Kuŵa na Vyakucita Vinandi mu Gulu la Yehova

Nga ni umo yikayowoyekera na Vernon Zubko

NKHAKULIRA pa famu, pafupi na muzi wa Stenen, mu cigaŵa ca Saskatchewan ku Canada. Ŵapapi ŵane, Fred na Adella ŵakatipweleleranga mwauzimu na mwakuthupi ine na mudumbu wane, Aurellia kweniso ŵana ŵakwithu ŵanyake, Alvin, Allegra, na Daryl. Ticali kuwonga comene ŵapapi ŵithu cifukwa ca kutisambizga unenesko.

Adada ŵakaŵa ŵakuphakazgika, ndipo ŵakapharazganga mwambura wofi. Ŵakalimbikiranga kutipenjera vyakukhumbikwa pa umoyo kweniso ŵakawoneseskanga kuti waliyose mu cigaŵa cawo waŵamanye kuti Mbakaboni. Ŵakatemwanga kupharazga. Nicali kukumbuka mwamphu na cikanga ico ŵakaŵa naco. Kanandi ŵakaniphaliranga kuti: “Ulutilire kutangawanika mu gulu la Yehova ndipo uzamuŵambara masuzgo ghanandi.”

Kanandi tikapharazganga mu misewu ya Stenen na nyumba zapafupi. Kweni cikaniŵiranga cipusu yayi kucita nthena. Tawuni yiliyose yikaŵa na ŵanthu ŵakusuzga, awo ŵakatemwanga kugoska taŵana para tikupharazga. Apo nkhaŵa na vilimika vinkhondi na vitatu, zuŵa linyake nkhimilira mumphepete mwa msewu uku nakolera Gongwe la Mulinda na Galamukani!, gulu la ŵanyamata likanizingilizga. Ŵakanivura cisoti na kucipayika pa ciphambano ico cikaŵa pafupi. Mwamwaŵi mbali uyo nkhaŵa nayo wakawonanga ivyo vikacitikanga. Wakiza pafupi na kufumba kuti: “Vern, casuzga nchivici?” Ŵanyamata ŵara ŵakawoneka yayi apo ŵakanjilira. Nangauli nkhakhuŵara na ivyo vikanicitikira, kweni nkhasambirapo kuti para ukupharazga mu msewu, kwimilira waka nga nchiphambano yayi, kweni wendendekenge. Ici cikanovwira kuti niŵe na cikanga kupharazga nyumba na nyumba.

Ine na Alvin tikabapatizika mu Meyi 1951. Nyengo iyi nkhaŵa na vilimika 13. Nicali kukumbuka Mbali Jack Nathan uyo wakayowoya nkhani ya ubapatizo, ndipo wakaticiska kuti mwezi ungamaranga waka yayi kwambura kuyowoyapo za Yehova.a Mu mbumba yakwithu nyengo zose tikawonanga kuti upayiniya ni nchito yiwemi comene. Ntheura, nati namalizga sukulu mu 1958, nkhasamira ku Winnipeg, Manitoba kuti nkhacite upayiniya. Nangauli adada ŵakakondwanga para tikucitira lumoza bizinesi ya mbumba yithu, kweni iwo pamoza na amama ŵakanikhuŵilizga comene kuti nicite uteŵeti wanyengozose ndipo ŵakakolerana kuti nilute.

Nyumba Yiphya na Munyane Muphya

Mu 1959 ofesi ya munthavi yikapempha waliyose uyo wangafiska kusamira ku Quebec, uko kukakhumbikwiranga ŵapharazgi ŵanandi. Nkhaluta ndipo nkhapharazganga ku Montreal. Uku kukaŵa kusintha kukuru comene. Cilicose cikaniŵira ciphya apo nkhasambiranga Cifurenci na kuzgoŵera mutheto wa ku malo agha. Mulaŵiliri wa dera wakaniphalira kuti: “Ungayezganga ca kuyowoya kuti, ‘Kwithu tikacitanga nthe.’” Uwu ukaŵa ulongozgi uwemi.—1 Kor. 9:22, 23.

Apo nkhasamira ku Quebec nkhaŵavya mupayiniya wakwenda nayo. Kweni nkhasanga Mudumbu Shirley Turcotte, uyo tikamanyana apo nkhaŵa ku Winnipeg, ndipo tikati tatorana mu Febuluwale 1961 ndiyo wakazgoka munyane. Nayo wakafuma mu mbumba iyo yikatemwanga Yehova. Nangauli pa nyengo iyi nkhagomezganga viŵi yayi kuti wazamunovwira kucita uteŵeti.

