Nkhuwonga Nangauli Nakumana na Masuzgo Umo Baibolo Likanovwilira Kuzizipizga

Nga ni umo yikayowoyekera na Enrique Caravaca Acosta

Pakaŵa pa Epulero 15, 1971. Nkhalutanga kukawona ŵapapi na ŵabali ŵane awo ŵakakhalanga ku munda withu. Pakuti ku nyumba nkhafumako kwa nyengo yitali, nkhanweka comene kuti nkhawoneso ŵabali ŵane. Nkhamanyanga yayi usange wose namuŵasanga pakaya, ndiposo uyo wamwamba kunipokelera. Nkhati nafika, wofi ukanikora comene apo nkhasanga kuti ŵanthu ŵanayi ŵakomeka, kusazgapo amama.

MAHARA ghakanimalira. Nkhajifumba kuti, cacitika nchivici? Niciteci? Nkhasanga pa nyumba pali yii, ndipo cakuti nicite cikanisoŵa. Pambere nindalutilire kulongosora, lekani nimuphaliraniko pacoko waka umo nkhakulira. Nkhumanya kuti ndipo mupulikiskenge makora umo nkhajipulikira na masuzgo agha ndiposo ghanyake agho ghakaniwira.

Tikasanga Unenesko

Nkhababikira ku Quirimán, kufupi na msumba wa Nicoya ku Costa Rica. Mu 1953, apo nkhaŵa na vilimika 37, nkhakhalanga na ŵapapi ŵane ku munda withu. Nangauli tikakulira mu cisopa ca Katolika, tikaŵa ŵakukondwa yayi na visambizgo vinyake ndipo tikaŵaso na mafumbo ghanandi agho ghakazgorekanga yayi.

Zuŵa linyake namulenji, mwanalume munyake, zina lake Anatolio Alfaro wakiza ku nyumba kwithu ndipo wakaticiska kuti tisambirenge Baibolo. Wakatiphalirako malemba ghanandi ndiposo visambizgo vya mu Baibolo. Adada, amama, munung’una wane munyake, mudumbu wane na munyake uyo tikakhalanga nayo, tose tikakhala pasi na kutegherezga. Tikadumbirana zuŵa lose mpaka usiku. Tikamufumba mafumbo ghanandi.

Anatolio wakagona ndipo zuŵa linyake wakatandaraso nase. Tikaŵa ŵakukondwa comene na ivyo tikapulika ndipo tikakondwaso comene apo wakatizgora mafumbo ghithu mwakugwiliskira nchito Baibolo. Cidumbirano ici cikatikhwaska comene. Tikaghanaghanirapo ivyo tikasambira, ndipo tikamanya kuti tasanga unenesko. Anatolio wakatilekera mabuku ghakulongosora Baibolo. Namise, tose nga ni mbumba tikaŵazganga mabuku agha. Kweni suzgo ilo tikaŵa nalo ndakuti tikaŵavya magesi. Pambere tindambe kusambira, waliyose wakatoranga cigudulu na kudika ku malundi kuti nyimbu zileke kumuluma.

Pakati pajumpha myezi yinkhondi na umoza, ŵabali ŵane ŵankhondi, kusazgapo ŵapapi ŵane na ine tikabapatizika. Tikamba kwenda ku nyumba na nyumba kuphalirako ŵanji ivyo tikasambira. Tikendanga pasi kwa maora ghaŵiri ndipo nyengo zinyake tikakweranga haci kuti tikawungane na Ŵakaboni ŵa Yehova ŵanyithu awo ŵakaŵa mu msumba wa Carrillo. Anatolio wakalutilira kwiza ku nyumba yithu kuzakatisambizga Baibolo. Pamasinda tikamba kuwungana mu nyumba yithu, ndipo pakaŵanga ŵanthu ŵankhondi na ŵatatu. Pamasinda, wose ŵakabapatizika. Mwaluŵiro gulu ili likakura ndipo likaŵa mpingo ucoko wa ŵanthu 20.

Kucita Mulimo wa Ciuta Nyengo Zose

Nyengo yikati yajumphapo, ofesi ya Ŵakaboni ŵa Yehova ya ku Costa Rica yikakhumbanga awo ŵangacita mulimo wa kupharazga nyengo zose. Mu 1957, nkhazomera kucita mulimo wa kupharazga nyengo zose. Mulimo uwu ukaŵa wakukondweska comene. Kanandi nkhendanga nekha kwa maora ghanandi kuti nkhapharazgire ŵanthu ŵa ku mizi. Nyengo zinyake ŵanthu ŵakanipokeleranga yayi. Nkhukumbuka kuti katatu kose ŵanalume ŵanyake ŵakiza na maphwitika, ŵakamba kunifumba kuti ndine njani ndipo nkhucitaci.

