Ŵa Maghanoghano Ghakwenelera Ŵakupulikira
“Wose awo [ŵakaŵa na maghanoghano ghakwenelera] umoyo wamuyirayira ŵakapulikana.”—MIL. 13:48.
1, 2. Kasi Ŵakhristu ŵakwambilira ŵakacita wuli na ucimi wa Yesu wakuti makani ghawemi gha Ufumu ghakwenera kupharazgika ku ŵanthu wose pa caru capasi?
BUKU la Milimo liri na nkhani yakukondweska iyo yikuyowoya umo Ŵakhristu ŵakwambilira ŵakacitira na ucimi wa Yesu wakuti makani ghawemi gha Ufumu ghakwenera kupharazgika ku ŵanthu wose pa caru capasi. (Mat. 24:14) Ŵapharazgi ŵamwamphu aŵa ŵakalongora ciyelezgero ciwemi ku wose awo ŵakaŵalondezga. Cifukwa cakuti ŵasambiri ŵa Yesu ŵakapharazganga mwamwamphu, ŵanthu vikwi vinandi mu Yerusalemu, kusazgapo na “mzinda ukuru wa ŵasofi,” ŵakanjira mu mpingo wakwambilira Wacikhristu.—Mil. 2:41; 4:4; 6:7.
2 Ŵamishonare ŵakwambilira ŵakawovwira ŵanthu ŵanandi kuzomera Cikhristu. Mwaciyelezgero, Filipu wakaluta ku Samariya, uko mizinda yikapulikizganga uthenga wake. (Mil. 8:5-8) Paulosi pamoza na ŵanyake ŵakupambanapambana, ŵakenda ku malo ghanandi, ŵakapharazga uthenga wa Cikhristu ku Kupuro, vigaŵa vinyake vya ku Asiya Minor, Makedoniya, Girisi, ndiposo ku Italy. Mu misumba iyo wakapharazganga, mizinda ya Ŵayuda na Ŵagiriki yikapulikana. (Mil. 14:1; 16:5; 17:4) Tito wakapharazga ku Krete. (Tito 1:5) Petrosi wakakhuka kupharazga ku Babulone, ndipo pa nyengo iyo wakalembanga kalata yake yakwamba, ca m’ma 62-64 C.E., mulimo wa kupharazga Cikhristu ukaŵa kuti ukumanyikwa makora mu Ponto, Galatiya, Kapadokiya, Asiya, na Bituniya. (1 Pet. 1:1; 5:13) Izi zikaŵa nyengo zakukondweska comene. Ŵakhristu aŵa ŵakapharazganga mwamwamphu comene mwakuti ŵalwani ŵawo ŵakayowoya kuti ‘ŵatimbanizga caru.’—Mil. 17:6; 28:22.
3. Ni vici ivyo vikucitika cifukwa ca ivyo ŵapharazgi ŵa Ufumu ŵakucita, ndipo imwe mukujipulika wuli?
3 Mazuŵa ghano napo, mpingo Wacikhristu ukukura mwakukondweska comene. Kasi mukukhozgeka yayi para mukuŵazga lipoti la pa cilimika ilo likuyowoya umo Ŵakaboni ŵa Yehova ŵakucitira pa caru cose? Kasi cikumukondweskani yayi kumanya kuti ŵapharazgi ŵa Ufumu ŵakasambizga Baibolo ŵanthu ŵakujumpa mamiliyoni ghankhondi na limoza mu cilimika ca uteŵeti ca 2007? Nakuti unandi wa ŵanthu awo ŵakiza pa Cikumbusko ca nyifwa ya Yesu Khristu cilimika camara ukulongora kuti pafupifupi ŵanthu mamiliyoni khumi awo ŵakiza, Mbakaboni ŵa Yehova yayi, kweni ŵakiza pa cakucitika capadera ici cifukwa ca kukondweskeka na makani ghawemi. Ici cikulongora kuti pacali mulimo ukuru wakuti ticite.
4. Kasi mbanjani awo ŵakupulikira uthenga wa Ufumu?
4 Mazuŵa ghano, nga umo vikaŵira mu nyengo ya Ŵakhristu ŵakwambilira, ‘wose awo ŵali na maghanoghano ghakwenelera umoyo wamuyirayira’ ŵakupulikira uthenga wa Ufumu. (Mil. 13:48) Yehova wakuŵaguzira ku gulu lake. (Ŵazgani Hagai 2:7.) Kuti tilutilire kukolerana comene pa mulimo wa vuna uwu, kasi uteŵeti wa Cikhristu tikwenera kuwuwona wuli?
