Sankhani Kuteŵetera Yehova Apo Mucali Ŵawukirano
“Khalilira mu vyeneivyo wasambira na kupanikizgika navyo.”—2 TIM. 3:14.
1. Kasi Yehova wakuwona wuli uteŵeti wa Ŵakaboni ŵake awo mbawukirano?
YEHOVA wakuzirwiska comene uteŵeti wakupatulika uwo ŵawukirano ŵakucita, mwakuti wakapangiska kuti palembeke ucimi wakuyowoya za iwo. Wamasalmo wakimba kuti: “Ŵanthu ŵako tiŵajiperekenge na mtima mu zuŵa ilo ukulongozga nkhondo yako pa mapiri ghatuŵa ghakupatulika. Mu utozi wa cibabiro ca matandakuca upungwe [wanici] wako utiuŵe nga ndi jumi.” (Sal. 110:3) Enya, Yehova wakuzirwiska comene ŵawukirano awo ŵali na khumbo la kumuteŵetera.
2. Kasi ŵawukirano mazuŵa ghano ŵakukhuŵirizgika kucitaci mu umoyo wawo?
2 Mwaŵawukirano imwe muli mu mpingo Wacikhristu, kasi mwapatulira umoyo winu kwa Yehova? Ŵanandi ŵangatondeka kusankha kuteŵetera Ciuta waunenesko. Ŵalongozgi ŵa mabizinesi, ŵasambizgi, ndipo nyengo zinyake ŵa mu mbumba na ŵabwezi wawo, ŵakukhuŵirizga ŵawukirano kuti ŵapenjenge usambazi. Para ŵawukirano ŵali na vilato vyauzimu, kanandi caru cikuŵanyoza. Kweni unenesko ngwakuti kuteŵetera Ciuta waunenesko nchinthu ciwemi comene ico mungacita pa umoyo winu. (Sal. 27:4) Pa nkhani iyi ghanaghanirani mafumbo ghatatu agha: Cifukwa wuli mukwenera kuteŵetera Ciuta? Kasi mungakwaniska wuli kuteŵetera Ciuta mwambura kupwelerako kanthu ivyo ŵanji ŵangayowoya panji kumucitirani? Kasi ni mauteŵeti wuli agho mungacita?
Kuteŵetera Yehova Nchinthu Ciwemi Comene
3. Kasi ivyo Yehova wali kulenga vikwenera kutipangiska kucitaci?
3 Cifukwa wuli mukwenera kuteŵetera Ciuta wamoyo ndiposo waunenesko? Lemba la Civumbuzi 4:11 likuyowoya cifukwa cikuru, likuti: “Ŵakwenelera ndimwe, Fumu yithu na Ciuta withu, kupokera nchindi na thumbiko na nkhongono: Pakuti Imwe mukalenga vyose, Ndipo cifukwa ca khumbo linu vikaŵako, ndipo vikalengeka.” Yehova ndiyo ni Mlengi wa cinthu cilicose. Wonani waka umo caru cikutowera! Ni Yehova wali kulenga vyose, kwali ni makuni, maluŵa, vinyama, mironga, mapiri, na vipopoma vya maji. Lemba la Salmo 104:24 likuti, “Caru nchakuzura na vilengiwa [vya Ciuta].” Tingaŵa ŵakuwonga comene kuti Yehova, cifukwa ca citemwa cake, watipa thupi na wongo, ivyo vikutipangiska kuti tikondwenge na caru ndiposo vinthu viwemi ivyo vilimo. Asi kuwongera vinthu vyakuzizwiska ivyo Ciuta wali kulenga kukwenera kutipangiska kuti timuteŵetere?
4, 5. Ni milimo wuli ya Yehova iyo yikapangiska Yoswa kuti wasendelere kwa iyo?
4 Cifukwa cinyake ico tikwenera kuteŵetelera Yehova ni ico wakayowoya mulongozgi wa Ŵaisrayeli, Yoswa. Mu mazuŵa ghaumaliro gha umoyo wake, Yoswa wakaphalira ŵanthu ŵa Ciuta kuti: “Mukumanya mu mitima yinu yose na miyoyo yinu yose, kuti palive kutondeka kanthu pa viweme vyose ivyo Yehova Ciuta winu wakayowoya namwe; vyose vyafiskika kwa imwe.” Cifukwa wuli Yoswa wakayowoya nthena?—Josh. 23:14.
