Kasi Mukuzomerezga Kuti Yehova Wamufumbani?
BAIBOLO lili na mafumbo ghanandi agho ghangawovwira munthu kujisanda. Nakuti Yehova Ciuta wakufumba mafumbo kuti wasambizge fundo zakuzirwa. Mwaciyelezgero, apo Yehova wakacenjezganga Kayini kuti waleke nthowa yake yiheni, wakamufumba mafumbo ghanandi. (Gen. 4:6, 7) Nyengo zinyake, Yehova wakafumbanga waka fumbo limoza ilo likakhuŵilizganga munthu kucitapo kanthu mwaluŵiro. Yehova wakati wafumba kuti: “Kasi nditume njani? Ndi njani tiwalutire ise?” Nchimi Yesaya yikazgora kuti: “Ndine pano; nditumani!”—Yes. 6:8.
Yesu, Msambizgi Waluso nayo wakafumbanga mafumbo. Mu mabuku gha Mateyu, Mariko, Luka, na Yohane muli mafumbo ghakujumpha 280 agho Yesu wakafumba. Nangauli nyengo zinyake Yesu wakafumbanga mafumbo kuti wacetamiske awo ŵakamususkanga, kweni kanandi wakafumbanga kuti waconthe mitima ya ŵategherezgi, kuŵaciska kuti ŵasande umoyo wawo wauzimu. (Mat. 22:41-46; Yoh. 14:9, 10) Mpositole Paulosi, uyo wakalemba mabuku 14 gha mu Baibolo, nayo wakafumbanga mafumbo mwakukopa. (Rom. 10:13-15) Mwaciyelezgero, mu kalata iyo wakalembera Ŵaroma muli mafumbo ghanandi. Mafumbo gha Paulosi ghakuciska awo ŵakuŵazga kuti ŵamanye ‘kunyang’amira kwa usambazi na vinjeru vya Ciuta!’—Rom. 11:33.
Nangauli mafumbo ghanyake ghakukhumba zgoro lakufuma pa mulomo, kweni ghanyake ghakuciska munthu kuti waghanaghanirengepo. Mu mabuku gha Mateyu, Mariko, Luka, na Yohane muli mafumbo ghanandi agho Yesu wakafumbanga kuti wawovwire ŵanthu kughanaghanirapo. Pa nyengo yinyake, Yesu wakacenjezga ŵasambiri ŵake kuti: “Cenjerani na cilungo ca Ŵafarisi na cilungo ca Herode,” kung’anamura upusikizgi wawo na visambizgo vyautesi. (Mrk. 8:15; Mat. 16:12) Ŵasambiri ŵakapulikiska yayi fundo ya Yesu ndipo ŵakamba kukwesana cifukwa cakuti ŵakaluwa kuyegha cingwa. Wonani umo Yesu wakafumbira mafumbo. “Wakati kwa iwo: ‘Cifukwa wuli mukukwesana pa fundo yakuti mulije vingwa? Kasi mucali mundapulikiske na kumanya ng’anamuro? Kasi muli na mitima yambura kupulikiska? “Nangauli muli na maso, kasi mukuwona cara; ndipo nangauli muli na makutu, kasi mukupulika cara?” . . . Kasi mucali mundamanye ng’anamuro lake?’” Yesu wakafumba mafumbo agha kuti ŵasambiri ŵake ŵaghanaghanirepo ivyo wakayowoya.—Mrk. 8:16-21.
“Tindikufumbe”
Yehova Ciuta wakafumba mafumbo kuti wawovwire muteŵeti wake Yobu kusintha maghanoghano. Kwizira mu mafumbo ghanandi, Yehova wakawovwira Yobu kumanya umo wakaŵira mucoko pamaso pa Mlengi. (Job cipaturo 38 mpaka 41) Kasi Yehova wakakhumbanga kuti Yobu wamuzgore mafumbo agha? Viŵi yayi. Vikuwoneka kuti mafumbo nga ni, “Kasi iwe ukaŵankhu para nkhazika malufura gha caru?” ghakaŵa ghakuti ghaciske Yobu kuti waghanaghanirepo. Yobu wati wafumbika mafumbo ghanyake wakakhala waka cete. Wakayowoya waka kuti: “Kasi tindimuzgoreni kanthu wuli? Ndakora waka pa mulomo na woko bwa.” (Job 38:4; 40:4) Yobu wakatorapo sambiro ndipo wakajicefya. Ndipouli, Yehova kuti wakasambizganga Yobu kuŵa waka wakujicefya yayi. Yobu wakasintha maghanoghano. Mu nthowa wuli?