Pharazgirani Munthu Waliyose
5. Kasi mbanthu ŵa mtundu wuli awo Yehova wakuŵatemwa?
5 Ŵakhristu ŵakwambilira ŵakapulikiska makora fundo yakuti “Ciuta ndi Mulumbacisko cara: kweni mu mitundu yose uyo wakumopa na kucita urunji ngwa mapokereko na Iyo.” (Mil. 10:34, 35) Kuti munthu waŵe paubwezi na Yehova wakwenera kuŵa na cipulikano mu sembe yakuwombora ya Yesu. (Yoh. 3:16, 36) Khumbo la Yehova ndakuti “ŵanthu wose ŵaponoskeke, na kufikapo pa kumanya unenesko.”—1 Tim. 2:3, 4.
6. Awo ŵakupharazga Ufumu ŵakwenera kulekaci, ndipo cifukwa wuli?
6 Cingaŵa ciwemi yayi usange awo ŵakupharazga makani ghawemi ŵakweruzgirathu ŵanthu cifukwa ca mtundu, kumanyikwa, kawonekero, cisopa cawo, panji vinthu vinyake ivyo vikuŵapambaniska na ŵanyawo. Ghanaghanirani fundo iyi: Asi ndimwe ŵakuwonga cifukwa cakuti munthu munyake wakamupharazgirani Malemba mwambura kutemwera? Mwantheura, mwalekeraci kupharazga uthenga wakuponoska umoyo ku munthu waliyose uyo wangawupulika?—Ŵazgani Mateyu 7:12.
7. Cifukwa wuli tikwenera cara kweruzga awo tikuŵapharazgira?
7 Yehova wali kwimika Yesu kuti wacite mulimo wa kweruzga, mwantheura, ise tilije mazaza ghakweruzgira munthu. Fundo iyi njakupulikikwa cifukwa ise tingeruzga kuyana na ‘kalaŵiskiro ka maso ghithu’ panji ivyo ‘tapulika waka mu makutu ghithu,’ apo Yesu pakweruzga wakusanda ivyo vili mu mtima wa munthu.—Yes. 11:1-5; 2 Tim. 4:1.
8, 9. (a) Kasi Saulosi wakaŵa munthu wa mtundu wuli pambere wandaŵe Mkhristu? (b) Kasi ivyo vikacitikira mpositole Paulosi vikutisambizgaci?
8 Ŵanthu ŵakupambanapambana ŵamba kuteŵetera Yehova. Ciyelezgero ciwemi ni Saulosi wa ku Tarso, uyo pamasinda pake wakaŵa mpositole Paulosi. Saulosi wakaŵa Mufarisi uyo wakacitiranga nkhaza comene Ŵakhristu. Cifukwa ca kughanaghana kuti mbakwananga, wakacitiranga nkhaza mpingo Wacikhristu. (Gal. 1:13) Mu kawonero ka wunthu, Saulosi wakaŵa ŵambura kwenelera kuŵa Mkhristu. Kweni Yesu wakawonamo kauwemi mu mtima wa Saulosi ndipo wakamusankha kuti wafiske mulimo wapadera. Ici cikacitiska kuti Saulosi waŵe yumoza wa Ŵakhristu ŵakwambilira awo ŵakaŵa na mwamphu comene mu mpingo.
9 Kasi ivyo vikacitikira mpositole Paulosi vikutisambizgaci? Mu cigaŵa cithu, mutepanji muli gulu la ŵanthu awo ŵakuwoneka kuti ŵakutemwa yayi uthenga withu. Nangauli nchakusuzga kugomezga kuti ŵanji ŵa iwo ŵangaŵa Ŵakhristu ŵaunenesko, kweni tikwenera cara kuleka kuŵapharazgira. Nyengo zinyake ŵanthu awo tikuŵawona kuti mbanonono mtima ŵakutegherezga makora uthenga withu. Mulimo withu ngwa kupharazgira ŵanthu wose ‘mwambura kuleka.’—Ŵazgani Milimo 5:42.
