Ŵakapangiska Umoyo Wawo Kuŵa Wakunozga Kasi Namwe Mungacita Nthena?
MARC, uyo ni mbali wa ku Canada, wakalembeka ganyu na kamupani yinyake iyo nja ndarama comene. Para wafuma ku ganyu uyu, wakacitanga upayiniya wa nyengo zose. Pamasinda pake, bwana wake wakakhumbanga kuti Marc wambe waka nchito mwakukhazikika, ndipo wakamulayizga kuti wapokerenge ndarama zinandi. Kasi Marc wakasankhaci?
Amy, uyo ni mudumbu wa ku Philippines, wakati wakhala pacoko kumalizga sukulu wakamba upayiniya wa nyengo zose. Wakati wamalizga sukulu, wakasanga nchito iyo yikakhumbanga nyengo yinandi kweni yikaŵa ya malipiro ghanandi. Kasi Army wakasankha kucitaci?
Marc na Amy ŵakasankha mwakupambana, ndipo ivyo vikacitika cifukwa ca ivyo ŵakasankha vikulongora uwemi wa ulongozgi uwo ukapelekeka ku Ŵakhristu ŵa ku Korinte. Mpositole Paulosi wakalemba kuti: “Awo ŵakusuŵilira vya caru, [ŵaŵe] nga ndi para ŵakusuŵiliramo nkhanira cara.”—1 Kor. 7:29-31.
Gwiliskirani Nchito Caru, Kweni Kusuŵilira Naco Cara
Pambere tindawone ivyo vikacitikira Marc na Amy, tiyeni tiwone dankha mwakudumura ng’anamuro la lizgu lakuti “caru” (mu Cigiriki koʹsmos) ilo Paulosi wakagwiliskira nchito mu kalata iyo wakalembera Ŵakorinte. Mu kalata iyi, lizgu lakuti caru likung’anamura nyengo iyo tikukhalamo, panji ŵanthu wose ŵa mu caru, ndipo likusazgapo vinthu vya mu caru ivyo vikukhumbikwa pa umoyo wa zuŵa na zuŵa, nga ni nyumba, cakurya na vyakuvwara.a Kuti tisange vinthu ivi, taŵanandi tikukhumbikwira kulembeka nchito. Mbunenesko kuti mulimose umo vingaŵira, tikwenera kugwira nchito nipera mu caru ici kuti tifiske maudindo agho Malemba ghakutiphalira, mwakuti tisange vyakukhumbikwa pa umoyo withu ndiposo wa mbumba zithu. (1 Tim. 5:8) Kweni apo tikucita milimo iyi, tikumanyaso kuti “caru cikuluta.” (1 Yoh. 2:17) Mwantheura, tikugwiliskira nchito caru mwakwenelera, kuti tikusuŵilira naco “nkhanira” cara.—1 Kor. 7:31.
Cifukwa ca kulondezga ulongozgi wa mu Baibolo wakuti ŵaleke kusuŵilira nkhanira na caru, ŵabali na ŵadumbu ŵanandi ŵacepeskako vyakukhumba pa umoyo wawo, ŵacepeska nyengo iyo ŵakumalira pa nchito, ndipo ŵaŵa na umoyo wambura kukhumba vinandi. Pamasinda pakucita nthena, ŵawona kuti ŵakupangiska umoyo wawo kuŵa wakunozga cifukwa ŵakuŵa na nyengo yinandi yakucezgera na mbumba zawo ndiposo kuteŵetera Yehova. Nakuti umoyo wambura kukhumba vinandi ukuŵacitiska kuti ŵaleke kuthemba comene caru kweni Yehova. Kasi namwe mungacita nthena, kuŵa na umoyo wambura kukhumba vinandi mwakuti muŵe na nyengo yinandi yakucitira vinthu vyauzimu?—Mat. 6:19-24, 33.
