Kasi Mungazizipizga Wuli mu Uteŵeti?
KASI muli kugongowapo nyengo yinyake, na kughanaghana kuti muleke waka kupharazga? Kuzizipizga kungawoneka kwakusuzga usange tikususkika, kwenjerwa, kulwaralwara, kucicizgika kuti tileke kupharazga, panji para awo tikuŵapharazgira ŵakwiza yayi mu gulu la Yehova. Kweni ghanaghanirani za Yesu Khristu, uyo wakazizipizga viyezgo vyakusuzga comene “cifukwa ca cimwemwe ico cikaŵikika panthazi pake.” (Heb. 12:2) Wakamanya kuti Yehova wakukondwa para tikupeleka ukaboni, kususka viheni ivyo ŵanthu ŵakumuyowoyera.—Zinth. 27:11.
Usange tikuzizipizga mu uteŵeti, ndikuti tikukondweska mtima wa Yehova. Kweni wuli usange mukutondeka kucita uteŵeti wa m’munda cifukwa ca masuzgo? Krystyna, uyo ni mucekuru ndiposo wakulwalalwara, wakazomerezga wakati: “Kanandi nkhupulika vyakulema ndiposo nkhucita mphwayi. Masuzgo gha ucekuru nga ulwari, kwenjerwa na vinthu vya zuŵa na zuŵa ghakunigongoweska kwakanyengo.” Kasi mungacita wuli kuti muzizipizge mu uteŵeti wa m’munda nangauli mukusuzgika?
Tolerani Ciyelezgero ca Zinchimi
Kuti ŵazizipizge mu uteŵeti, ŵapharazgi ŵa Ufumu ŵakugomezgeka ŵakwenera kuyezgayezga kuŵa na kaghanaghaniro kakuyana na ako kakaŵa na nchimi zakale. Mwaciyelezgero, ghanaghanirani za Yeremiya. Apo wakaphalirika kuti waŵe nchimi wakakana. Kweni wakazizipizga masuzgo ghakukhwaskana na uteŵeti wake kwa vilimika 40, cifukwa wakasambira kugomezga Ciuta.—Yer. 1:6; 20:7-11.
Henryk wakukhozgeka comene na ciyelezgero ca Yeremiya. Iyo wakuti: “Mu vilimika vyakujumpha 70 ivyo napharazga, nyengo zinyake nagongowanga cifukwa ca umo ŵanthu ŵakuwonera mulimo withu, umo ŵakususkira, ndiposo cifukwa cakuti ŵanji ŵakutemwa yayi nkhani za cisopa. Pa nyengo zanthena nkhakumbukanga Yeremiya, uyo wakalutilira kucita uteŵeti wa kucima cifukwa cakuti wakaŵa paubwezi uwemi comene na Yehova.” (Yer. 1:17) Rafał nayo wakakhozgeka cifukwa ca umo Yeremiya wakacitira. Iyo wakati: “M’malo mwa kujighanaghanira, Yeremiya wakagomezganga comene Yehova. Nangauli ŵanandi ŵakakwiyanga na uthenga wake, kweni wakalutilira kupharazga mwambura wofi. Nkhuyezgayezga kukumbukira fundo iyi nyengo zose.”
Nchimi yinyakeso iyo yikacita ivyo vikukhozga ŵanandi ni Yesaya. Yehova wakamuphalira kuti ŵanthu ŵategherezgenge yayi ivyo wayowoyenge, wakati: “Tutuŵiska mitima ya ŵanthu aŵa, zotofya makutu ghawo.” Kasi Yesaya wakatondeka kufiska mulimo wake? Kwakuyana na umo Ciuta wakuwonera vinthu, wakatondeka yayi. Apo wakaphalirika kuti waŵe nchimi, iyo wakati: “Ndine pano; nditumani!” (Yes. 6:8-10) Yesaya wakalutilira kucita uteŵeti wake. Kasi ndimo namwe mukuwonera langulo la kupharazga?
Kuti tizizipizge nga ni Yesaya para ŵanthu ŵakulongora kuti wakukhumba yayi uthenga withu, tikwenera yayi kughanaghanira comene viheni ivyo ŵakuticitira. Rafał wakucita nthena para wagongoweskeka: “Kughanaghanirapo comene yayi pa mazgu ghaheni agho ŵanthu ŵakuyowoya. Ŵanthu ŵa mu cigaŵa ico nkhupharazga ŵali na wanangwa wa kucita umo ŵakhumbira na ivyo tikuŵapharazgira.” Anna nayo wakati: “Nkhuyezgayezga kuti nileke kughanaghana viheni, nesi vyakugongoweska. Lurombo ndiposo kuŵazga lemba la zuŵa pambere nindanjire mu uteŵeti ndivyo vikunovwira kuti nizizipizgenge. Para nacita nthena, maghanoghano ghaheni ghose ghakumara.”
