KUWELERAKO
SAMBIRO 8
Kuzikira
Fundo: “Chitemwa chikuzikira.”—1 Kor. 13:4.
Ivyo Yesu Wakachita
1. Wonelerani VIDIYO, panji ŵazgani Yohane 7:3-5 na 1 Ŵakorinte 15:3, 4, 7. Kufuma apo zgorani mafumbo ghakulondezgapo agha:
Kasi pakwamba ŵabali ŵa Yesu ŵakachita wuli ŵati ŵapulika uthenga wake?
Ntchivichi chikulongora kuti Yesu wakagongowa yayi kovwira Yakobe, mubali wake?
Kasi Tikusambirako Vichi kwa Yesu?
2. Tikwenera kuŵa ŵakuzikira chifukwa ŵanthu ŵanyake vikuŵatolera nyengo kuti ŵazomere uthenga uwemi.
Yezgani Yesu
3. Yezgani nthowa yinyake. Usange munthu wandazomere sambiro la Baibolo nyengo yeneyiyo, kumuchichizga yayi. Usange ntchakwenelera, gwiliskirani ntchito mavidiyo panji nkhani za mu mabuku ghithu kuti mumovwire kumanya umo sambiro la Baibolo likuchitikira kweniso umo wangasangira chandulo.
4. Lekani kumuyaniska na ŵanji. Munthu waliyose wakupambana na munyake. Usange mubali winu panji munthu munyake wakuchedwa kwamba kusambira Baibolo panji kugomezga ivyo Baibolo likusambizga, fufuzani kuti mumanye chifukwa chake. Kasi chisopa chake chili kumunjira chomene? Kasi ŵabali panji ŵazengezgani ŵake ŵakumususka? Mupani nyengo kuti waghanaghanirepo ivyo mwamuphalira na kuwona kuzirwa kwa ivyo Baibolo likuyowoya.
5. Mulomberani munthu wakunweka. Lombani Yehova kuti wamovwirani kuŵa na chigomezgo na kuchita vinthu mwamahara. Lombani Yehova kuti wamovwirani kumanya nyengo iyo mungalekera kuluta kwa munthu uyo ngwakunweka viŵi yayi.—1 Kor. 9:26.