Kunweka na Ŵanthu

Ivyo Yesu Wakachita

VIDIYO: Yesu na Mwanakazi pa Chisimi

1. Wonelerani VIDIYO, panji ŵazgani Yohane 4:​6-9. Kufuma apo zgorani mafumbo ghakulondezgapo agha:

1. Kasi Yesu wakawonamo vichi mwa mwanakazi pambere wandambe kudumbiskana nayo?

2. Yesu wakati: “Nipako maji nimwe.” Chifukwa wuli mazgu agha ghakaŵa ghawemi kwambiskira chidumbirano?

Kasi Tikusambirako Vichi kwa Yesu?

2. Tingadumbiskana makora na munthu usange tingambiska nkhani iyo wanganweka nayo.

Yezgani Yesu

3. Muŵe ŵakunozgeka kusintha. Kungangamira kwambiska nkhani iyo imwe mwangunozgekera pera yayi. Yambani na ivyo ŵanthu ŵakughanaghana pa zuŵa ilo. Jifumbani kuti:

1. ‘Ni nkhani wuli izo zachitika mwasonosono?’

2. ‘Kasi awo nkhugwira nawo ntchito, awo nkhusambira nawo sukulu panji ŵazengezgani ŵane, ŵakutemwa kuyowoya vichi?’

4. Muwoneseskenge. Jifumbani kuti:

1. ‘Kasi nasanga munthu wakuchita vichi? Kasi wangaŵa kuti wakughanaghana vichi?’

2. ‘Kasi ivyo munthu wavwara, umo wakuwonekera panji nyumba yake vikuvumburachi za vigomezgo panji mutheto wake?’

3. ‘Kasi iyi ni nyengo yiwemi yakudumbiskana nayo?’

5. Mutegherezgenge.

1. Lekani kukhalira waka kuyowoya mwekha.

2. Mupani m’pata munthu kuti wayowoyepo maghanoghano ghake. Usange ntchakwenelera, mufumbani mafumbo.