Ungano Wambura Kuluwika

STEPHEN LETT, wa mu Wupu Wakulongozga wakati: “Paumaliro wa ungano uwu muyowoyenge kuti, ‘Ungano wa cilimika cino ngwambura kuluwika!’” Wakayowoya mazgu agha na cilato cakuti ŵategherezgi ŵanweke na ungano uwu. Uwu ukaŵa ungano wa nambara 126 wa Watch Tower Bible and Tract Society of Pennsylvania uwo ukucitika cilimika cilicose. Ukacitika pa Okutobala 2, 2010, ndipo ukacitikira mu Nyumba Yikuru Yakucitiramo Maungano gha Ŵakaboni ŵa Yehova ku Jersey City, New Jersey, U.S.A. Kasi ni fundo wuli zinyake izo zikaŵa pa ungano uwu?

Mbali Lett wakajura ungano uwu mwakuyowoya nkhani yakukondweska comene yakukhwaskana na galeta la Yehova ilo likulongosoreka mu buku la Ezekiel. Galeta la ucindami ili, likwimira gulu la Yehova ndipo likwendeskeka na mweneco. Mbali Lett wakati, ŵangelo ndiwo ŵali mu cigaŵa ca kucanya ca gulu ili, ndipo cikwenda mwaluŵiro comene mwakuyana na khumbo la Yehova. Cigaŵa ca pa caru capasi ca gulu la Yehova Ciuta naco cikwenda mwakuyana waka. Mbali Lett wakazunura vinthu vinyake vyakukondweska ivyo vyacitika mu gulu la Ciuta mu vilimika vyasonosono.

Mwaciyelezgero, minthavi yinyake yasazgika pamoza, ivyo viwovwirenge kuti ŵabali na ŵadumbu ŵanandi awo ŵateŵeteranga pa minthavi iyi, ŵacitenge mulimo wa kupharazga. Mbali Lett wakaciska ŵategherezgi kuti ŵalutilire kulombera Wupu Wakulongozga, nga mwimiliri wa muzga kuti ulutilire kucita vinthu mwakugomezgeka kweniso mwavinjeru, panji kuti mwakucenjera.—Mat. 24:45-47.

Malipoti Ghakukhozga na Mafumbo Ghakucontha Mtima

Tab Honsberger uyo wakuteŵetera mu Komiti ya Munthavi ku Haiti, wakapeleka lipoti lakukhozga comene lakukhwaskana na cindindindi ico cikakoma ŵanthu pafupifupi 300,000 pa Janyuwale 12, 2010. Wakati ŵalongozgi ŵa visopa vyautesi ŵakapharazganga kuti Ciuta wakulanga ŵanthu ŵambura cipulikano ndipo wakuvikilira awo mbawemi. Kweni ŵakwananga ŵanandi awo ŵakaŵa mu jele ŵakafuma makora cindindindi cati cawiska viliŵa vya jele. Ŵanthu ŵanandi ŵamitima yiwemi ku Haiti, ŵakasanga cipembuzgo ŵati ŵamanya cifukwa ico masuzgo ghasazgikira nthena mazuŵa ghano. Mbali Honsberger wakakora mazgu agho ghakayowoyeka na mbali munyake wa ku Haiti uyo muwoli wake wali kufwa na cindindindi ici, wakati: “Nicali kulira mpaka sono. Nkhumanya yayi apo nizamulekera kulira, kweni nkhukondwa para nkhuwona citemwa ico cili mu gulu la Yehova. Nkhugomezga kuti ŵakufwa ŵazamuwuka ndipo nkhukhumba kuphalirako ŵanji cigomezgo ici.”

Mark Sanderson, uyo wakuteŵetera pa Beteli ya ku Brooklyn, wakayowoya lipoti la ku Philippines uko kale wakaŵa mu Komiti ya Munthavi. Mwakukondwa wakayowoya umo ciŵelengero ca ŵapharazgi ŵa Ufumu cikukulira ku Philippines, ndipo wakatiso masambiro gha Baibolo nganandi kuluska ŵapharazgi. Wakayowoyapo za mbali Miguel uyo muzukuru wake wakakomeka. Miguel wakayezgayezga kuti munthu uyo wakakoma muzukuru wake wakakike. Zuŵa linyake apo Miguel wakapharazganga ku jele wakasangana na munthu uyo wakakoma muzukuru wake. Nangauli Miguel wakaŵa na wofi, kweni wakayowoya nayo mwakuzika ndiposo mwalusungu. Pamasinda sambiro likamba, ndipo munthu uyu wakamba kutemwa Yehova. Sono munthu uyu wali kubapatizika. Miguel na munthu uyu sono ŵakutemwana comene, ndipo Miguel wakuyezgayezga kuti mbali wake muphya uyu wafume luŵiro mu jele.a

