Kasi Mukukumbuka?
Kasi mwaŵazgapo magazini gha Gongwe la Mulinda gha sonosono apa? Para ni nthena, wonani umo mungazgolera mafumbo ghakulondezgapo agha:
• Kasi mphawuli apo ŵavinjeru ŵakiza kuzakawona Yesu?
Buku linyake lakuyowoya nkhani za mu Baibolo likuti: “Ŵamagi [ŵavinjeru] kuti ŵakiza pa nyengo iyo Yesu wakaŵa mu cakulyeramo viŵeto ndiposo pa zuŵa ilo wakababikira yayi. Mbaliska ŵekha awo ŵakiza apo Yesu wakababikira. Ŵamagi ŵakiza pakati pajumpha myezi yinandiko.” Pa nyengo iyi ŵakasanga kuti Yesu ni “mwana,” wali mu nyumba. (Mat. 2:7-11) Usange ŵavinjeru aŵa ŵapelekenge golide ndiposo vyawanangwa vinyake vyakuzirwa ivyo ŵakamuyeghera pa nyengo iyo wakababikira, kasi nthena Mariya wakapeleka njiŵa ziŵiri ku tempele pamanyuma pa mazuŵa 40?—Jan-Mal, peji 31.
• Kasi ŵanthu ŵangacita wuli kuti umoyo wawo uŵe wakunozga?
Munyake wangajifumba kuti, ‘Kasi ningasintha vinthu vinyake pa umoyo wane kuti niŵe na umoyo wambura kukhumba vinandi?’ Ndimo Amy wakacitira. Wakaŵa na ndarama zinandi, kweni wakaŵavya cimwemwe. Wakawona kuti kucita nchito yacaru kukakhala pacoko kumutayiska cipulikano cake. Mwantheura wakasankha kudangizga vinthu vya Ufumu, ndipo wakacita upayiniya. Amy wakati: “Sono ndine wakukondwa comene kuluska apo nyengo yane yinandi yikamaliranga pa nchito yacaru.”—1/15, peji 19.
• Nchivici cingawovwira ŵamama kuti ŵaŵe ŵacimwemwe?
Ŵamama ŵanandi ŵakugwira nchito zakulembeka. Ŵanji ŵakucita nthena mwakuti ŵasange vyakukhumbikwa vya mbumba zawo, ŵanji ŵakukhumba kuti ŵasankhenge ŵekha vyakucita vyakukhwaskana na ndarama panji ŵagulenge vinthu vyakuŵakondweska. Paliso ŵanji awo ŵakucita nthena cifukwa cakuti ŵakukondwa na nchito yawo. Ŵamama awo Mbakhristu ŵali na mulimo wakuzirwa wa kovwira ŵana, comenecomene para ŵacali ŵanici. Ŵanji ŵasankha kucepeskako nyengo yakugwilira nchito yakulembeka panji kuleka, mwakuti ŵapwelelere makora mbumba zawo. Ici capangiska kuti ŵaŵe ŵakukondwa.—Epl-Juni, mapeji 26-29.
• Kasi ni “muwiro” wuli uwo Yesu wakayowoya pa Mateyu 24:34?
Apo Yesu wakazunuranga lizgu lakuti “muwiro” wakang’anamuranga ŵanthu ŵakucita vinthu vyambura kwenelera, ndipo kanandi wakasazgangako lizgu lakuti “uheni.” Kweni apo wakayowoyanga na ŵasambiri ŵake awo ŵakaŵa pafupi kuphakazgika na mzimu utuŵa, wakasazgako yayi lizgu lakuti “uheni” ku muwiro. Ŵasambiri ŵake ŵakwenera kuti ŵakamanya ng’anamuro la mazgu agho ghali pa Mateyu 24:32, 33. Yesu wakwenera kuti wakang’anamuranga ŵasambiri ŵake ŵakuphakazgika, ŵa pa nyengo yira ndiposo ŵa mazuŵa ghano.—2/15, mapeji 23-4.
• Kasi Dango likaŵa wuli mulindaŵana nga umo lemba la Ŵagalatiya 3:24 likuyowoyera?
Kanandi mu nyengo yakale, mulindaŵana wakaŵanga muzga wakugomezgeka ndipo wakawoneseskanga kuti mwana ngwakuvikilirika ndiposo kuti vinthu ivyo dada wakakhumbiranga mwana vikulondezgeka. Mwakuyana waka, Dango likavikiliranga Ŵayuda ku vinthu viheni nga nkhutorana na ŵanthu ŵa mitundu yinyake. Kweni nga umo mulindaŵana wakaŵira, mulimo wa Dango ukaŵa wa nyengo yicoko waka, ndipo likagwira nchito mpaka apo Khristu wakizira.—Epl-Juni, mapeji 18-21.
• Mwakuyana na lemba la Yakobe 3:17, kasi tikwenera kulongora mikhaliro wuli?
Kuti tiŵe ŵatuŵa tikukhumbikwira kuziwulika yayi kukana vinthu viheni. (Gen. 39:7-9) Tikweneraso kuŵa ŵamtende, kuleka kuŵa ŵakali, panji kucita vinthu ivyo vingatimbanizga mtende. Waliyose wangacita makora kujifumba kuti: ‘Kasi nkhumanyikwa kuŵa munthu wakucitiska mtende panji wakutimbanizga mtende? Kasi kanandi nkhugazgana na ŵanyane? Kasi nkhukhuŵazgika mwaluŵiro panji nkhukhuŵazga ŵanyane? Kasi para vinthu vyabudika nkhugowoka luŵiro, panji nkhukosera pa ivyo nkhukhumba?—3/15, mapeji 24-5.
• Cifukwa wuli Yesu wakacizga munthu wacibulumutira mwapacokopacoko?
Baibolo likulongosora mwakudunjika yayi cifukwa ico wakacitira nthena. Panji kucizga pacokopacoko munthu uyu, uyo wakaŵa wambura kuwona kwa nyengo yitali kukwenera kuti kukamovwira kuti ungweru wa zuŵa uleke kumubucizga na kumupweteka mu maso. Yesu wakwenera kuti wakacita nthena cifukwa ca kughanaghanira munthu uyu.—2/15, peji 29.