Cigomezgo Cithu mwa Yehova Cakhora Cifukwa ca Kuzizipizga Viyezgo

Yakuyowoyeka na Ada Dello Stritto

Namalizga waka kukopera lemba la zuŵa mu notibuku yane. Nili na vilimika 36, kweni vyanitolera maora ghaŵiri kuti nimalizge kulemba mizere yicoko waka iyi. Cifukwa wuli? Amama ŵalongosorenge.—Joel

INE na afumu ŵane tikabapatizika mu 1968 kuŵa Ŵakaboni ŵa Yehova. Nkhati nababa David na Marc, nkhababaso mwana wacitatu, Joel. Wakababika mu 1973 pa cipatala ca msumba wa Binche ku Belgium, ico cili pa mtunda wa makilomita pafupifupi 60 kumwera kwa Brussels. Joel wakababika wambura kukhwima. Wakakwananga makilogiramu 1.7. Apo nkhafumanga mu cipatala, Joel nkhamuleka mumo kuti wakhwimeko.

Pakati pajumpha masabata, tikati tawona kuti mwana withu wakusintha yayi, ine na afumu ŵane a Luigi tikaluta nayo kwa dokotala wa ŵana. Wati wamara kupima Joel, dokotala wakati: “Phepani comene. Vikuwoneka kuti Joel wali na masuzgo agho ŵakuru ŵake ŵalije.” Tose tikati waka cete. Panyengo iyi, nkhamanya kuti mwana withu wali na suzgo likuru. Pamasinda dokotala wakacemera afumu ŵane pamphepete na kuŵaphalira kuti: “Mwana winu wali na matenda agho ghakupangiska munthu kuŵa wakugotomara (trisomy 21),” panji kuti Down syndrome.a

Cifukwa ca kucita citima na ivyo dokotala wakatiphalira, tikaghanaghana kuti tikumaneso na dokotala munyake. Dokotala waciŵiri uyu wakamupima Joel mwakuŵikapo mtima comene pafupifupi ora limoza kwambura kuyowoyapo cilicose. Ine na Luigi, tikawonanga nga wakucedwa nkhanira. Paumaliro, dokotala wakati: “Mwana winu wathembenge comene imwe.” Wakayowoyaso mwalusungu kuti: “Kweni Joel wazamuŵa wakukondwa cifukwa ŵapapi wake ŵakumutemwa!” Cifukwa ca ivyo dokotala wakayowoya, nkhamunyamura Joel na kuluta nayo ku nyumba. Pa nyengo iyi, wakaŵa kuti wali na masabata ghankhondi na ghatatu.

Uteŵeti na Maungano Vikatikhozga

Joel wakati wapimikaso, vikawoneka kuti wakaŵa na suzgo likuru la mtima kweniso matenda gha matewe. Cifukwa cakuti mtima wake ukaŵa ukuru comene, ukafyenyanga maphapu na kumupangiska kuti wamburenge luŵiro matenda ghanyake. Apo wakaŵa na myezi yinayi, Joel wakalwara cilaso ca mu maphapu ndipo tikaweleraso nayo ku cipatala uko ŵakamugoneka mu cipinda cayekha. Tikaŵa na citima cikuru comene kuwona umo wakusuzgikira. Tikakhumbanga comene kuti timukolere na kumusisitizga, kweni kwa masabata khumi ŵakatikanizga kumukora. Ntheura, ine na Luigi tikamulaŵiskanga waka, na kulomba.

Mu nyengo ya masuzgo iyi, tikalutilira kuwungana na mpingo pamoza na David na Marc. David wakaŵa na vilimika 6, Marc vitatu. Para tili ku Nyumba ya Ufumu, vikaŵanga nga ni para tili mu mawoko gha Yehova. Pa nyengo iyo tikaŵanga pa maungano, pamoza na ŵabali na ŵadumbu, tikajipulikanga kuti tamuyeghiska katundu withu Yehova, ndipo tikaŵanga na mtende mu mtima. (Sal. 55:22) Nanga mbanesi awo ŵakapweleleranga Joel ŵakayowoya kuti ŵakawonanga umo maungano ghakatovwiliranga kucita vinthu mwamahara.