M’ma 1950 kukaŵavya misewu yinandi kweni kukaŵa waka tunthowa twamuswaswayira, ndipo cikaŵa cakusuzga kufikira ŵanthu. Kuti tifike ku vigaŵa vinyake, tikeneranga kukwera haci. Tikambukanga milonga ndipo nyengo zinyake tikagonanga pawaro. Nyimbu zikatisuzganga comene. Kweniso tikeneranga kucenjera na njoka ndiposo ng’wina. Nangauli tikaŵa na masuzgo agha, kweni nkhakondwanga comene kovwira ŵanthu kuti ŵamanye Yehova Ciuta. Para nafika pa nyumba, nkhakondwanga comene cifukwa ca kusambizga ŵanji unenesko wa mu Baibolo. Apo nkhapharazganga na kusambira Baibolo zuŵa lililose, ubwezi wane na Yehova Ciuta ukakhora comene, ndipo nkhajipulikanga kuti nili nayo pafupi comene.

Nyengo yikati yajumphapo nkhapika milimo yakusazgikira. Kwa vilimika vyakujumpha khumi, nkhateŵeteranga nga ni mulaŵiliri wakwendakwenda, sabata yiliyose nkhenderanga mipingo yakupambanapambana na kuyikhozga. Nangauli cifukwa ca ulwari nkhaleka mulimo uwu, kweni nkhalutilira kupharazga nyengo zose.

Soka Likaniwira

Apo nkhaŵa ku Nicoya, mu 1971, nkhanyamuka kuti nkhawone ŵabali ŵane. Nkhati nafika pa nyumba, nkhasanga amama, awo ŵakaŵa na vilimika 80 ŵali pasi. Ŵakalasika na futi na kugwazika na cimayi. Nkhati nasindama na kuŵakora, nkhasanga kuti ŵacali kuthuta. Nyengo yikati yajumphapo pacoko, ŵakanifwira mu mawoko. Nkhati nalaŵiska mu khicini nkhawona wanchito, uyo wakaŵa na nthumbo ya myezi yinkhondi na yitatu, wati gada. Nayo wakaŵa kuti wafwa. Nkhawonaso Mkhristu munyithu nayo wafwira pa balaza ndipo mwana msepuka wa wanchito withu wakomekera mu bafa. Wose aŵa ŵakagwazika na cimayi na kulasika na futi. Nkhajifumba kuti, ‘Kasi ni njani uyo wacita vinthu ivi, ndipo cifukwa wuli?’

Nkhati nafumira kuwaro, nkhasanga adada ŵalasika na futi ku mutu kweni ŵakaŵa ŵacali ŵamoyo. Nkhacimbilira ku nyumba ya munung’una wane, iyo yikaŵa pa mtunda wakwenda maminiti 15. Nkhapulika kuti mwanakazi munyake na mwana wake msepuka ŵakomeka. Mahara ghakanimalira nati napulika kuti uyo wacita vinthu vyose ivi ni muphwa wane wa vilimika 17, uyo wakaŵa Kaboni wa Yehova yayi, ndipo mutu wake ukazempha. Wakacimbira mu cikaya. Ŵapolisi ŵakamba kumupenja comene. Kakaŵa kakwamba mu caru ca Costa Rica kuti munthu wapenjeke nthena.

Nkhani iyi yikamanyikwa mu caru cithu. Pakati pajumpha sabata yimoza, ŵapolisi ŵakamusanga, wakaŵa na cimayi cikuru na futi iyo munthu munyake wakamuguliska nangauli wakamanyanga kuti wakaŵa wakuzempha mutu. Muphwa wane wakalasika na kukomeka apo ŵakakhumbanga kumukora.

Pambere wandakoleke, ŵanandi ŵakaniphalira kuti nifumeko ku cigaŵa ici cifukwa ŵakawopanga kuti panji muphwa wane wangiza na kuzakanipweteka. Nkhalomba kwa Ciuta cifukwa nkhawona kuti nkheneranga kukhala pamoza na ŵabali ŵane awo ŵakapona ndiposo na mpingo. Ntheura nkhafumako yayi.

Masoka Ghakalondezgana Waka

Adada ŵakafwa pakati pajumpha cilimika cimoza. Cilimika cakulondezgapo, mudumbu wane, uyo wakaŵa muteŵeti wa Yehova wakugomezgeka nayo wakakomeka na ŵanthu ŵanyake. Ŵabali ŵane wose ŵakaŵaso na citima cifukwa ca kutaya mbali wawo munyake. Ningalongosora yayi citima ico ise na ŵabwezi ŵithu tikaŵa naco. Kweni nyengo yose iyi, nkhagomezganga comene Yehova ndipo nkhulutilira kumulomba kuti wanipe nkhongono.