Vitumbiko Vikulindilira Awo Ŵakupharazga ‘Mwambura Kuleka’
10. Cifukwa wuli tikwenera cara kuleka kupharazgira ŵanthu awo ŵakuwoneka ŵakofya? Yowoyani ciyelezgero ca ku dera linu.
10 Kawonekero ka munthu kakupusika. Mwaciyelezgero, Ignacioa wakamba kusambizgika Baibolo na Ŵakaboni ŵa Yehova apo wakaŵa mu jere ku caru cinyake ca ku South America. Ŵanthu ŵakamophanga cifukwa cakuti wakaŵa wankhaza comene. Mwakuti ŵabwezi ŵake awo wakaŵa nawo mu jere, awo ŵakapanganga vinthu na kuguliska ku ŵanyawo, ŵakagwiliskiranga nchito Ignacio kuti waŵapokelenge luŵiro ngongoli kwa awo ŵakucedwa kupeleka. Kweni Ignacio wakati wamba kupulikiska ivyo wakasambiranga mu Baibolo na kuvilondezga, wakaleka nkhaza na kuŵa munthu walusungu. Palije uyo wakamutumangaso kukapoka ngongoli, nakuti Ignacio ngwakukhorwa kuti unenesko wa mu Baibolo ndiposo mzimu wa Ciuta vyasintha wunthu wake. Wakuwongaso kuti ŵapharazgi ŵa Ufumu awo ŵakafwilirapo kumusambizga ŵakaleka yayi kumupharazgira cifukwa ca kawonekero kake.
11. Cifukwa wuli tikulutilira kuwelerako ku ŵanthu?
11 Cifukwa cimoza ico tikulutilira nipera kuwelerako ku ŵanthu awo tikadumbiskanapo nawo kale makani ghawemi nchakuti mikhaliro na nkharo yawo vingasintha, ndipo mbunenesko, vikusintha nadi. Kufuma pa ulendo uwo tikalutako kaumaliro, ŵanji ŵangalwara comene, nchito yingaŵamalira, panji wakutemweka wawo wangapotera. (Ŵazgani Mupharazgi 9:11.) Vinthu ivyo vikucitika mu caru vingacitiska ŵanthu kughanaghanira za umoyo wawo wa munthazi. Vinthu vyanthena vingacitiska kuti munthu uyo wakaŵikangako mahara yayi ku uthenga withu wasinthe na kuwuzomera. Mwantheura, tikwenera yayi kuleka kupharazgira ŵanthu makani ghawemi para mpata wasangika.
12. Ni mwauli umo tikwenera kuwonera ŵanthu awo tikuŵapharazgira, ndipo cifukwa wuli?
12 Ŵanthu ŵali na cizgoŵi ca kutemwera ndiposo kweruzga ŵanyawo. Kweni Yehova wakusanda ivyo vili mukati mwa munthu waliyose. Wakuwonamo uwemi mu munthu waliyose. (Ŵazgani 1 Samuel 16:7.) Mu uteŵeti withu, nase tikwenera kufwilirapo kucita nthena. Vyakucitika vinandi vikulongora vyandulo ivyo vikuŵapo para tikuwona viwemi mu ŵanthu awo tikuŵapharazgira.
13, 14. (a) Cifukwa wuli mupayiniya munyake wakamusura mwanakazi uyo wakakumana nayo mu uteŵeti? (b) Kasi tingasambiraci ku cakucitika ici?
13 Apo Sandra, uyo ni mupayiniya, wakapharazganga ku nyumba na nyumba pa cirwa ca Caribbean, wakakumana na Ruth uyo wakatangwanika comene na ciphikiro ico kukucitika vinthu vyambura kwenelera. Kaŵiri kose, Ruth wakavwalikika mphumphu yakulongora kuti ndiyo wakaluska wose pa viphikiro ivi. Ruth wakanweka comene na ivyo Sandra wakamuphalira, mwantheura ŵakapangana kuti ŵambe kusambira Baibolo. Sandra wakukumbuka kuti: “Apo nkhanjira mu nyumba iyo wakakhalanga, nkhawona cithuzi cikuru ca Ruth ico wakajambuliska, uku wavwara vimaraya vya ku viphikiro ivi. Nkhawonaso nkhombo izo wakapika ku viphikiro ivi. Nkhaghanaghana mwakupuvya, cifukwa nkhatenge munthu wakutemwa viphikiro ivi wangalutilira yayi kusambira unenesko. Mwantheura, nkhaleka kumwendera.”