“Tikujiwona Kuti Tili Pafupi Comene na Yehova Kuluska Kale”
Marc, uyo wazunurika pakwambilira pa nkhani iyi, wakapulikira ulongozgi wa mu Baibolo wa kuleka kusuŵilira nkhanira na caru. Wakakana nchito yapacanya iyo wakapika. Pamasinda pa mazuŵa ghacoko waka, bwana wa Marc wakasazgirako malipiro na cilato cakuti Marc wazomere nchito. Marc wakuti: “Cikaŵa ciyezgo, kweni nkhakana nipera.” Pakulongosora cifukwa ico wakakanira, wakuti: “Ine pamoza na muwoli wane Paula, tikakhumbanga kuti mu umoyo withu titeŵetere Yehova mwakukwana. Mwantheura, tikasankha kuŵa na umoyo wambura kukhumba vinandi. Tikalomba Yehova kuti watipe vinjeru kuti tifiske cilato cithu, ndipo tikatema zuŵa ilo tikakhumbanga kwambira kuteŵetera Yehova mwakukwana.”
Paula wakuti: “Nkhagwiranga nchito ya ulembi ku cipatala ndipo nkhalutangako mazuŵa ghatatu pa sabata. Nkhapokeranga malipiro ghawemi. Kweniso nkhacitanga upayiniya wa nyengo zose. Kweni nga ni Marc, nane nkhakhumbanga kuteŵetera Yehova kulikose uko kukakhumbikwiranga ŵapharazgi ŵanandi ŵa Ufumu. Mwantheura, apo nkhamanyiska bwana wane kuti nkhuleka nchito, iyo wakati ndine wakwenelera kuŵa mulembi mulara, mwaŵi uwo ukaŵa kuti waŵapo waka mwasonosono. Malipiro gha nchito iyi ghakaŵa ghanandi nadi, kweni nkhasintha yayi maghanoghano ghane. Apo nkhalongosolera bwana wane cifukwa ico nkhalekera nchito yapacanya iyi, wakanilumba cifukwa ca cipulikano cane.”
Pakati pajumpha nyengo yicoko waka, Marc na Paula ŵakapika uteŵeti wa upayiniya wapadera mu mpingo ucoko uwo ukaŵa mu cigaŵa cakutali ku Canada. Kasi nchivici caŵacitikira cifukwa ca kusama uku? Marc wakuti: “Nkhati naleka nchito iyo nkhasangirangapo ndarama, nkhamanyanga yayi ivyo vinicitikirenge, kweni Yehova watumbika uteŵeti withu. Ndise ŵakukondwa cifukwa tikovwira ŵanthu mwauzimu. Uteŵeti wa nyengo zose wawovwiraso nthengwa yithu. Tikudumbiskana vinthu ivyo ni vyakuzirwa nadi, vinthu ivyo vikukhwaskana na kuteŵetera Yehova. Tikujiwona kuti tili pafupi comene na Yehova kuluska kale.” (Mil. 20:35) Paula nayo wakuti: “Para ukuleka nchito yako na nyumba yako yiwemi, ukwenera kuŵika cigomezgo cako cose mwa Yehova. Ndivyo tikacita, ndipo Yehova watitumbika. Ŵabali na ŵadumbu ŵithu ŵakutemweka ŵa ku mpingo withu wasono ŵakutitemwa ndipo ici cikutipangiska kujiwona kuŵa ŵakukhumbikwa. Nkhongono izo kale zikamaliranga ku nchito ya caru, sono nkhovwilira nazo ŵanthu mwauzimu. Ndine wakukondwa comene cifukwa ca uteŵeti uwu.”
‘Nkhaŵa Naco Cinandi, Kweni Nkhaŵavya Cimwemwe’
Amy, uyo wazunurika pakwambilira pa nkhani iyi, wakasankha mwakupambanako. Wakazomera nchito yapacanya iyo ŵakapika. Amy wakuti: “Cilimika cakwamba, nkhapharazganga mwakukhazikika kweni nkhasanga kuti pacoko na pacoko nkhamba kuleka kupenja Ufumu na kwamba kupwelelera comene nchito. Nkhaŵa paciyezgo ca zani muwone cifukwa kanandi ŵakanikwezganga pa nchito ndipo nkhayamba kulimbikira comene nchito mwakuti ŵalutilire kunikwezga. Apo maudindo gha ku nchito ghakasazgikiranga, nyengo yakupharazgira yikaceperangaceperanga. Mukuluta kwa nyengo, nkhalekerathu kupharazga.”