5 Pakuti Yoswa wakakulira ku Eguputo, wakwenera kuti wakamanyanga layizgo la Yehova lakuti wazamupa Ŵaisrayeli caru cawo. (Gen. 12:7; 50:24, 25; Ex. 3:8) Ndipo Yoswa wakawonanga apo Yehova wakamba kufiska layizgo ili mwa kwiziska vilengo khumi pa Ŵaeguputo na kucicizga Faro kuti wazomerezge ŵana ŵa Israyeli kuti ŵalutenge. Yoswa wakaŵa pa gulu la ŵanthu awo ŵakathaskika pa Nyanja Yiswesi, ndipo wakawona apo Faro na ŵasilikari ŵake ŵakabiranga. Mukati mwa ulendo utali wa mu “mapopa ghara ghakuru na ghakofya” gha mu cipalamba ca Sinayi, Yoswa wakawona umo Yehova wakapiranga Ŵaisrayeli vyose ivyo ŵakakhumbikiranga. Pakaŵavya na yumoza uyo wakafwa cifukwa ca nyota panji njara. (Dute. 8:3-5, 14-16; Josh. 24:5-7) Nyengo yikati yakwana kuti Ŵaisrayeli ŵarwe nkhondo na mitundu yankhongono ya Ŵakenani na kupoka Caru ca Layizgano, Yoswa wakawona umo Ciuta uyo wakasopanga pamoza na Ŵaisrayeli ŵanyake wakaŵawovwilira.—Josh. 10:14, 42.
6. Kasi nchivici cingamovwirani kuti muŵe na khumbo la kuteŵetera Ciuta?
6 Yoswa wakamanya kuti Yehova wakafiska layizgo lake. Ndico cifukwa cake wakayowoya kuti: “Kweni ine na nyumba yane tititimuteŵetere Yehova.” (Josh. 24:15) Wuli pakuyowoya za imwe? Para mukughanaghanira malayizgo agho Ciuta waunenesko wafiska kale na agho wafiskenge sonosono, kasi namwe mukuŵa na khumbo la kumuteŵetera nga ni Yoswa?
7. Cifukwa wuli kubapatizika nkhwakuzirwa comene?
7 Kughanaghanira vinthu ivyo Yehova wali kulenga ndiposo malayizgo ghake ghawemi ndiposo ghakugomezgeka kukwenera kutipangiska kuti tijipatulire kwa Yehova ndiposo kulongora kujipatulira kwithu mwa kubapatizika. Kubapatizika nchinthu cakuzirwa comene ico awo ŵakukhumba kuteŵetera Ciuta ŵakwenera kucita. Fundo iyi yikalongoreka makora na Yesu, uyo Nchiyelezgero cithu. Pambere wandambe mulimo wake nga ni Mesiya, wakaluta kwa Yohane Mbapatizi kuti wamubapatize. Cifukwa wuli Yesu wakacita nthena? Pamanyuma wakayowoya kuti: “Kucanya kuti ndili kwikhira kucita khumbo lane na lane cara, kweni khumbo la Uyo wakandituma.” (Yoh. 6:38) Kuti walongore kuti wajipatulira kwa Awiske kuti wacitenge khumbo lawo, Yesu wakabapatizika.—Mat. 3:13-17.
8. Cifukwa wuli Timote wakasankha kuteŵetera Ciuta, ndipo imwe mungakhumbikwira kucitaci?
8 Ghanaghanirani za Timote, Mkhristu muwukirano uyo mukuluta kwa nyengo Yehova wakamupa mauteŵeti ghanandi ghapadera. Cifukwa wuli Timote wakasankha kusopa Ciuta waunenesko? Baibolo likutiphalira kuti ‘wakasambira vinthu na kupanikizgika navyo.’ (2 Tim. 3:14) Usange muli kusambira Mazgu gha Ciuta ndipo muli kupanikizga kuti ghakuyowoya unenesko, namwe muli mu ukhaliro wakuyana na wa Timote. Sono mukwenera kusankha usange mukukhumba kuteŵetera Ciuta. Mwalekeraci kuphalira ŵapapi ŵinu ivyo mukukhumba kucita? Ŵapapi ŵinu pamoza na ŵalara, ŵangamovwirani kuti mupulikiske ivyo Malemba ghakuyowoya pa nkhani ya ubapatizo.—Ŵazgani Milimo 8:12.