14 Pakati pajumpha nyengo, Ruth wakaluta ku Nyumba ya Ufumu. Maungano ghakati ghamara, wakafumba Sandra kuti, “Kasi uli kulekeraci kuzakanisambizga?” Sandra wakaphepiska ndipo ŵakapangana kuti ŵambeso sambiro. Ruth wakamba kucita makora comene mwauzimu, wakawuskamo mu nyumba vithuzi vyake ivyo wakajambuliska ku viphikiro ivi, ndipo wakajipatulira kwa Yehova. Pamasinda, Sandra wakawamo kuti ivyo wakaghanaghananga pakwamba vikaŵa vyambura kwenelera.
15, 16. (a) Kasi cikacitika nchivici apo mupharazgi munyake wakapharazgira mulamu wake? (b) Cifukwa wuli tikwenera cara kugongowa kupharazgira ŵabali ŵithu cifukwa ca vyakucita vyawo?
15 Ŵanji ŵasangaso vyandulo cifukwa ca kupharazgira ŵabali ŵawo awo Mbakaboni yayi, nanga nipara ŵakuwoneka kuti ŵangategherezga yayi. Wonani ciyelezgero ca Joyce, uyo ni mudumbu Wacikhristu wa ku United States. Mulamu wake wakakakikanga pafupipafupi kufuma waka pa uwukirano wake. Joyce wakuti: “Ŵanthu ŵakatenge umoyo wake ukaŵa wambura candulo, cifukwa wakagwiliskiranga nchito minkhwara yakuzweteska wongo, wakaŵa munkhungu, ndipo wakacitanga viheni vinandi. Nangauli wakacitanga nthena, nkhalutilira kumupharazgira unenesko wa mu Baibolo kwa vilimika 37.” Cifukwa cakuti Joyce wakazizipizga kovwira mulamu wake, paumaliro wakatumbikika cifukwa mulamu wake wakamba kusambizgika Baibolo na Ŵakaboni ŵa Yehova ndipo wakasintha mwakuzizika comene. Sonosono apa, mulamu wa Joyce, uyo wali na vilimika 50, wali kubapatizika pa ungano wa cigaŵa uwo ukacitikira ku California, ku U.S.A. Joyce wakuti: “Nkhaŵa na masozi ghacimwemwe. Ndine wakukondwa comene cifukwa nkhavuka yayi kumovwira.”
16 Mungaŵa kuti mukugongowa kupharazgira ŵabali ŵinu unenesko wa mu Baibolo cifukwa ca ivyo ŵakutemwa. Kweni Joyce wakagongowa yayi kupharazgira mulamu wake. Nakuti munthu wangamanya wuli ivyo vili mu mtima wa munyake? Mutepanji, wangaŵa kuti wakupenja cisopa caunenesko. Mwantheura, lekani kugongowa kumupharazgira para mwaŵi wasangika.—Ŵazgani Zintharika 3:27.
Buku Liwemi Lakusambizgira Baibolo
17, 18. (a) Kasi malipoti ghakufuma pa caru cose ghakulongora wuli uwemi wa buku la Kasi Baibolo Likusambizgaci Comenecomene? (b) Kasi nchakucitika wuli cakukhozga ico cili kumucitikiranipo cifukwa ca kugwiliskira nchito buku ili?
17 Malipoti gha pa caru cose ghakulongora kuti ŵanthu ŵanandi awo ŵakutemwa unenesko ŵakuzomera kusambira nawo Baibolo mwakugwiliskira nchito buku la Kasi Baibolo Likusambizgaci Comenecomene? Penni, mudumbu uyo ni mupayiniya ku United States, wakamba kusambira na ŵanthu ŵanandi mwakugwiliskira nchito buku ili. Ŵaŵiri mwa iwo, ŵakaŵa ŵanthu ŵalara awo ŵakatemwanga comene visopa vyawo. Penni wakamanya yayi umo ŵacitirenge na unenesko wa mu Malemba uwo ukuyowoyeka mu buku la Baibolo Likusambizgaci? Kweni wali kulemba kuti: “Cifukwa cakuti buku ili ndipusu, likuyowoya mwakupulikikwa makora, ndiposo mwambura kuzingilira, ŵakazomera kuti ivyo ŵakasambiranga ukaŵa unenesko, kwambura na kususka wuwo yayi, nesi kukanapo.”