Kupharazga ku Gaspé

Pakati pajumpha vilimika viŵiri tati tatorana, tikatumika ku Rimouski, Quebec kukacita upayiniya wapadera. Tikati tafika ku malo agha, Ofesi ya munthavi yikatituma kuti tipharazge cigaŵa cose ca Gaspé. Mulimo withu ukaŵa wa kuseŵa mbuto zinandi za unenesko. (Muph. 11:6) Tikapakira mu galimoto yithu magazini ghakujumpha 1,000 na mabuku pafupifupi 400 kweniso cakurya na vyakuvwara vyakukwanira mwezi umoza. Tikapharazga mu mizi yose ya mu Gaspé. Wayilesi ya mu cigaŵa ici yikacenjezga ŵanthu kuti kwiza Ŵakaboni ŵa Yehova, ndipo ŵaleke kupoka mabuku ghawo. Kweni ŵanandi ŵakapulikira mphuvya, ŵakatenge ŵakuŵaphalira za uwemi wa mabuku ghithu, ntheura apo tikapharazganga ŵakapokeranga mabuku ghithu.

Pa nyengo iyi mu vigaŵa vinyake vya ku Quebec mukaŵa wanangwa viŵi yayi wa kupharazga, mwakuti kanandi ŵapolisi ŵakatikanizganga. Ndivyo vikacitika apo tikagaŵiranga mabuku ku nyumba na nyumba mu msumba unyake. Mpolisi munyake wakatiphalira kuti tilute nayo ku ofesi ya polisi, ndipo tikazomera. Tikasanga kuti loya uyo wakwimira msumba uwu wapeleka cikalata cakutilekiska kupharazga. Pakuti pa zuŵa ili mulara wa polisi kukaŵavya, loya uyu nkhamulongora cikalata cakufuma ku ofesi ya munthavi ya ku Toronto, ico cikalongosoranga za wanangwa withu wa kupharazga mu cigaŵa ici. Loya wakati waŵazga waka kalata iyi, wakati: “Nkhukhumba yayi kusuzgikirapo pa nkhani iyi. Wasembe wa Katolika ndiyo wakanituma kuti nimukanizgani.” Pakuti tikakhumbanga kuti ŵanthu ŵa mu cigaŵa ici ŵamanye kuti mulimo withu ngwakuzomerezgeka, tikalutaso ku malo ghara mpolisi wakatikanizga na kwambaso kupharazga.

Zuŵa lakulondezgapo apo tikaluta kukawonana na mulara wa polisi, iyo wakakwiya comene kupulika kuti tikakanizgika kupharazga. Wakimbira loya uyu foni ndipo wakamukalipira comene. Mulara wa polisi uyu wakatiphalira kuti usange tasangana na suzgo lililose timwimbirenge waka foni ndipo iyo ndiyo wamaranenge nalo. Nangauli tikaŵa ŵalendo, ndiposo Cifurenci tikacimanyanga viŵi yayi, kweni ŵanthu ŵakatilongoranga lusungu. Ndipouli, tikamanyanga yayi kuti ŵangasambira unenesko. Kweni tikazizwa comene apo tikalutaso ku Gaspé kuti tikazenge Nyumba za Ufumu. Tikasanga kuti ŵanandi awo tikaŵapharazgirapo mbabali ŵithu. Yehova ndiyo wakukuzga nadi.—1 Kor. 3:6, 7.

Tikapokera Ciharo

Mu 1970 mwana withu Lisa wakababika. Ciharo cakufuma kwa Yehova ici cikasazgirako cimwemwe cithu. Shirley na Lisa tikaŵiranga lumoza ku mulimo wa kuzenga Nyumba za Ufumu. Wati wamalizga sukulu, Lisa wakati: “Amama na adada, pakuti mukalekezga dankha uteŵeti wanyengozose cifukwa ca ine, nyengo yira niwezgerengepo mwa kucita upayiniya.” Wacita upayiniya kwa vilimika vyakujumpha 20, ndipo sono wakucita uteŵeti uwu pamoza na mfumu wake, Sylvain. Wose ŵaŵa na mwaŵi wa kucitako mulimo wa kuzenga mu vyaru vyakupambanapambana. Cilato cithu nga ni mbumba nchakuti tiŵe na umoyo wambura kukhumba vinandi mwakuti tiŵe na nyengo yinandi yakuteŵetera Yehova. Nicali kukumbuka ivyo Lisa wakayowoya apo wakambanga upayiniya. Nakuti wakanikhuŵilizga kuti nambeso uteŵeti wanyengo zose mu 2001, ndipo nicali kucita upayiniya. Upayiniya ukunovwira kuti nilutilire kugomezga Yehova, niŵe na umoyo wambura kukhumba vinandi, kweniso kuti niŵe wakukondwa.