Ezekiyeli wakacita ucimi wake pakati pa Ŵayuda ŵakugaluka ku Babuloni. (Ezek. 2:6) Ezekiyeli walekenge kuyowoya mazgu gha Ciuta kwa ŵanthu, ndipo munthu muheni wafwenge kwambura kupulika cenjezgo la Yehova, mphanyi wakaŵa na mulandu. Yehova wakamuphalira kuti: “Ndopa zake wamkususkika iwe nazo.”—Ezek. 3:17, 18.
Henryk wakuwona vinthu mwakuyana na umo Ezekiyeli wakawoneranga. Iyo wakati: “Nkhukhumba kuti nileke kuŵa na mulandu wa ndopa za ŵanthu wose. Umoyo wa ŵanthu wuli pa ngozi.” (Mil. 20:26, 27) Ndimo Zbigniew nayo wakuwonera. Iyo wakuti: “Ezekiyeli wakalutilira kucita uteŵeti wake mwambura kupwelerako ivyo ŵanji ŵakaghanaghananga. Ivyo wakacita vikunovwira kuti niwonenge mulimo wa kupharazga nga umo Mlengi wakuwuwonera.”
Pakupharazga Tikuŵa Tekha Yayi
Pakupharazga tikuŵa tekha yayi. Mwakuyana na mpositole Paulosi, tingayowoya kuti: “Tili ŵalimi ŵamoza na Ciuta.” (1 Kor. 3:9) Krystyna, uyo kanandi wakuŵa wakugongoweskeka, wakati: “Ndico cifukwa cake nyengo zose nkhulomba nkhongono kwa Yehova. Nyengo zose wakunipa nkhongono.” Mbunenesko nadi, tikukhumbikwira mzimu utuŵa kuti utovwire mu uteŵeti.—Zek. 4:6.
Para tikucita uteŵeti wa m’munda, mzimu utuŵa ukutovwiraso kuti tilongorenge mikhaliro iyo yikupanga “vipambi vya mzimu.” (Gal. 5:22, 23) Mikhaliro iyi yikutovwira kuti tizizipizgenge para tikupharazga, mwambura kupwelerako za umo ŵanthu ŵakuwonera mulimo withu. Henryk wakati: “Kupharazga kukunovwira kuti nisinthe wunthu wane. Kukunovwira kuti nisambire kuŵa wakuzika, wakughanaghanira ŵanji ndiposo kuti nileke kugongowa luŵiro.” Kuzizipizga mu uteŵeti, nangauli tikukumana na masuzgo ghanandi kungatovwira kuti tiŵe na vipambi vya mzimu vinandi.
Pakulongozga mulimo wapadera uwu, Yehova wakutuma ŵangelo ŵake. (Uvu. 14:6) Baibolo likulongora kuti ŵangelo ŵalipo “vikwi makumi kwandaniska na vikwi makumi ghanandi kweniso vikwi vya vikwi.” (Uvu. 5:11) Mwakulongozgeka na Yesu, ŵangelo ŵakovwira ŵateŵeti ŵa Yehova ŵa pa caru capasi. Kasi mukukumbuka fundo iyi para mukupharazga?
Anna wakati: “Nkhukwezgeka nkhumbi para naghanaghanira kuti tikuŵa na ŵangelo pakupharazga. Nkhuwonga comene wovwiri uwo ŵakutipa mwakulongozgeka na Yehova ndiposo Yesu.” Ni mwaŵi wapadera comene kuteŵetera lumoza na ŵangelo ŵakugomezgeka.
Kweni kasi kupharazga na ŵapharazgi ŵanyithu kungatovwira wuli kuti tizizipizgenge? Tili na mwaŵi cifukwa ca kumanyana na wumba ukuru wa Ŵakaboni ŵakugomezgeka. Nchakukayikiska yayi kuti namwe mwawona kuti mazgu gha mu ntharika ya mu Baibolo ngaunenesko. Mazgu agha ghakuti: “Cuma [cisulo] cikunora Cuma, ndipo munthu naye wakunora munthu.”—Zinth. 27:17.