Kweniso pa nyengo yira, nkhalombaso kwa Yehova kuti wanipe nkhongono zakulutira mu uteŵeti. M’malo mwa kukhala waka panyumba na kulira, nkhakhumbanga kuti niphalirengeko ŵanji cifukwa ico nkhakhozgekeranga na cigomezgo cakuti Yehova wazgorenge caru kuŵa cambura matenda. Nyengo zose para naluta mu uteŵeti, nkhajipulikanga kuti Yehova wazgora malurombo ghane.

“Ici Nchakuzizika!”

Tikakondwa comene pa zuŵa ilo tikamutolera Joel kufuma ku cipatala. Kweni zuŵa lakulondezgapo, vinthu vikasintha mwamabuci. Joel wakalwara comene, ndipo tikacimbiliraso nayo ku cipatala. Ŵadokotala ŵati ŵamupima, ŵakatiphalira kuti: “Kwakhala myezi yinkhondi na umoza kuti Joel wafwe.” Pakati pajumpha myezi yiŵiri, apo wakaŵa na myezi yinkhondi na yitatu, vikawoneka nga kuti ivyo ŵadokotala ŵakayowoya vicitikenge nadi cifukwa Joel wakalwaraso comene. Dokotala wakaticema ndipo wakatiphalira kuti: “Phepani comene. Palijeso cinyake ico tingacita kuti timovwire.” Ndipo wakatiso: “Apa vyafika mphakuti Yehova pera ndiyo wangamovwira.”

Nkhawelera mu cipinda ico ŵakamugoneka Joel. Nangauli nkhongono zikanimalira, kweni nkhakhumba cara kumuleka yekha pa bedi. Ŵadumbu ŵanandi ŵakizanga kuzakakhala nane, pakuti a Luigi ŵakapweleleranga David na Marc. Sabata yati yajumphapo, nthenda ya mtima yikamuwukira Joel. Ŵanesi ŵakiza luŵiro mu cipinda kweni pakaŵavya cakuti ŵangacita. Pakati pajumpha kanyengo, nesi munyake wakayowoya mwapasipasi kuti: “Kwamara . . . ” Nyengo yeneyiyo nkhaciwuska citengero na kufumamo mu cipinda. Nkhayezga kulomba Yehova, nangauli nkhaŵavya mazgu ghakupulikikwa ghakuti nilongosore umo nkhujipulikira. Pakati pajumpha maminiti 15, nesi munyake wakanicema, wakati: “Joel wakuwoneka kuti wacirenge!” Wakanikora pa woko na kuyowoya kuti: “Zaninge, mumuwone.” Nkhati nafika pa bedi la Joel, nkhasanga kuti mtima wake wambaso kukhung’uska. Nkhani yakuti Joel wacali wamoyo yikathandazgika luŵiro. Ŵanesi na ŵadokotala ŵakiza kuzakamuwona, ndipo ŵanandi ŵakati: “Ici nchakuzizika!”

Cakuzizika Cinyake

Mu vilimika vyakwambilira vya umoyo wa Joel, dokotala wakatiphalira mwakuwerezgawerezga kuti: “Joel wakukhumbikwira kumutemwa comene.” Pakuti ine na Luigi tikawona kuti Yehova wakutitemwa comene Joel wakati wababika, nase tikakhumbanga kumutemwa mwana withu. Tikaŵa na mipata yinandi yakulongolera kuti tikumutemwa cifukwa cakuti pa cilicose wakakhumbikwiranga wovwiri.