Pakughanaghanira nyengo iyo wakaŵa pa nchito yapacanya iyi, Amy wakuti: “Cuma nkhaŵa naco cinandi. Nkhendanga malo ghakupambanapambana ndipo nkhakondwanga cifukwa ca nchito yane. Kweni nkhaŵavya cimwemwe. Nangauli nkhaŵa na ndarama zinandi, kweni nkhaŵaso na masuzgo ghanandi. Nkhamanyanga yayi ico vinthu vikaŵira nthena. Kweni pamasinda nkhawamo kuti cifukwa ca kupenjisiska usambazi wa caru ici, nkhaŵa pafupi ‘kupuluskika ku cipulikano.’ Ivyo vikanicitikira, vikuyana waka ndendende na ivyo Mazgu gha Ciuta ghakuyowoya, nkhasuzgika na ‘vitima vinandi.’”—1 Tim. 6:10.
Kasi Amy wakacitaci? Wakuti: “Nkhapempha ŵalara kuti ŵanovwire mwakuti niŵeso na nkhongono zauzimu ndipo nkhamba kuluta ku maungano. Pa nyengo ya kwimba sumu, nkhamba kulira. Nkhakumbuka umo nkhaŵira wakukondwa vilimika vinkhondi ivyo nkhacitangako mulimo wa vuna nga ni mupayiniya, nangauli nkhaŵa mukavu panyengo iyo. Nkhamanya kuti nkhwenera kuleka kupenjisiska ndarama, kweni nkhwenera kupenja dankha Ufumu. Nkhapempha nchito yapasi, ico cikang’anamuranga kudumurako hafu ya ndarama izo nkhapokeranga, ndipo nkhambaso mulimo wa kupharazga.” Amy wali na cimwemwe ndipo wakuti: “Nili na cimwemwe nga ni ico nkhaŵa naco apo nkhacitanga upayiniya. Sono ndine wakukondwa comene kuluska apo nyengo yane yinandi yikamaliranga pa nchito ya caru.”
Kasi mungasintha vinthu vinyake pa umoyo winu kuti muŵe na umoyo wambura kukhumba vinandi? Usange mugwiliskirenge nchito nyengo yinu kupharazgira Ufumu, namwe muŵenge na umoyo wakunozga.—Zinth. 10:22.
[Mazgu ghamusi]
a Wonani Insight on the Scriptures, Volume 2, mapeji 1207-8, usange muli nayo.
[Mazgu Ghakukhozgera pa peji 19]
Kasi mungasintha vinthu vinyake pa umoyo winu kuti muŵe na umoyo wambura kukhumba vinandi?
[Bokosi/Cithuzithuzi pa peji 19]
“Namba Kale Kuwutemwa”
Davide, uyo ni mbali mulara ku United States, wakakhumbanga kucita uteŵeti wa nyengo zose uwo muwoli wake na ŵana ŵakacitanga. Wakapempha ku nchito kuti wagwirenge kwa nyengo yicoko, ndipo wakamba upayiniya wa nyengo zose. Kasi kusintha uku kukapangiska umoyo wake kuŵa wakunozga? Pakati pajumpha myezi, Davide wakalembera kalata mubwezi wake kuti: “Palije mulimo wakukhorweska uwo munthu wangacita kuluska kuteŵetera Yehova mwakukwana pamoza na mbumba yake. Nkhawonanga nga panitolerenge nyengo kuti nizgoŵere upayiniya, kweni namba kale kuwutemwa. Ngwakukondweska comene.”
[Cithuzithuzi pa peji 18]
Marc na Paula mu uteŵeti