Cisisi Ico Tikukondwa Kucimanya

Kasi pali munthu munyake uyo wali kukuphalirapo cisisi?—a Baibolo likuyowoya za cisisi cinyake capadera ico cikucemeka ‘cisisi cakupatulika.’ Nchakupatulika cifukwa cikufuma kwa Ciuta. Nchisisi cifukwa ŵanthu ŵakacimanyanga yayi. Ŵangelo nawo ŵakakhumbanga kumanya vinandi vya cisisi ici. Kasi ungatemwa kucimanya cisisi ici?—

Kale comene, Ciuta wakalenga munthu wakwamba na muwoli wake. Ŵakacemekanga Adamu na Eva. Ciuta wakaŵapa munda wa Edeni kuti ŵakhalengemo. Munda uwu ukaŵa wakutowa comene. Adamu na Eva ŵapulikirenge Ciuta, mphanyi iwo na ŵana ŵawo ŵakazgora caru cose capasi kuŵa nga munda wa Edeni. Ŵakate ŵakhalenge mu Paradiso kwamuyirayira. Kweni kasi ukukumbuka ivyo Adamu na Eva ŵakacita?—

Mazuŵa ghano tikukhala mu paradiso yayi cifukwa Adamu na Eva ŵakakana kupulikira Ciuta. Kweni Ciuta wakati caru cose cizamuŵa cakutowa, ndipo waliyose wazamukhala mwakukondwa kwamuyirayira. Kasi wazamucita wuli ici? Kwa nyengo yitali, ŵanthu ŵakamanyanga yayi. Cikaŵa cisisi.

Apo Yesu wakaŵa pa caru capasi, wakasambizga ŵanthu za cisisi ici. Wakati cisisi ici ni Ufumu wa Ciuta. Yesu wakaphalira ŵanthu kuti ŵalombenge kuti Ufumu uwu wize. Uzamuzgora caru cose capasi kuŵa paradiso wakutowa.

Kasi wakondwa kumanya za cisisi ici?— Kumbuka kuti ŵanthu ŵekha awo ŵakupulikira Ciuta ndiwo ŵazamukhala mu Paradiso. Baibolo likutiphalira za ŵanthu ŵanandi awo ŵakapulikira Yehova. Kasi ungatemwa kuti uŵamanye ŵanthu aŵa?— Tiye tiwonepo ŵacoko waka. Tisambirengeso umo tingacitira nga ndiwo.