Kasi Ŵapapi Ndiwo Ŵakwenera Kunisankhira Cisopa?

KU Poland, ŵanthu ŵanandi ŵakuphalira Ŵakaboni ŵa Yehova kuti, “Nkhababikira mu cisopa ico nili ndipo nizamufwira mwenemumo.” Fundo iyi yikulongora kuti ŵakuwona kuti ŵanthu ŵakwenera yayi kusintha cisopa ico ŵali kubabikiramo. Kasi ndimo viliriso mu cigaŵa cinu? Nchivici ico kanandi cikucitika cifukwa ca kuŵa na maghanoghano ghanthena? Ŵanthu ŵakwamba kusopa mwadango waka, mwakulondezga waka ŵapapi ŵawo. Kasi Ŵakaboni ŵa Yehova awo ŵali kucita kusambira unenesko kwa ŵapapi ŵawo panji ŵasekuru ŵawo ŵangaŵa na maghanoghano ghakuyana waka?

Ndimo vikaŵira na Timote yayi, uyo wakasambizgika na ŵanyina ndiposo ŵabuya ŵake kuti watemwenge Ciuta. Timote wakamanya malemba “kufuma pa ubonda.” Pakati pajumpha nyengo, Timote lumoza na ŵanyina ndiposo ŵabuya ŵake ŵakakhorwa kuti ivyo ŵakasambiranga ku Chikhristu ukaŵa unenesko. ‘Wakakhorwa na kugomezga’ ivyo wakasambira mu Malemba vyakukhwaskana na Yesu Khristu. (2 Tim. 1:5; 3:14, 15) Nangauli mazuŵa ghano ŵapapi awo Mbakhristu ŵakuyezgayezga kovwira ŵana ŵawo kuti ŵateŵetere Yehova, ŵana iwoŵene ndiwo ŵakwenera kunwekera kuteŵetera Yehova.—Mrk. 8:34.

Waliyose wakwenera kughanaghanirapo na kukhorwa usange wakukhumba kuteŵetera Yehova cifukwa cakuti wakumutemwa. Wakweneraso kuŵa wakugomezgeka nyengo zose. Usange viŵenge nthena, mbwenu cipulikano cake ciŵenge cakukhora ndiposo cakukhozgeka pa lufura.—Efe. 3:17; Kol. 2:6, 7.

Mulimo wa Ŵana

Albert, uyo wali kubabikira mu mbumba ya Ŵakaboni wakayowoya kuti: “Nyengo zose nkhaghanaghananga kuti cisopa ca Ŵakaboni ŵa Yehova nchaunenesko, kweni cikaniŵiranga cinonono kuzomera ivyo ŵakayowoyanga vyakukhwaskana na umo ningacitira na umoyo wane.”a Usange ndimwe muwukirano, panji ndimo namwe mukughanaghanira. Kasi mwalekeraci kusanda mwakuti muwone ivyo Ciuta wakukhumba kuti ticitenge na kuŵa ŵakukondwa pakucita khumbo lake? (Sal. 40:8) Albert wakati: “Nkhamba kulomba. Pakwamba cikaŵa cakusuzga. Nkhacitanga kujicicizga kuti nilombenge. Ndipouli, pakajumpha nyengo yitali yayi, nkhajipulikanga kuti ningaŵa wakuzirwa pa maso pa Ciuta usange ningamba kucita ico nchakwenelera. Ici cikanovwira kuti nisinthe vigaŵa ivyo vikakhumbikwiranga kusintha.” Kuyezgayezga kuti tiŵe paubwezi na Yehova kungatovwira kuti tinwekerenge kucita ivyo iyo wakukhumba.—Sal. 25:14; Yak. 4:8.

Ghanaghanirani za maseŵero agho mukughatemwa comene, nga ni bola panji ghalighose. Usange mukumanya yayi malango, mungaseŵera makora yayi, mungakondwa yayi. Kweni usange mwamanya malango ghake na kuseŵera makora, asi munganwekera maseŵera agha mutepanji kujiwombolera nyengo ya kuseŵelera? Ndimo viliriso na cisopa caunenesko. Ŵani na nyengo yakunozgekera maungano Ghacikhristu. Muyowoyengepo para mwapika mwaŵi. Kwali ndimwe ŵa msinkhu wuli, ŵanji ŵangakhozgeka cifukwa ca ciyelezgero cinu.—Heb. 10:24, 25.

Ndimo vikuŵiraso para mukuphalira ŵanji cipulikano cinu. Mukwenera kucita nthena cifukwa ca citemwa, cifukwa ca kucicizgika yayi. Jifumbani kuti: ‘Cifukwa wuli nkhukhumba kuphalira ŵanji za Yehova? Cifukwa wuli nkhutemwa Yehova?’ Mukwenera kumanya kuti Yehova ni Dada wacitemwa. Yehova wakayowoya kwizira mwa Yeremiya kuti: “Muti mundipenje na kundisanga; para mukundipenja na mtima winu wose.” (Yer. 29:13, 14) Kasi ni vinthu wuli ivyo vikukhumbikwa kuti tipenje Yehova? Jakub wakati: “Nkhasintha maghanoghano ghane. Nkhasangikanga pa maungano ndiposo kunjira mu uteŵeti wa m’munda kufuma apo nkhaŵa mucoko, vyose ivi nkhacitanga mwadango waka. Kweni nkhati namanya makora Yehova na kuŵa nayo paubwezi nkhamba kulondezga nadi unenesko.”