9. Kasi ŵanji ŵangakhwaskika wuli para mwabapatizika?
9 Kubapatizika nchinthu cakwamba ndiposo ciwemi comene ico mungacita kuti muteŵetere Ciuta waunenesko. Para mwabapatizika, ndikuti mwamba ulendo utali uwo vitumbiko vyake ni umoyo wamuyirayira ndiposo cimwemwe ico mungaŵa naco sono cifukwa ca kucita khumbo la Ciuta. (Heb. 12:2, 3) Kweniso mukondweskenge ŵa mu mbumba yinu awo ŵali kale pa ulendo uwu, ndiposo ŵabwezi ŵinu mu mpingo Wacikhristu. Cakuluska vyose nchakuti mukondweskenge mtima wa Yehova. (Ŵazgani Zintharika 23:15.) Mbunenesko kuti ŵanji ŵangapulikiska yayi cifukwa ico mwasankhira kuteŵetera Yehova, ndipo ŵangawona kuti mundacite makora. Nyengo zinyake ŵangamususkani. Kweni mungamarana na viyezgo ivi.
Para Ŵanji Ŵakumufumbani Panji Kumususkani
10, 11. (a) Ni mafumbo wuli ghakukhwaskana na kuteŵetera Ciuta agho ŵanthu ŵangamufumbani? (b) Kasi mungasambiraci ku umo Yesu wakazgoleranga mafumbo ghakukhwaskana na kusopa kwaunenesko?
10 Ŵanyinu ku sukulu, ŵazengezgani ŵinu, ndiposo ŵabali ŵinu ŵangazizikika comene para mwasankha kuteŵetera Yehova. Ŵangamufumbani cifukwa ico mwacitira nthena ndiposo vigomezgo vinu. Kasi mukwenera kuzgora wuli? Kuti mulongosore makora cifukwa ico mwasankhira nthena, mukwenera kusanda dankha maghanoghano ghinu na umo mukujipulikira. Ndipo pakuzgora mafumbo ghakukhwaskana na vigomezgo vinu, londezgani ciyelezgero ca Yesu.
11 Apo ŵalongozgi ŵa cisopa ca Ciyuda ŵakafumba Yesu za ciwuka, wakaŵajulira malemba agho ŵakaŵa ŵandaghaghanaghanirepo. (Ex. 3:6; Mat. 22:23, 31-33) Apo mulembi wakamufumba ilo ni dango likuru, Yesu wakayowoya mavesi ghakwenelera kufuma mu Baibolo. Munthu uyu wakawonga Yesu cifukwa ca zgoro ilo wakamupa. (Lev. 19:18; Dute. 6:5; Mrk. 12:28-34) Umo Yesu wakagwiliskiranga nchito Malemba ndiposo umo wakayowoyeranga vikapangiska “mphatukano mu mzinda cifukwa ca Iyo” ndipo awo ŵakamususkanga ŵakatondeka kumucitira ciheni. (Yoh. 7:32-46) Para mukuzgora mafumbo ghakukhwaskana na vigomezgo vinu, gwiliskirani nchito Baibolo ndipo zgorani “na kuzika na wofi.” (1 Pet. 3:15) Para zgoro mukulimanya yayi, ŵaphalirani na kuŵalayira kuti mukapenje dankha mu mabuku. Pamanyuma, penjani pa Mitu ya Nkhani za mu Gongwe la Mulinda iyo yikuŵa mu Gongwe la Mulinda lililose la Disembala, panji mu Watch Tower Publications Index panji Watchtower Library on CD-ROM usange vilimo mu ciyowoyero ico mukupulika. Para mwanozgekera makora, ‘mumanyenge umo mukwenera kuzgolera.’—Kol. 4:6.
12. Cifukwa wuli mukwenera cara kuzomerezga nthambuzgo kumugongoweskani?
12 Padera pa mafumbo ghakukhwaskana na kuteŵetera Ciuta ndiposo vigomezgo vinu, mungakumanaso na masuzgo ghanandi. Ici nchakuzizika yayi cifukwa caru cili mu mawoko gha Satana Dyabulosi. (Ŵazgani 1 Yohane 5:19.) Mungalindizganga kuti waliyose wamulumbaninge panji kukondwa namwe yayi, ŵanji ŵamususkaninge. Ŵanyake ‘ŵamutukaninge,’ ndipo ŵangalutilira kucita nthena kwa nyengo yitali. (1 Pet. 4:4) Kweni kumbukani kuti muli mwekha yayi. Nanga ni Yesu Khristu nayo wakatombozgekanga. Mpositole Petrosi nayo ntheura pera, ndipo wakalemba kuti: “Mwa ŵakutemweka, mungazukumanga na viphyo ivyo vili mwa imwe, ivyo vikumwizirani kwiza kamuyezgani, nga ndi para cinthu ciyeni cikumwizirani: kweni mumo mukusanganira viphyo vya Khristu, musekelere.”—1 Pet. 4:12, 13.