Mu 1985, nkhaluta ku sukulu ya ŵalara Ŵacikhristu iyo yikacitika mazuŵa ghatatu, mu msumba ukuru wa San José. Paumaliro wa sukulu iyi, nkhakhozgeka comene mwauzimu. Pa Mande mulenji nkhanyamuka kuti niwelere ku nyumba. Apo nkhaŵa pafupi na siteji, ŵankhungu ŵakaniwukira, ŵakanikhinya ku singo na kunipoka katundu wane. Vikacitika mwaluŵiro comene mwakuti visko vyawo nkhaviwona yayi. Nkhatondeka na kuyowoya nga umo ŵanthu ŵa ku Costa Rica ŵakuyowoyera cifukwa ca kupwetekeka. Ku cigaŵa ca Guanacaste ŵanalume ŵakutemwa kucemerezga panji kubangura para ŵakumana ndiposo para ŵakutawuzgana, panji para ŵafika pa malo. Pambere ivi vindacitike, nane nkhacemerezganga pakuyowoya, kweni pa nyengo iyi nkhatondeka.

Mu 1979, nkhatora Celia, uyo nayo wakaŵa yumoza wa Ŵakaboni ŵa Yehova, mu mpingo uwo ukaŵa pafupi na withu. Celia wakatemwanga Baibolo. Zuŵa lililose, tikaŵazganga na kusambira Baibolo pamoza. Kweni wakafwa na nthenda ya khansa mu Julayi, 2001. Nyengo zinyake nkhuŵa na phukwa, kweni cigomezgo cakuti ŵakufwa ŵazamuwuka cikunikhozga.—Yohane 5:28, 29.

Ndine Wakukondwa Nangauli Nakumana na Masuzgo

Nangauli nakumana na masuzgo ghanandi kuluska agho ŵanthu ŵanandi ŵakumanapo nagho, kweni nkhuwona kuti masuzgo agha ghanipa mwaŵi wakuti nilongore cipulikano cane ndiposo kugomezgeka kwane kwa Yehova. (Yakobe 1:13) Kuti nileke kudandaura comene na ivyo vyanicitikira, kanandi nkhukumbuka fundo yakuti vinthu vyamabuci ‘vikuwira wose.’ (Mupharazgi 9:11) Kweniso nkhukumbuka kuti agha ni “mazuŵa ghaumaliro” ndipo ŵanthu mbakofya, mbankhaza, ndiposo mbambura kujikora. (2 Timote 3:1-5) Nkhukumbukaso Yobu, uyo nangauli wakasuzgika, ŵana ŵake wose ŵakafwa, iyo ŵakalwara, ndiposo wakataya vinthu vyake vyose, kweni wakati: “Litumbikike zina la Yehova.” Ndipo Yehova wakamutumbika Yobu cifukwa ca kunyoloka kwake. (Job 1:13-22; 42:12-15) Fundo za mu Baibolo izi zanovwira kuti nilutilire kuŵa wakukondwa nangauli nakumana na masuzgo ghanandi.

Nyengo zose Yehova wanovwira kuti nilutilire kumuŵika pakwamba mu umoyo wane. Kuŵazga Baibolo zuŵa lililose, kwanipembuzga comene ndipo kwanovwira kuti niŵe na nkhongono zakuzizipizgira. Para nkhulomba kwa Yehova, nkhusangwa na “mtende wa Ciuta uwo ukuluska ghanoghano lililose.” (Ŵafilipi 4:6, 7) Ici cikunipa mtende wa mu mtima. Kufika pa maungano gha Cikhristu ndiposo kuzgorapo, nako kwanikhozga comene.—Ŵahebere 10:24, 25.

Nangauli nacekura, nkhuwonga comene Yehova kuti nicali na nkhongono za kuteŵetera lumoza na Ŵakhristu ŵanyane, kusambizga ŵanji Baibolo, ndiposo kupharazga. Kuteŵetera ŵanji mu nthowa izi kukunipa nkhongono zakuzizipizgira masuzgo. Nkhuwonga comene Yehova kufumira pasi pa mtima wane, nangauli nakumana na masuzgo pa umoyo wane.a

[Mazgu ghamusi]

[Mazgu Ghakukhozgera pa peji 30]

Kuŵazga Baibolo zuŵa lililose, kwanipembuzga comene ndipo kwanovwira kuti niŵe na nkhongono zakuzizipizgira

[Cithuzithuzi pa peji 29]

Apo nkhayowoya nkhani ya Baibolo kakwamba

[Cithuzithuzi pa peji 30]

Mu uteŵeti wa m’munda, vilimika vyakumanyuma