Para munthu wakusangwa na uteŵeti wa m’munda, mendezgano ghake ghakuŵa ghawemi. Lemba la Zintharika 13:20 likuti, “Uyo wakwenda na ŵavinjeru naye tiwaŵe wavinjeru, kweni mulongozgani wa vindere tiwapwetekekenge.” Ntheura mwendezganenge na awo ŵakutemwa vinthu vyauzimu ndiposo awo ŵakusangwa na kuteŵetera Yehova. Jola wakati: “Nawona kuti kwendezgana na ŵawukirano awo ŵakutemwa vinthu vyauzimu nkhwakukhozga. Nkhamba kunjira mu uteŵeti wa m’munda nyengo zose ndipo nkhakondwanga comene.”

Mulimo wa Ŵapapi

Jola wakati: “Nili wakukondwa comene cifukwa ŵapapi ŵane ŵakanisambizga za Yehova.” Ndipo nadi, ŵapapi ŵangawovwira comene ŵana ŵawo kucita vinthu vyamahara. Mpositole Paulosi wakalemba kuti: “Imwe ŵawiskewo, . . . lutilirani kuŵalera mu kulanga na kuŵasambizga maghanoghano gha Yehova.” (Efe. 6:4) Ulongozgi wa mu Malemba uwu, ukuyowoya mwakupulikikwa makora kuti ni mulimo wa ŵapapi kusambizga ŵana ŵawo nthowa za Yehova, za iwoŵene cara. M’malo mwa kusambizga ŵana ŵinu vinthu ivyo mwaŵene mukukhumba, cingaŵa ciwemi usange mungaŵawovwira kuti ŵacitenge vinthu mwakuyana na khumbo la Yehova.

Mungasambizga ŵana ŵinu mazgu gha Yehova na ‘kuyowoyeskana nawo para mukukhala mu nyumba yinu, na para mukwenda mu nthowa, na para mwagona pasi, na para mwawukapo.’ (Dute. 6:6, 7) Ewa na Ryszard awo ŵali na ŵana ŵatatu ŵanyamata ŵakati: “Tikadumbiskananga za vigaŵa vyakupambanapambana vya uteŵeti wanyengozose.” Ndipo nchivici cikacitika? “Ŵana ŵawo ŵanyamata ŵakakhumbanga kulembeska mu Sukulu ya Uteŵeti wa Ciuta apo ŵakaŵa ŵacoko comene, ŵakakhumbanga kuŵa ŵapharazgi ŵambura kubapatizika, ndipo nyengo yikati yajumphapo, ŵekha ŵakasankha kuti ŵabapatizike. Ŵati ŵabapatizika ŵakamba uteŵeti wanyengozose.”

Ciyelezgero ciwemi ca ŵapapi nchakuzirwa comene. Ryszard uyo ni mupapi wakati: “Tikaŵa na umoyo waupusikizgi yayi, kucita vinthu mu nthowa yinyake ku nyumba, ndiposo mu nthowa yinyake mu mpingo.” Ntheura, jifumbani mwaŵene kuti: ‘Kasi ŵana ŵane ŵakuniwona wuli? Kasi ŵakuwona kuti nkhutemwa Yehova? Kasi ŵakumanya kuti nkhutemwa Yehova kwizira mu malurombo ghane na sambiro la namwene? Kasi umo nkhuwonera uteŵeti wa m’munda, vyakusanguluska, vinthu vyakuthupi ndiposo ivyo nkhuyowoya vyakukhwaskana na ŵabali na ŵadumbu mu mpingo, vikuŵalongora kuti nkhutemwa Yehova?’ (Luka 6:40) Ŵana ŵakuwona ivyo mukucita na kuyaniska na ivyo mukuyowoya.

Kuti ŵana ŵakule makora, nchakuzirwa comene kuŵalanga. Ndipouli, Baibolo likutiphalira kuti tikwenera ‘kulera mwana mu nthowa iyo wakwenera kwendamo.’ (Zinth. 22:6) Ewa na Ryszard ŵakati, “Tikasambizganga Baibolo mwana waliyose payekha.” Nakuti, ni mulimo wa ŵapapi kuwona usange ŵasambizgenge mwana waliyose payekha. Kweni fundo njakuti, mwana waliyose wakukhumbikwira kumuwona kuŵa munthu payekha. Kuti viŵe nthena, mukwenera kufwatuka nawo pakucita vinthu ndiposo kuŵacindika. Mwaciyelezgero, m’malo mwa kuŵaphalira waka kuti sumu zinyake izo ŵakupulikizga ni ziheni, mwalekeraci kuŵasambizga umo ŵangamanyira sumu ziwemi, ndiposo umo ŵangalondezgera fundo za mu Baibolo?