Mulimo wa Kuzenga Ukukhumba Citemwa na Kugomezgeka

Yehova wanisambizga kuti para tikujipeleka kucita uteŵeti uliwose uwo watipa, tikutumbikika comene. Kuteŵetera mu Komiti ya Vyakuzenga ndiposo kugwira nchito lumoza na ŵabali na ŵadumbu ŵa mu Quebec kweniso kunyake ukaŵa mwaŵi wapadera comene.

Nangauli ŵabali ŵanji ŵangayowoya nkhani mwaluso yayi pa pulatifomu, kweni para ŵakuzenga Nyumba za Ufumu ŵakuŵala nga ni nyenyezi. Ŵabali ŵakutemweka aŵa ŵakuŵika mtima wawo pa nchito ndipo maluso ghawo ghakuwoneka nadi. Nyengo zose ŵakuzenga Nyumba za Ufumu zakutowa zakusoperamo Yehova.

Ŵanandi ŵanifumbapo kuti: “Kasi awo ŵakukhumba kucitako mulimo wa kuzenga Nyumba za Ufumu ŵakwenera kuŵa na mikhaliro wuli yakuzirwa?” Kuyana na umo ine nawonerapo, cakwamba munthu wakwenera kutemwa Yehova, Mwana wake, kweniso ŵabali. (1 Kor. 16:14) Caciŵiri, wakwenera kuŵa wakugomezgeka. Para vinthu vikucitika nga umo iyo wakukhumbira yayi, munthu wakugomezgeka nyengo zose wakulondezga ivyo gulu lanozga. Kugomezgeka kukumuciska kuti wazakajipelekeso kunthazi.

Nkhuwonga Yehova

Nangauli adada ŵali kufwa mu 1985, kweni nicali kukumbuka ulongozgi uwo ŵakanipa, wakuti nilutilire kutangwanika mu gulu la Yehova. Mwakuyana waka na ŵanyawo awo ŵali kupokera kale njombe yakucanya, adada ŵakwenera kuti nawo mbakutangwanika comene mu cigaŵa ca gulu la kucanya la Yehova. (Uvu. 14:13) Amama sono ŵali na vilimika 97. Ŵakusuzgika kuyowoya cifukwa ca nthenda ya komizga viŵaro, ndipouli ŵacali kulimanya Baibolo. Mu makalata agho ŵakutilembera, ŵakuwikamo Malemba na kuticiska kuti tilutilire kuteŵetera Yehova mwakugomezgeka. Taŵana tose tikuwonga comene cifukwa ca kuŵa na ŵapapi ŵacitemwa.

Nkhumuwongaso comene Yehova cifukwa ca kunipa Shirley, uyo waŵa muwoli kweniso munyane wakugomezgeka. Munyane nayo wacali kukumbuka ulongozgi uwo anyina ŵakamuphalira, wakuti: “Vern waŵenge wakutangwanika na unenesko, ndipo iwe ukwenera kumanya kuti wamutangwanika na iwe pera yayi.” Apo tikatorananga vilimika 49 ivyo vyajumpha, tikapangana kuti ticekuzganenge, titeŵeterenge Yehova lumoza ndipo usange tose tazakapona paumaliro wa mgonezi uwu tizamukulira lumoza nga mbana ndipo tizamulutilira kuteŵetera lumoza kwamuyirayira. Taŵa nadi na “vyakucita vinandi mu mulimo wa Fumu.” (1 Kor. 15:58) Yehova watipwelelera makora comene, ndipo wawoneseska kuti tileke kusoŵerwa kawemi kalikose.

[Mazgu ghamusi]

[Cithuzithuzi pa peji 31]

“Cilato cithu nga ni mbumba nchakuti tiŵe na umoyo wambura kukhumba vinandi mwakuti tiŵe na nyengo yinandi yakuteŵetera Yehova”