SAMBIRO 18

Kuyowoya Nkhani Iyo Yingasambizga Ŵategherezgi

1 Ŵakorinte 9:19-23

FUNDO YIKURU: Pangiskani ŵategherezgi ŵinu kughanaghanirapo pa ivyo mukuyowoya, kweniso kuti ŵajipulike kuti ŵasambira kanthu kanyake kachilendo.

Ghanaghanirani ivyo ŵategherezgi ŵinu ŵakuvimanya kale. M’malo mwa kuwerezga waka ivyo ŵategherezgi ŵinu ŵakuvimanya kale, yowoyani munthowa yakuti ŵawone nkhani yinu kuŵa yachilendo.

Yowoyani mwaluŵiro fundo izo ŵategherezgi ŵakuzimanya kale, kweni yowoyani mwapachokopachoko fundo zachilendo.
Fufuzani na kughanaghanirapo. Para mungafiska, gwiliskirani ntchito fundo zichokozichoko izo ŵategherezgi ŵakuzimanya kale kuti mulongosore fundo zikuru. Ghanaghanirani umo fundo yiliyose iyo mukuyowoya, yikukolerana na nkhani yinu yose.

Apo mukunozgekera nkhani yinu, jifumbani mafumbo nga ghakuti kasi namuyowoyachi, chifukwa wuli, pawuli, nkhu, kwa njani, kweniso munthowa wuli? Apo mukuyowoya nkhani yinu, fumbani na kuzgora mafumbo agha kuti yiŵe yakukondweska ku ŵategherezgi.
Longorani kuzirwa kwa uthenga winu. Longosorani umo fundo za mu Malemba zingawovwilira ŵategherezgi ŵinu pa umoyo wawo wa zuŵa na zuŵa. Zunurani umo vinthu viliri mu charu, umo ŵanthu ŵakuwonera vinthu, na vyakuchitika vinyake ivyo ni vyakwenelera ku ŵategherezgi ŵinu.