Ŵana ŵinu ŵangamanya makora ivyo imwe mukukhumba kuti ŵacitenge ndipo ŵangamba kucita kuyana na khumbo linu. Kweni mukwenera kuŵafika pa mtima. Kumbukani kuti, “Fundo mu mtima wa munthu yikukozgana na ndimba ya maji, kweni munthu wa umanyi tiwaneghepo.” (Zinth. 20:5) Ŵani maso, kuwona suzgo lililose ilo ŵangaŵa nalo, leneilo lingaŵatondeska kuzomera unenesko ndipo ŵawovwirani nyengo yeneyiyo. Kwambura kuŵayuyura, longorani kuti mukuŵafipira mtima ndipo ŵafumbani mafumbo ghakwenelera. Ndipouli, mungaŵafumbanga mafumbo ghanandi comene yayi. Ivyo muyowoyenge viŵafikenge pa mtima ndipo vimovwiraninge kuti muŵawovwire.

Mulimo wa Mpingo

Pakuti ndimwe yumoza wa ŵateŵeti Ciuta, kasi mungawovwira ŵawukirano mu mpingo kuti ŵatemwenge vinthu vyauzimu ivyo ŵali kuhara? Nangauli ŵapapi ŵali na mulimo wa kusambizga ŵana ŵawo, ŵabali na ŵadumbu mu mpingo nawo ŵangawovwira, comenecomene ŵalara. Nchakuzirwa comene kovwira awo ŵakukhala mu mbumba izo mupapi munyake njumoza wa Ŵakaboni ŵa Yehova yayi.

Kasi ŵalara ŵangawovwira wuli ŵawukirano kutemwa Yehova na kujiwona kuti mbakuzirwa? Mariusz uyo ni mulara mu mpingo unyake ku Poland, wakati: “Ŵalara ŵakwenera kudumbiskana, kudumbiskana, kudumbiskana na ŵawukirano. Ŵakwenera kudumbiskana nawo para pali suzgo pera cara, kweni nyengo zose, kwali ni mu uteŵeti wa m’munda ndiposo pamanyuma pa maungano.” Kasi mwaŵafumbapo ŵawukirano kuti mumanye umo ŵakuwuwonera mpingo? Kudumbiskana nawo mwakufwatuka ndiposo mwaubwezi kukovwira kuti ŵamanye kuti nawo nchigaŵa ca mpingo.

Usange ndimwe mulara, kasi mukucitaci kuti muŵamanye makora ŵawukirano mu mpingo winu? Nangauli ni mulara, Albert, uyo wazunulika ku uyambiliro wa nkhani iyi, nayo wakakumana na viyezgo vinandi apo wakaŵa muwukirano. Iyo wakati: “Pakuŵa muwukirano, nkhakhumbikwiranga kukhozgeka na ŵalara.” Ŵalara ŵangalongora kuti ŵakutemwa ŵawukirano mwa kuŵalombera kuti ŵaŵe paubwezi na Yehova ndiposo kuti ŵamuteŵeterenge na mtima wose.—2 Tim. 1:3.

Nchiwemi comene kuti ŵawukirano ŵacitenge vinthu lumoza na mpingo. Usange ŵacitenge yayi vinthu lumoza na mpingo, mbwenu ŵangamba kutangwanika na vinthu vyacaru. Kasi mungateŵetera nawo lumoza m’munda na kuŵa nawo paubwezi? Mungacitira lumoza vinthu vyakusanguluska ivyo vingawovwira kuti muŵe paubwezi ndiposo kugomezgana. Jola wakukumbuka kuti, “mupayiniya munyake wakanitemwanga comene. Nkhanjira na iyo mu uteŵeti wa m’munda kwanyengo yakwamba cifukwa cakuti nkhakhumba ndine.”

Wanangwa Winu wa Kusankha

Ŵawukirano, jifumbani kuti: ‘Kasi nili na vilato wuli vyauzimu? Usange nindabapatizike, kasi nkhukhumba kuti nibapatizike?’ Mukwenera kusankha mwekha kufuma pasi pa mtima kuti mukukhumba kubapatizika cifukwa cakuti mukutemwa Yehova, cifukwa ca kopa ŵa mu mbumba yinu yayi.

Enya, mphanyi Yehova waŵa Mubwezi winu wa pa mtima, ndipo unenesko uŵe usambazi winu. Yehova wakayowoya kwizira mwa nchimi Yesaya kuti: “Ungofiwanga [cara], cifukwa Ine ndine Ciuta wako.” Usange Yehova ni mubwezi winu, waŵenge namwe nyengo zose. Wamukhozganinge na ‘kumufighilirani na woko lake la malyero ilo ndakutonda vyose.’—Yes. 41:10.

[Mazgu ghamusi]

[Cithuzithuzi pa peji 4]

Manyani ivyo vili mu mtima wa mwana winu

[Cithuzithuzi pa peji 6]

Mukwenera kusankha mwekha kuti mubapatizike cifukwa cakuti mukutemwa Yehova