Kasi Ntchivichi Chingawovwira Kuti Mbumba Yiŵe Yakukondwa?

IVYO BAIBOLO LIKUYOWOYA

“Ŵakukondwa ni awo ŵakupulika mazgu gha Chiuta na kughasungilira!”—Luka 11:28, Mang’anamuliro gha Charu Chiphya.

VYANDULO IVYO MUNGASANGA PARA MUNGACHITA IVYO VESI ILI LAYOWOYA

Chitemwa chanadi.—Ŵaefeso 5:28, 29

Ntchindi.—Ŵaefeso 5:33.

Chivikiliro.—Mariko 10:6-9.

KASI TINGAGOMEZGA NADI IVYO BAIBOLO LIKUYOWOYA?

Enya. Pali vifukwa vinandi, kweni tiyowoyengepo viŵiri:

• Chiuta ndiyo wakambiska mbumba. Baibolo likuti kwa Yehova ndiko “kukufuma mazina gha mbumba zose.” (Ŵaefeso 3:14, 15) Mazgu agha ghakung’anamura kuti Yehova ndiyo wakambiska mbumba. Kasi kumanya fundo iyi kuli na chandulo wuli?

  Usange mukurya chakurya chakunowa ndipo mukukhumba kumanya ivyo ŵathirako kuti chinowe nthena, kasi mungafumba njani? Ntchakumanyamanya kuti mufumbenge uyo waphika.

  Mwakuyana waka, kuti timanye ivyo vingawovwira kuti mbumba yiŵe yakukondwa, tikwenera kufumba Yehova, chifukwa ndiyo wakambiska mbumba.— Genizesi 2:18-24.

• Chiuta wakumupwelelerani. Mbumba zingachita makora kupenja ulongozgi wa Yehova mu Baibolo. Chifukwa wuli? “Chifukwa wakumupwelelerani.” (1 Petrosi 5:6, 7) Yehova wakutikhumbira viwemi, ndipo ulongozgi wake ngwakovwira nyengo zose!—Zintharika 3:5, 6; Yesaya 48:17, 18.