Mu vilimika 7 vyakwambilira vya umoyo wa Joel, tikapumuranga cara. Cilimika cilicose kwambira mu Okutobala mpaka Malici wakalwaranga pafupipafupi, ndipo tikalutanga nayo ku cipatala. Pa nyengo yeneyiyi, nkhayezgayezganga comene kupatura nyengo kuti nipwelelere David na Marc. Nyengo yikati yajumphapo, nawo ŵakamovwira comene Joel. Ivyo vikacitika cifukwa ca wovwiri uwu vikaŵa vyakuzizwiska. Mwaciyelezgero, ŵadokotala ŵanandi ŵakatiphaliranga kuti Joel wendenge yayi. Kweni zuŵa linyake apo Joel wakaŵa na vilimika vinayi, Marc wakati: “Joel, ŵalongora amama kuti ukwenda!” Joel wakenda nadi ndipo nkhazizwa comene. Tose mu mbumba tikakondwa comene ndipo mu lurombo tikawonga Yehova kufumira pasi pa mtima. Nyengo zinyake nanga ni para Joel wacita makora kanthu kacoko tikamuwonganga comene.

Kumusambizga vya Ciuta

Kanandi, Joel tikalutanga nayo ku Nyumba ya Ufumu. Kuti timuvikilire ku majeremusi, tikamuŵikanga pa kanjinga ako kuwaro kwake kukaŵa pepara la pulasitiki lakupangika mwapadera. Nangauli wakaŵanga pa kanjinga aka, kweni wakakondwanga kuŵa pamoza na mpingo.

Ŵabali na ŵadumbu ŵakatikhozganga comene, kutitemwa na kutovwira. Mbali munyake wakatemwanga kutikumbuska mazgu gha pa Yesaya 59:1 agho ghakuti: “Wonani, woko la Yehova ndambura kufupiskika kuti lileke kuponoska, nanga ndi khutu lake ndizito cara kuti lileke kupulika.” Mazgu ghakukhozga agha ghakatovwira kuti tigomezgenge comene Yehova.

Apo Joel wakakuranga, tikayezgayezga kumusambizga kuti kuteŵetera Yehova nkhwakuzirwa. Palipose apo mwaŵi wasangika tikayowoyanga nayo za Yehova mu nthowa iyo yikapangiskanga Joel kuŵa paubwezi wakukhora na Ŵadada ŵake ŵakucanya. Tikaŵeyelera Yehova kuti watovwire pa mulimo wa kusambizga mwana withu.

Apo Joel wakaŵa na vilimika 13 panji 14, tikakondwa kuwona kuti wakatemwanga kupharazga. Ŵati ŵamucita opareshoni yikuru, apo wakaŵa na vilimika 14, nkhakondwa comene apo wakanifumba kuti: “Amama, ka ningaŵapa a dokotala buku la Mungathe Kukhala ndi Moyo Kosatha?” Pakati pajumpha vilimika vicoko waka, Joel wakakhumbikwiranga kucitika opareshoni yinyake. Tikamanya kuti opareshoni iyi njakusuzga. Pambere ŵandamucite opareshoni iyi, Joel wakapeleka kalata kwa a dokotala iyo tikalembera lumoza. Kalata iyi yikalongosora maghanoghano ghake pa nkhani ya ndopa. Dokotala wakafumba Joel kuti: “Kasi iwe ukuzomerezga?” Joel wakazomerezga mwankhongono kuti: “Enya.” Tikathumbwa comene cifukwa cakuti mwana withu wali na cigomezgo mwa Mlengi wake ndiposo kuti wakukhumbisiska kumukondweska. Awo ŵakagwiranga nchito mu cipatala ŵakatovwira nadi ndipo tikaŵawonga comene.

Umo Wakakulira Mwauzimu

Apo wakaŵa na vilimika 17, Joel wakabapatizika kulongora kuti wajipatulira kwa Ciuta. Zuŵa ili ndambura kuluwika kwa ise. Para tikuwona umo Joel wakukulira mwauzimu tikukondwa comene. Kufuma apo wakabapatizikira, wakutemwa Yehova ndipo ngwamwamphu. Nakuti waliyose uyo wakumana nayo wakumuphalira kuti: “Unenesko nkhuwutemwa comene.”