Nangauli Yobu wakaŵa “munthu muwemi wakufikapo na wakunyoloka,” nyengo zinyake mazgu ghake ghakalongoranga kuti wakaŵa na maghanoghano ghakubudika. Elihu wakaghawona maghanoghano agha ndipo wakacenya Yobu cifukwa ca “kujirunjiska mu maso gha iye mwene, gha Ciuta cara.” (Job 1:8; 32:2; 33:8-12) Ntheura, mafumbo gha Yehova ghakawovwiraso Yobu kusintha maghanoghano. Pakuyowoya na Yobu mu kavuluvulu, Ciuta wakati: “Ndinjani uyo wabinkhiska fundo ya wupu na mazgu ghambura mahara? Vwara zikhore mu ciwuno mwako ngati mwanalume, tindikufumbe ndipo iwe tiundizgore.” (Job 38:1-3) Pamanyuma pa mafumbo agha, Yehova wakavumbura vinjeru na nkhongono zake zambura cigoti ivyo vikuwoneka mu milimo yake yakuzizwiska. Ivi vikawovwira Yobu kugomezga comene weruzgi wa Yehova ndiposo umo wakucitira vinthu. Cikaŵa cinthu cakutenthemeska comene kwa Yobu kufumbika mafumbo na Ciuta Wankhongonozose.
Umo Tingazomerezgera Yehova Kutifumba Mafumbo
Wuli pakuyowoya za ise? Kasi nase tingasanga candulo na mafumbo agho ghali mu Baibolo? Enya. Para tikukhala dankha cete na kughanaghanira pa mafumbo agha, tingasanga candulo mwauzimu. Mafumbo ghankhongono agho ghali mu Baibolo ghakovwira kuti liŵe lankhongono comene. Nadi, “mazgu gha Ciuta ngankhongono, . . . nakuti ghakumanya kupanikizga maghanoghano na makhumbiro gha mtima.” (Heb. 4:12) Ndipouli, kuti tisange candulo, tikwenera kughawona nga ni para Yehova wakafumbanga ise patekha. (Rom. 15:4) Tiyeni tiwone viyelezgero vinyake.
“Asi Mweruzgi wa caru cose tiwacite urunji?” (Gen. 18:25) Abrahamu wakafumba fumbo ili apo Yehova Ciuta wakaŵa pafupi kweruzga Sodomu na Gomora. Abrahamu wakawona kuti nchambura macitiko kuti Yehova wacite mwambura urunji, kukoma ŵarunji pamoza na ŵaheni. Fumbo la Abrahamu likulongora kuti wakagomezganga fikepo kuti Yehova ni murunji.
Mazuŵa ghano, ŵanji ŵakutemwa kusacizga umo Yehova wazamweruzgira ŵanthu munthazi. Ŵakuyowoya za awo ŵazamupona pa Haramagedoni panji awo ŵazamuwuskika. M’malo mwa kutimbanizgika na maghanoghano ghanthena, tikumbukenge fumbo la Abrahamu. Nga ni Abrahamu, nase tikumanya kuti Yehova ni Dada walusungu, kweniso tikugomezga kuti ni murunji ndiposo wacisungusungu, lekani tikufipa mtima yayi na vinthu vyambura kwenelera panji vyakugongoweska, nesi kutangwanika na nkhani zambura kwenelera.
“Ni njani wa imwe uyo mwa kwenjerwa wangamanya kusazgako mkono umoza ku umoyo wake?” (Mat. 6:27) Pakuyowoya na mzinda ukuru kweniso ŵasambiri ŵake, Yesu wakafumba fumbo ili kuti wayowoye uwemi wa kuthemba Yehova. Mazuŵa ghaumaliro gha mgonezi uheni uwu ghali na vinthu vinandi ivyo tingenjerwa navyo, kweni nanga tingaŵika mtima withu pa vinthu ivi tingasazgirako yayi umoyo withu panji kusintha umoyo withu kuti uŵe uwemi.
Nyengo zose para tamba kwenjerwa cifukwa ca umoyo withu panji wa ŵanyithu, tingawona vinthu mwakwenelera usange tikukumbuka fumbo la Yesu ili. Lingatovwira kuti tiwuskemo vyenjezgo na maghanoghano ghaheni agho ghangatigulura nkhongono. Yesu wakutisimikizgira kuti Yehova, Ŵadada ŵithu ŵakucanya, awo ŵakulyeska viyuni vya mdera na kuvwalika vyakumera vya mu thengere, ŵakumanya makora comene ivyo tikusoŵerwa.—Mat. 6:26-34.