Kufuma apa Mark Noumair, msambizgi wa Dipatimenti ya Sukulu ya Uteŵeti wa Ciuta, wakafumba ŵanthu mafumbo. Wakafumba mbumba zitatu, Alex na muwoli wake Sarah Reinmueller, David na muwoli wake Krista Schafer, Robert na muwoli wake Ketra Ciranko. Alex Reinmueller, uyo wakuteŵetera mu Komiti Yakusindikizga Mabuku, wakayowoya umo wakakoleskera unenesko apo wakacitanga upayiniya ku Canada. Kanandi wakendanga yekha mu uteŵeti nangauli wakaŵa na vilimika 15. Wati wafumbika za awo ŵakamukhozganga comene pa Beteli, Reinmueller wakazunura ŵabali ŵatatu, ndipo wakalongosora umo waliyose wa iwo wakamovwilira mwauzimu. Muwoli wake Sarah, wakalongosora kuti wakawovwirika cifukwa ca kuŵa paubwezi na mudumbu munyake, uyo wakazizipizga vilimika vinandi mu jele la ku China cifukwa ca cigomezgo cake. Sarah wakati lurombo lukamovwira kugomezga Yehova.

David Schafer, movwiri wa mu Komiti Yakusambizga, wakalumba anyina cifukwa ŵakaŵa na cipulikano cakukhora ndipo wakayowoyaso za ŵabali awo ŵakalimbikiranga uteŵeti nga mbanthu ŵakutema makuni awo ŵakamovwira kuti wacite upayiniya wakanyengo. Nga umo Yesu wakayowoyera, muwoli wake wakati wakakhozgeka na ŵabali awo ŵakateŵetera pa Beteli kwa nyengo yitali, awo ŵakalongora ‘kugomezgeka mu ivyo ni vicoko.’—Luka 16:10.

Mbali Robert Ciranko, uyo ni movwiri mu Komiti Yakulemba, wakayowoyapo za ŵasekuru ŵake ŵanayi awo ŵakafuma ku caru ca Hungary ndipo ŵakaŵa ŵakuphakazgika. Apo wakaŵa msepuka wakakondwa comene wati waluta ku ungano ukuru uwo ukacitika ca m’ma 1950, ndipo wakamanya kuti gulu la Yehova ndikuru kuluska mpingo wakwake. Muwoli wake, Ketra wakayowoya umo wakagomezgekera apo wakateŵeteranga nga ni mupayiniya mu mpingo uwo mukaŵa ŵakugaluka kweniso masuzgo ghanyake. Wakazizipizga ndipo pamasinda ŵakatumika ku mpingo unyake kukateŵetera nga mupayiniya wapadera, ndipo wakakondwa comene kuwona umo mpingo uwu ukaŵira wakukolerana.

Pamasinda, Manfred Tonak wakayowoya lipoti la ku Ethiopia. Caru ici cikuzunulika nanga ni mu Baibolo, ndipo pasono cili na ŵapharazgi ŵakujumpha 9,000. Ŵanandi mwa ŵapharazgi aŵa ŵakukhala mu Adidis Ababa panji pafupi na msumba uwu. Ndipo vigaŵa vyakutali na msumba uwu vikukhumbikwira ŵapharazgi ŵanandi. Pakuwona suzgo ili, ŵabali ŵa ku Ethiopia awo ŵakukhala mu vyaru vinyake ŵakacemeka kuti ŵakawovwirepo. Ŵanandi awo ŵakiza ŵakakhuŵilizga ŵabali ŵa mu vigaŵa ivi, nakuti ŵanthu ŵanji ŵa ku malo agha ŵakategherezga makani ghawemi.

Pa ungano uwu pakaŵaso nkhani yakulekerana yakukhwaskana na Ŵakaboni ŵa Yehova ŵa ku Russia. Aulis Bergdahl wa mu Komiti ya Munthavi ku Russia wakayowoya umo Ŵakaboni ŵa Yehova ŵakatambuzgikiranga ku Russia comenecomene ku Moscow. Philip Brumley uyo wakuteŵetera mu Dipatimenti ya vya Malango ku munthavi wa ku Unites States, wakayowoya vinthu vyakukondweska ivyo vikacitika pamasinda pakuti khoti la wupu wakuwona wanangwa wa ŵanthu ŵa mu Europe [Court of Human Rights] lategherezga milandu yinkhondi na yinayi iyo ŵakalundikira Ŵakaboni. Khoti ili likasanga kuti milandu yose iyi, ŵakaŵapusikizgiranga waka. Nangauli ivyo khoti likadumura vikaŵa kuti vindambe kugwira nchito, Mbali Brumley wakayowoya na cigomezgo cose kuti ceruzgo ca khoti ici cingawovwiraso nanga ni mu vyaru vinyake.

Pamasinda pa malipoti ghakukondweska agha, Mbali Lett wakapharazga kuti khoti la wupu wakuwona wanangwa wa ŵanthu ŵa mu Europe lazomerezga kutegherezga mulandu wakukhwaskana na msonkho ukuru uwo Ŵakaboni ŵa Yehova ŵakudandawura ku boma la France. Ku khoti ili kukuluta milandu bweka yayi. Nakuti khoti ili leruzgapo milandu yithu 39, ndipo milandu 37 yikatendera makora. Mbali Lett wakaciska ŵabali wose kuti ŵalutilire kulomba Yehova Ciuta kuti nkhani ya msonkho iyi yimare makora.