Joel wakamanya kuŵazga na kulemba apo wakaŵa na vilimika vya pakati pa 17 na 19. Wakafwilirangapo comene kusambira. Para walemba lizgu limoza vikaŵa nga ni para wacita cinthu cikuru comene. Kufuma pa nyengo iyo, zuŵa lililose wakasambiranga lemba la zuŵa mu kabuku ka Kusanda Malemba Zuŵa na Zuŵa. Pamasinda wakakoperanga lemba ilo mu notibuku yake, ndipo pa sono notibuku iyi nkhabuku kakukondweska comene.

Joel wakuwoneseska kuti nyengo zose tilutenge mwakutendekera ku maungano mwakuti wapokelerenge awo ŵabali pa Nyumba ya Ufumu. Pa maungano, wakukondwa comene kuzgorapo panji kucitako viyelezgero. Wakovwiraso kupwelelera mayikirofoni kweniso kucita milimo yinyake. Usange wali makora, sabata yiliyose wakucita nase mulimo wa kupharazga. Mu 2007, ku mpingo tikapulika cipharazgo cakuti Joel wimikika kuŵa muteŵeti wakovwira. Tikakondwa na masozi yoyoyo! Ili likaŵa thumbiko likuru comene lakufuma kwa Yehova.

Umo Yehova Watovwilira

Mu 1999 tikakumanaso na suzgo linyake. Galimoto yinyake yikaganda galimoto yithu, ndipo a Luigi ŵakapwetekeka comene. Ku cipatala ŵakaŵadumura lundi, na kuŵacita maopareshoni ghakurughakuru pa msana. Apa napo Yehova wakatikhozga nga umo wakukhozgera ŵateŵeti ŵake wose cifukwa cakuti tikumugomezga. (Fil. 4:13) Nangauli a Luigi mbakupendera, kweni tikuŵika maghanoghano ghithu pa vinthu viwemi. Pakuti ŵangagwira yayi nchito yakulembeka, ŵali na nyengo yikuru ya kupwelelera Joel. Ntheura, nkhuŵa na nyengo yinandi yakucitira vinthu vyauzimu. A Luigi ŵakupwelelera mbumba yithu mwauzimu, kweniso ku mpingo ŵakuteŵetera nga ni mulaŵiliri wa milimo ya wupu wa ŵalara.

Cifukwa ca masuzgo agho tikukumana nagho, tikumalira nyengo yitali lumoza nga ni mbumba. Nyengo yose iyi, tasambira kuŵa ŵamahara na kuleka kukhazga vinandi kuluska ivyo tingafiska. Pa zuŵa ilo tajiwona kuŵa ŵambura kwenelera, tikulomba Yehova na kumuphalira vyenjezgo vithu. Cacitima nchakuti, David na Marc ŵati ŵakura na kufumapo pa nyumba, ŵali kuleka kuteŵetera Yehova. Tikugomezga kuti zuŵa linyake ŵazamuwelera kwa Yehova.—Luka 15:17-24.

Mu vilimika vyose ivi, Yehova watovwira ndipo tasambira kumugomezga pa suzgo lililose ilo tikukumana nalo. Mazgu gha pa Yesaya 41:13 ghatovwira nadi, ghakuti: “Ine Yehova Ciuta wako, ndakukora ku woko lako la malyero; ndine nkhuti kwa iwe, ‘Ungopanga, ndine tindikovwire.’” Nchakupembuzga kumanya kuti Yehova wakukora woko lithu. Nadi, tingayowoya kuti cigomezgo cithu mwa Yehova, uyo ni Dada withu wa kucanya, cakhora cifukwa ca kuzizipizga viyezgo.

[Mazgu ghamusi]

[Vithuzithuzi pa peji 16, 17]

Joel na amama ŵake, a Ada

[Cithuzithuzi pa peji 18]

Ada, Joel, na Luigi

[Cithuzithuzi pa peji 19]

Joel wakupokelera ŵabali na ŵadumbu pa Nyumba ya Ufumu