13. Cifukwa wuli Ŵakhristu ŵakwenera kukondwa para ŵakutambuzgika?
13 Kutambuzgika cifukwa cakuti ndiwe Mkhristu nchinthu cakukondweska comene. Cifukwa wuli? Cifukwa para caru cikukutemwa nchilongolero cakuti ukucita vinthu mwakuyana na vipimo vya Satana, kuti vya Ciuta yayi. Yesu wakacenjezga kuti: “Soka kwa imwe para ŵanthu wose ŵakumuyowoyani uwemi! cifukwa ntheura ndimo ŵawiskeŵo ŵakacitiranga zinchimi zitesi.” (Luka 6:26) Para ŵanthu ŵakumutambuzgani, nchilongolero cakuti Satana na caru cake vyakwiya namwe cifukwa mukuteŵetera Yehova. (Ŵazgani Mateyu 5:11, 12.) Ndipo ‘kutombozgekera zina la Khristu’ nchinthu ico mukwenera kukondwa naco.—1 Pet. 4:14.
14. Kasi pangaŵa mauwemi wuli usange munthu wakulutilira kugomezgeka kwa Yehova nanga wangatambuzgika?
14 Pali mauwemi ghanayi usange mulutilirenge kugomezgeka kwa Yehova nangauli mukususkika. Mukupharazga za Ciuta na Mwana wake. Ŵabali na ŵadumbu ŵinu ŵakukhozgeka para mukugomezgeka. Ŵanthu ŵambura kumanya Yehova awo ŵakumuwonani ŵangakhuŵilizgika kuti ŵambe kumuteŵetera. (Ŵazgani Ŵafilipi 1:12-14.) Ndiposo apo mukuwona umo Yehova wakupelekera nkhongono zakuzizipizgira viyezgo, mwambenge kumutemwa comene.
“Muryango Ukuru” Wamujulikirani
15. Ni “muryango ukuru” wuli uwo ukajulikira mpositole Paulosi?
15 Pakuyowoya za uteŵeti wake ku Efeso, mpositole Paulosi wakalemba kuti: “Muryango ukuru wa milimo wandijulikira.” (1 Kor. 16:8, 9) Muryango uwu ukaŵa mwaŵi ukuru wa kupharazga makani ghawemi na kovwira ŵanthu mu msumba uwu kuti ŵaŵe ŵasambiri. Mwa kunjira pa muryango uwu, Paulosi wakawovwira ŵanthu ŵanandi kuti ŵasambire za Yehova na kumusopa.
16. Kasi ŵakukhalira ŵakuphakazgika ŵakanjira wuli pa “muryango wakujurika” mu 1919?
16 Mu 1919, Fumu Yesu Khristu yikaleka “muryango wakujurika” panthazi pa ŵakukhalira ŵakuphakazgika. (Civ. 3:8) Iwo ŵakanjira pa muryango uwu na kwamba kupharazga makani ghawemi mwamwamphu kuluska kumanyuma kose. Nchivici cacitika cifukwa ca uteŵeti wawo? Makani ghawemi sono ghapharazgika ku vigoti vyose vya caru, ndipo ŵanthu pafupifupi mamiliyoni ghankhondi na ghaŵiri ŵali na cilindizga ca kuzakasanga umoyo wamuyirayira mu caru ciphya ca Ciuta.
17. Kasi munganjira wuli pa “muryango ukuru wa milimo”?
17 “Muryango ukuru wa milimo” ucali wakujurika ku ŵateŵeti wose ŵa Yehova. Awo ŵakunjirapo ŵakuŵa ŵacimwemwe ndiposo ŵakukhorwa apo ŵakucitako comene mulimo wa kupharazga makani ghawemi. Ŵawukirano imwe mukuteŵetera Yehova, kasi mukuzirwiska wuli mwaŵi wa kovwira ŵanji kuti ‘ŵapulikane na ivangeli’? (Mrk. 1:14, 15) Kasi muli kughanaghanirapo za kuteŵetera nga ni mupayiniya wanyengo zose panji wa kanyengo? Mauteŵeti ghanyake agho mwaŵanandi ghangamujulikirani nkhuzenga Nyumba za Ufumu, uteŵeti wa pa Beteli, ndiposo uteŵeti wa umishonale. Pakuti caru ciheni ca Satana cili pafupi kuparanyika, zuŵa lililose pakukhumbikwa ŵanthu ŵakuti ŵacite mauteŵeti agha. Kasi munjirenge pa “muryango ukuru” uwu apo nyengo yicalipo?
