Ivyo Vingatovwira Kuti Tiŵe Ŵaluso mu Uteŵeti—⁠Kwambiska Nkhani na Cilato Cakuti Tipharazgire Ŵanthu Para Mwaŵi Wasangika

Cifukwa Wuli Nkhwakuzirwa? Para tikupharazga kunyumba na nyumba, nyengo zinyake ŵanthu tikuŵasanga yayi. Kweni kanandi tikusangana nawo para tili paulendo, para tikulindilira dokotala, ku msika, panyengo ya kupumura ku nchito panji ku sukulu, na malo ghanyake. Yehova wakukhumba kuti ŵanthu aŵa ŵapulike uthenga wa Ufumu. (1 Tim. 2:3, 4) Kuti tiŵapharazgire, tikwenera kwamba ndise kudumbiskana nawo.

Umo Mungacitira:

Woneseskani usange wangategherezga. Kasi munthu uyo wakuwoneka waubwezi? Kasi wangatemwa kudumbiskana nayo? Kasi mungadumbiskana nayo makora? Ŵapharazgi ŵanyake ŵakumulaŵiska dankha uyo ŵakukhumba kumupharazgira na kumwemwetera. Usange nayo wamwemwetera, ŵakwamba kudumbiskana.
Lombani mu mtima usange mulije cikanga.—Neh. 2:4; Mil. 4:29.
Mungamba na kumutawuzga. Kuti Yesu wambe kudumbiskana na mwanakazi Musamariya, wakamba kuyowoya vya Ufumu yayi. (Yoh. 4:7) Nyengo zinyake mungamba na kumuwonga. Mungati: “Ŵana ŵinu ŵali na nkharo yiwemi comene!” Panji mungamba na kufumba fumbo. Mungamufumba kuti: “Kasi mukawonelera nkhani pa TV mayiro namise?”
Para mwamba kudumbiskana, penjani mpata kuti mumuphalireko vya mu Baibolo, kweni kucimbilira yayi. Ivyo mukudumbiskana ndivyo vipangiskenge kuti mwambe kumupharazgira. Mungayowoya nkhani iyo wangakopeka nayo na kumupangiska kuti wafumbe fumbo. Usange mukudumbiskana nkhani ya mbumba, mungayowoya kuti: “Nasanga ulongozgi unyake wakovwira pakulera ŵana.” Para mukudumbiskana nkhani yinyake iyo mukaŵazga mu nyuzipepara panji kuwonelera pa TV, mungayowoya kuti: “Sonosono apa nkhaŵazga nkhani yiwemi iyo yingawovwira kuti vinthu visinthe.” Kugongowa yayi para nkhani yamalira pa nthowa pambere mundamupharazgire.
Yeghani mathirakiti panji mabuku ghanyake agho mungagaŵira munthu uyo wakukhumba kumanya vinandi.

Yezgani Sacizgo Ili Mwezi Uno:

Sabata yiliyose yezgani kudumbiskana na munthu na cilato cakuti mumupharazgire para mwaŵi wasangika.