18 Pat, uyo ni mupharazgi ku Britain, wakamba kusambizga Baibolo mwanakazi munyake uyo wakacimbira nkhondo kwawo ku Asiya. Mwanakazi uyu wakacicizgika kucimbira mu caru cake pamanyuma pakuti mfumu wake ndiposo ŵana ŵake ŵakoreka na ŵasilikari ŵakuwukira boma, ndipo wandaŵawoneso mpaka sono. Umoyo wake ukaŵa pangozi, nyumba yake yikawocheka, ndipo vigeŵenga vikagona nayo mwakucita kupokelerana. Vyose ivi vikamucitiska kuti wajiwonenge nga ngwambura nchito ndipo kanandi wakaghanaghananga kuti wajikome. Kweni wati wamba kusambira Baibolo, wakawovwirika kuŵa na cigomezgo. Pat wali kulemba kuti: “Buku la Baibolo Likusambizgaci? likulongosora vinthu mwambura kusuzga, ndiposo viyelezgero ivyo vilimo vikamovwira comene.” Musambiri uyu wakakura luŵiro mwauzimu, ndipo wakaŵa wakwenelera kuŵa mupharazgi wambura kubapatizika, ndipo wakalongora kuti wakukhumba kubapatizika pa ungano wadera wakulondezgapo. Para ŵanthu awo ŵakutemwa unenesko ŵapulikiska ivyo Malemba ghakuyowoya, cikupeleka cimwemwe cikuru comene.
‘Tingavukanga Cara Pakucita Uwemi’
19. Cifukwa wuli mulimo wa kupharazga ngwakukhumbikwa comene?
19 Apo nyengo yikusendelera, mulimo withu wa kupharazga na kovwira ŵanthu kuŵa ŵasambiri ngwakukhumbikwa comene. Cilimika cilicose, ŵanthu ŵanandi awo ŵali na maghanoghano ghakwenelera ŵakupulikira uthenga uwo tikupharazga. Kweni “zuŵa likuru la Yehova liri pafupi.” Ici cikung’anamura kuti awo ŵacali mu mdima wauzimu “ŵakunyanyata [kupenthyapenthya] kuya ku nyifwa.”—Zef. 1:14; Zinth. 24:11.
20. Kasi waliyose wa ise wakwenera kusimikizga kucitaci?
20 Tingaŵawovwira nipera ŵanthu ŵanthena. Kweni kuti ticite nthena, nchakukhumbikwa comene kuti ticite nga umo ŵakacitira Ŵakhristu ŵakwambilira, awo “ŵakalekanga cara kusambizga na kupharazga Yesu kuti ndi Khristu.” (Mil. 5:42) Londezgani ciyelezgero cawo nangauli mungakumana na masuzgo, ndipo pwelelerani luso lwa ‘kasambizgiro’ kinu, na kupharazga mwambura kutemwera. “Tingavukanga [cara] pakucita uwemi,” cifukwa usange tikufwilirapo, tizamuvuna vitumbiko vinandi vyakufuma kwa Ciuta.—2 Tim. 4:2; ŵazgani Ŵagalatiya 6:9.
[Mazgu ghamusi]
a Mazina ghanyake ghasinthika.
Kasi Mungazgora Wuli?
• Mbanjani awo ŵakupulikira makani ghawemi?
• Cifukwa wuli tikwenera cara kweruzgirathu awo tikuŵapharazgira?
• Kasi ni vici vikucitika cifukwa ca kugwiliskira nchito buku la Kasi Baibolo Likusambizgaci Comenecomene?
[Cithuzithuzi pa peji 13]
Ŵanthu ŵanandi awo ŵakutemwa unenesko ŵakupulikira
[Cithuzithuzi pa peji 15]
Kasi ivyo vikacitikira mpositole Paulosi vingatisambizgaci?
[Cithuzithuzi pa peji 16]
Awo ŵakupharazga makani ghawemi ŵakweruzgirathu ŵanthu yayi