“Kasi munthu wangatora moto mu cifuŵa cake ndipo vyakuvwara vyake vileke kuphya?” (Zinth. 6:27) Vipaturo vyakwambilira vinkhondi na vinayi vya buku la Zintharika vili na nkhani za dada uyo wakusambizga mwana wake vinjeru. Fumbo ili likuyowoya za uheni wa uleŵi. (Zinth. 6:29) Usange tikuphatanaphatana na munthu munyake, panji tili na khumbo lambura kwenelera la kugonana, tikwenera kukumbuka fumbo ili. Fumbo ili lingawovwiraso munthu uyo wakukhumba kucita cinthu cilicose mwambura mahara. Likukolerana comene na fundo ya mu Baibolo yakuti: ‘Ukuvuna ico waseŵa.’—Gal. 6:7.
“Ndiwe njani kuti weruzgenge muteŵeti wamwene?” (Rom. 14:4) Mu kalata iyo wakalembera Ŵaroma, Paulosi wakayowoyapo masuzgo agho ghakaŵa mu mpingo wakwambilira. Ŵakhristu ŵanji, cifukwa cakuti ŵakafumanga kwakupambana ŵakatemwanga kweruzga ŵanyawo pa ivyo ŵakasankhanga na ivyo ŵakacitanga. Fumbo la Paulosi likaŵakumbuska kuti ŵapokeleranenge yumoza na munyake na kulekera Yehova nkhani ya kweruzga.
Mazuŵa ghano napo, ŵanthu ŵa Yehova ŵakufuma kwakupambana. Ndipouli, Yehova watiwunganya pamoza. Kasi tikovwirapo kuti umoza uwu ulutilire? Usange tikutemwa kususka ivyo mbali withu wacita mwakuyana na njuŵi yake, cingaŵa camahara kujifumba fumbo la Paulosi ili.
Mafumbo Ghakutovwira Kusendelera kwa Yehova
Mafumbo ghacoko waka agho tawona, ghakulongora kuti mafumbo agho ghali mu Mazgu gha Ciuta ngankhongono. Para tingaghanaghanira nkhani yose iyo mukusangika mafumbo agha tiwonenge umo ghangatovwilira. Ndipo apo tikuŵazga Baibolo, tiwonengeso mafumbo ghanyake ghakovwira.—Wonani bokosi pa peji 14.
Para tikughanaghanirapo comene mafumbo agho ghakusangika mu Mazgu gha Ciuta, maghanoghano na mitima yithu vikoleranenge na nthowa zaurunji za Yehova. Pamasinda pakufumbika na Yehova, Yobu wakati: “Ndamupulikani mu khutu pera, sono maso ghane ghakumuwonani.” (Job 42:5) Yobu wakamumanya makora Yehova, ndipo vikaŵa nga ni para wakumuwona na maso. Kweniso msambiri Yakobe wakati: “Sendelerani kwa Ciuta, ndipo iyo wasendelerenge kwa imwe.” (Yak. 4:8) Mphanyi tazomerezga cigaŵa cilicose ca Mazgu gha Ciuta, na mafumbo ghake wuwo, kutovwira kukura mwauzimu na kumumanya makora Yehova.
[Bokosi pa peji 14]
Kasi kujifumba mafumbo agha kungamovwirani wuli kuti muwonenge vinthu nga umo Yehova wakuviwonera?
▪ “Kasi Yehova wakuca nazo sembe za kocha na za kuwombora, panji kupulikira mazgu gha Yehova?”—1 Sam. 15:22.
▪ “Uyo wakalenga jiso, asi tiwawone?”—Sal. 94:9.
▪ “Kasi ukuwona munthu uyo mu maso ghake wakuti ngwamahara?”—Zinth. 26:12.
▪ “Kasi kukwenera kuti iwe ukalipe?”—Yona 4:4.
▪ “Kuŵenge candulo wuli kwa munthu usange wakwandula caru cose, kweni wakutaya umoyo wake?”—Mat. 16:26.
▪ “Ni njani watipatulenge ku citemwa ca Khristu?”—Rom. 8:35.
▪ “Uli na vici ico ukapokera cara?”—1 Kor. 4:7.
▪ “Ungweru uli na wenenawene wuli na cisi?”—2 Kor. 6:14.
[Cithuzithuzi pa peji 15]
Kasi Yobu wakasambiraci ku mafumbo gha Yehova?