“Cetani, ’Mwe! Muwone Kuti Yehova ndi Muwemi”
18, 19. (a) Nchivici cikawovwira Davide kuŵa na khumbo likuru la kuteŵetera Yehova? (b) Nchivici cikulongora kuti Davide wakadandaurapo yayi cifukwa ca kuteŵetera Ciuta?
18 Wamasalmo wakakhuŵilizga ŵanyake kuti ‘ŵacete na kuwona kuti Yehova ni muwemi.’ (Sal. 34:8) Apo Davide, Themba la Israyeli, likaŵa muliska musepuka, Yehova wakaliponoska ku vikoko vyakofya. Yehova wakawovwira Davide kutimbana na Goliyati, ndiposo kumuponoska ku masuzgo ghanandi. (1 Sam. 17:32-51; Sal. 18, mazgu ghakwamba) Cifukwa ca lusungu lukuru ulo Ciuta wakamulongora, Davide wakalemba kuti: “A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwelera; palije yumoza wakukozgana na Imwe.”—Sal. 40:5.
19 Davide wakamba kutemwa comene Yehova ndipo wakakhumba kumuthuwuska na mtima wake wose. (Ŵazgani Salmo 40:8-10.) Apo vilimika vikajumphapo, Davide wakadandaurapo yayi cifukwa ca kumalira vilimika vinandi vya umoyo wake pa kusopa Ciuta waunenesko. Kusopa Ciuta kukaŵa cinthu cakuzirwa comene, ndipo kukamupa cimwemwe kuluska cinthu cilicose. Wakati wacekura, Davide wakati: “Ndimwe nkhumugomezgani, A Yehova, ndimwe citamiro cane kwamba ku wanici wane. Nanga mphakucekura ine na kuŵa na mbuha, A Ciuta, mungandisidanga.” (Sal. 71:5, 18) Davide wakalutilira kugomezga comene Yehova na kuŵa nayo paubwezi nanga ni apo nkhongono zikamara cifukwa ca ucekuru.
20. Cifukwa wuli kuteŵetera Ciuta nchinthu ciwemi comene ico mungacita pa umoyo?
20 Umoyo wa Joshua, Davide, na Timote ukupeleka ukaboni wakuti kuteŵetera Yehova nchinthu ciwemi comene ico munthu wangacita pa umoyo wake. Vinthu vyakuthupi vya kanyengo waka ivyo munthu wangasanga cifukwa ca kugwira nchito ya ku caru, vingaforako na pacoko wuwo yayi ku vitumbiko ivyo mungasanga cifukwa ca ‘kuteŵetera Yehova na mtima wose na umoyo winu wose.’ (Josh. 22:5) Usange mundapatulire umoyo winu kwa Yehova mu lurombo, jifumbani kuti, ‘Nchivici cikunitondeska kuŵa yumoza wa Ŵakaboni ŵa Yehova?’ Para ndimwe kale musopi wa Yehova wakubapatizika, kasi mungatemwa kusazgirako cimwemwe cinu mu umoyo? Usange ni nthena, mbwenu sazgiraniko uteŵeti winu, na kulutilira kukura mwauzimu. Nkhani yakulondezgapo yimulongoraninge umo mungakulira mwauzimu mwa kulondezga ciyelezgero ca mpositole Paulosi.
Kasi Mungazgora Wuli?
• Yowoyani vifukwa viŵiri ivyo tikwenera kuteŵetelera Ciuta.
• Nchivici cikamovwira Timote kuti wasankhe kuteŵetera Ciuta?
• Cifukwa wuli mukwenera kulutilira kuŵa ŵakukhora para mukutambuzgika?
• Ni mwaŵi wuli wa uteŵeti uwo ungamujulikirani?
[Cithuzithuzi pa peji 18]
Kuteŵetera Yehova nchinthu ciwemi comene pa umoyo
[Cithuzithuzi pa peji 19]
Kasi mungazgora mafumbo ghakukhwaskana na cipulikano cinu?