵanji mbasoni comene. Nangauli pali mpambano iyi, kayowoyero kawo ka kawiro nkakukondweska.

Para mukukumana na mulendo, ncakwenelera yayi kuyowoya naye nga ni para mukumumanya kale. Ku madera ghanyake, kuyowoyeskana na mulendo kukwenera kucitika mwakuyana na mitheto ya ku malo agho. Pamanyuma pakupereka ncindi zakwenelera, mungayowoya naye mwakufwatuka.

Para mukuyowoya pa pulatifomu, pwerererani kayowoyero kinu. Kuyowoya mwambura ncindi kukuyuyura ungano Wacikristu na ivyo vikuyowoyeka pa ungano uwo. Mu viyowoyero vinyake, pali mazgu ghanyake agho ghakuzunurika para ukuyowoya na muntu uyo ni murara, musambizgi, murara wa boma, panji mupapi. (Wonani mazgu agho ghali kugwiriskirika ncito pa Milimo 7:2 na 13:16.) Paliso mazgu ghakupambana na agha, agho ghakugwiriskirika ncito para ukuyowoya na munyako wa mu ntengwa panji mubwezi wa pamtima. Kuyowoya pa pulatifomu kukukhumbikwira kuŵa wakufwatuka comene yayi, kukwenera kuŵa kwakupereka ncindi.

Kweniso pali vintu vinyake ivyo vingapangiska muntu kuti waŵe wakukakika pakuyowoya nkani yake. Cimoza mwa vintu ivi ni kalembero ka masentensi. Suzgo yikuŵapo para muyowoyi wakuyezgayezga kuti waŵazge mazgu ndendende nga ni umo ghalembekera pa pepala. Kanandi mazgu agho ghalembeka ghakupambana na ghakuyowoya. Mwanadi, muntu wakucita kafukufuku para wakunozgekera nkani yake mwakukolerana na umo nkani iyo wapika yiliri. Autilayini yakusindikizgika ndiyo yikuŵa citopoko ca nkani iyo. Kweni para mungayowoya fundo zinu mwakucita kuŵazga nga ni umo zalembekera pa autilayini, mbwenu kayowoyero kinu kapambanenge comene na umo mukuyowoyera nyengo zose pakudumbiskana na ŵantu. Kuti muyowoye nkani mwakuyana na umo mukuyowoyera nyengo zose, yowoyani fundo zinu mu mazgu ghinu ndipo tceŵani kuyowoya masentensi agho ghangamusuzgani kurongosora.

Cintu cinyake cakuzirwa ni kusinta sipidi ya kayowoyero. Para muyowoyi wangayowoya nkani mwakukakika, kayowoyero na sipidi ya mazgu ghake yikuŵa yimoza mu nkani yose. Kweni para tikuyowoyeskana, pakuŵa kupambana kwa sipidi ya kayowoyero na utali wa kupumulira uko tikupanga para tikuyowoya.

Mwanadi, para mukuyowoya pa wumba wukuru wa ŵantu, yowoyani nkani mwakukwezga nkongono ya mazgu, ndiposo yowoyani mwakuthukutera kuti ŵategherezgi ŵinu ŵaŵikeko khutu ku ivyo mukuyowoya.

Kuti mukayowoye umo mukuyowoyera na ŵantu mu uteŵeti, nyengo zose mukwenera kuyezgayezga kuti muyowoyenge makora. Ici kuti cikung’anamura kuti muŵe muntu wakusambira comene yayi. Kweni nciweme kuti mukuliske luso lwa kuyowoya makora lweneulo lupangiskenge ŵanji kuti ŵategherezgenge mwa ncindi ku ivyo mukuyowoya. Wonani usange mukukhumbikwira kugwilirapo ncito pa fundo zakurondezgapo izi para mukuyowoya nyengo zose.

1. Tceŵani kuyowoya mazgu agho ghakususkana na marango gha ciyowoyero cinu, panji kayowoyero ako kangapangiska ŵantu kumughanaghanirani kuti namwe nkaro yinu yikuyana na awo ŵakukana kurondezga vipimo vya Ciuta. Mwakuyana na urongozgi uwo wuli pa Ŵakolose 3:8, tceŵani kutuka panji kuyowoya vya muziro. Yowoyani mazgu agho ŵantu ŵakughagwiriskira ncito mazuŵa ghose. Mazgu ghanteura agho ngakuzgoŵereka, ndipo ni mazgu ghakuzomerezgeka kuyowoyeka.

2. Tceŵani kuwerezga-werezga mazgu ghamoza kuti muyowoye fundo zakupambana-pambana. Sambirani kugwiriskira ncito mazgu agho ghangalongosora makora fundo iyo mukuyowoya.

3. Tceŵani kuwerezga-werezga pakuzunura mazgu, ndipo mungacita nteura mwa kumanyirathu ivyo mukukhumba kuyowoya, ndipo pamanyuma pake yowoyani.

4. Tceŵani kubisa fundo ziweme mwakuyowoya mwakuzweta. Yezgayezgani kuti nyengo zose muyowoyenge fundo yakuzirwa mu sentensi yipusu.

5. Yowoyani mu ntowa yakurongora ncindi ku ŵanji.