Kupharazga na ŵapharazgi ŵanyithu kukutovwira kuti tisambireko maluso ghanyake agho mutepanji ise tikaghamanyanga yayi. Elżbieta wakati: “Kupharazga na ŵapharazgi ŵakupambanapambana kukunovwira kuti niŵe na mpata wa kulongolera citemwa kwa Ŵakhristu ŵanyane ndiposo ŵanthu awo tikukumana nawo mu uteŵeti.” Yezgani kupharazgira lumoza na ŵapharazgi ŵakupambanapambana. Kucita nthena kumovwiraninge kuwona upharazgi kuŵa wakunozga comene.
Mujipwelelerenge
Kuti tilutilire kupharazga mwamwamphu tikwenera kugaŵa makora nyengo, kuŵa na cizgoŵi ca kusambira patekha ndiposo kupumura mwakukwana. Mukuyowoya kunyake, tikwenera kujipwelelera mwauzimu ndiposo mwakuthupi.
Baibolo likuti: “Maghanoghano gha ŵaphamphu ghakuya ku uzali.” (Zinth. 21:5) Zygmunt, uyo sono wali na vilimika 88 wakati: “Kugaŵa makora nyengo pa kupharazga kukunovwira kuti uteŵeti wane uŵe ŵakukhorweska. Nkhugaŵa makora nyengo mwakuti niŵe na nyengo yinandi yakupharazgira.”
Kumanya makora Malemba kukutikhukiska ndiposo kukutovwira kuti tiŵe ŵakunozgeka kucita uteŵeti. Nga umo tikuryera cakurya cakuthupi kuti tilutilire kuŵa ŵamoyo, kuti tilutilire kupharazga tikwenera kulutilira kurya cakurya cauzimu. Kuŵazga Mazgu gha Ciuta zuŵa na zuŵa ndiposo kurya ‘cakurya pa nyengo yakwenelera’ vingatovwira kuti ticitenge makora uteŵeti withu.—Mat. 24:45-47.
Elżbieta wakasintha vinandi pa umoyo wake mwakuti wapharazgenge comene. Iyo wakuti: “Nacepeskako comene nyengo iyo nkhalaŵiliranga TV mwakuti niŵenge na nyengo yinandi ya kunozgekera upharazgi. Para nkhuŵazga Baibolo mise yiliyose nkhukumbukira ŵanthu awo nkhusangana nawo m’munda. Nkhupenjerezga malemba ndiposo nkhani izo zingaŵawovwira.”
Kupumura mwakukwana kumovwiraninge kuti muŵe na nkhongono zakukwana ndiposo kuti mupharazgenge comene. Papo kucita vyakusanguluska kwa nyengo yitali kungapangiska kuti muleke kucita makora mu uteŵeti. Andrzej, uyo ni mupharazgi wamwamphu wakati: “Kuleka kupumura mwakukwana kungacitiska kuti vileme comene, ndipo cikuŵa cipusu kugongoweskeka. Nkhuyezgayezga kuti nileke kucita ntheura.”—Muph. 4:6.
Nangauli tingayezgayezga kupharazga, kweni mbanthu ŵacoko comene awo ŵakuzomera unenesko. Kweni Yehova wazamuluwa yayi ivyo tikucita. (Heb. 6:10) Nangauli ŵanandi ŵangakhumba yayi kuyowoya nase, kweni para tawukapo pa nyumba zawo ŵangamba kudumbiskana za ise. Ico cingacitika cingayana na ivyo tikuŵazga vyakukhwaskana na Ezekiyeli, kuti: “Kweni tiŵamanye kuti yikaŵamo nchimi mukati mwawo.” (Ezek. 2:5) Kuyowoya unenesko, nchipusu yayi kupharazga, kweni kuli na vyandulo kwa ise ndiposo kwa ŵanthu awo tikuŵapharazgira.
Zygmunt wakati: “Kupharazga kukutovwira kuti tivware wunthu uphya ndiposo kuti tilongore kuti tikutemwa Ciuta na ŵazengezgani ŵithu.” Andrzej wakati: “Ni mwaŵi ukuru comene kucita mulimo uwu, uwo ukuponoska ŵanthu. Uzamucitikaso nga umo ukucitikira sono yayi, ndipo uzamucitika mu mikhaliro yakuyana na iyo caru cilimo sono yayi.” Namwe mungasanga vitumbiko vinandi comene usange mungazizipizga mu uteŵeti.—2 Kor. 4:1, 2.
[Cithuzithuzi pa peji 31]
Kujipwelelera mwauzimu ndiposo mwakuthupi kukutovwira kuti tizizipizgenge mu uteŵeti