Lipoti la umaliro wakayowoya ni Richard Morlan, msambizgi wa Sukulu ya Ŵalara. Wakayowoya za uwemi wa sukulu iyi ndiposo umo ŵalara awo ŵasambirapo sukulu iyi ŵakuwongera.

Nkhani Zinyake Izo Zikayowoyeka na ŵa mu Wupu Wakulongozga

Guy Pierce wakayowoya nkhani yakucontha mtima yakujintha pa lemba la cilimika ca 2011 lakuti ‘Penjani ciphokwero mu zina la Yehova.’ (Zef. 3:12) Wakati nangauli iyi ni nyengo yakukondweska ku ŵanthu ŵa Yehova, kweni ni nyengo yakucita nayo maseŵera yayi. Wakatiso zuŵa likuru la Yehova laneng’enera, kweni ŵanthu ŵakulutilira kupenja ciphokwero mu visopa vyautesi, mawupu gha ndyali, usambazi, na vinyake vyantheura. Kuti tisange ciphokwero canadi, tikwenera kucema pa zina la Yehova, ico cikung’anamura kulimanya, kulicindika, kumugomezga Yehova na kumutemwa comene.

Pamasinda David Splane wakayowoya nkhani yakucontha mtima ya mutu wakuti “Kasi Mwanjira mu Cipumulo ca Ciuta?” Fundo yakuti Ciuta wakupumura yikung’anamura kuti wakukhala waka yayi, cifukwa iyo pamoza na Mwana wake ŵakulutilira “kugwira nchito” mwakuti khumbo ilo Ciuta wakalengera caru capasi lifiskike. (Yoh 5:17) Kasi tinganjira wuli mu cipumulo ca Ciuta? Tikwenera kuleka milimo yakwananga na kuŵa na cipulikano mu sembe ya Yesu. Nyengo zose tikwenera kuŵa na cipulikano na kucita vinthu mwakukolerana na khumbo la Ciuta. Nyengo zinyake cingaŵa cakusuzga kucita nthena, kweni nipera tikwenera kupulikira na kukolerana na ulongozgi wakufuma ku gulu la Yehova. Mbali Splane wakaŵeyelera ŵategherezgi kuti ŵayezgeyezge kunjira mu cipumulo ca Ciuta.

Nkhani yaumaliro yikayowoyeka na Anthony Morris, ndipo yikaŵa na mutu wakuti “Kasi Tikulindilira Vici?” Mbali Morris wakakumbuska ŵategherezgi za maucimi agho ghafiskikenge sonosono apa, agho ŵateŵeti wose ŵakugomezgeka ŵakulindilira. Maucimi agha ghakusazgapo nchemerezgo yakuti “Bata na mtende!” ndiposo kuparanyika kwa visopa vyautesi. (1 Tes. 5:2, 3; Uvu. 17:15-17) Mbali Morris wakacenjezga kuti para tapulika za vinthu vyakuzizika tileke kuyowoya kuti “Iyi yikwenera kuti ni Haramagedoni.” Wakaciska kuti tilutilire kulindilira nga umo lemba la Mika 7:7 likuyowoyera. Kweniso wakaciska ŵategherezgi wose kuti ŵakoleranenge comene na Wupu Wakulongozga nga umo ŵasilikari ŵakucitira para nkhondo yasuzga comene. Wakayowoyaso kuti: “Mitima yinu yiŵe yakuganga, mose imwe mukumugomezga Yehova.”—Sal. 31:24.

Paumaliro, pakaŵa vipharazgo vyakukondweska. Geoffrey Jackson wakapharazga kuti paŵenge Gongwe la Mulinda la lakusambira pa mpingo la Cingelezi cipusu ilo ŵaliyezgenge dankha kwa cilimika cimoza. Mbali Stephen Lett wakapharazga kuti Wupu Wakulongozga unozgenge ndondomeko ya maulendo ghakuliska ŵalaŵiliri ŵa cigaŵa ŵa mu United States pamoza na ŵawoli ŵawo. Pamasinda wakapharazga kuti Sukulu Yakusambizga Uteŵeti sono yicemekenge kuti Sukulu Yakusambizga Baibolo ya Ŵabali Ŵambura Kutora. Ndipo wakati kuŵengeso sukulu yiphya iyo yicemekenge kuti Sukulu Yakusambizga Baibolo ya Ŵakhristu Ŵakutorana. Sukulu iyi yizamovwira Ŵakhristu ŵakutorana kuti ŵasambire vinandi mwakuti ŵazakawovwire comene mu gulu la Yehova. Mbali Lett wakapharazgaso kuti Sukulu ya Ŵalaŵiliri Ŵakwendakwenda Pamoza na Ŵawoli Ŵawo ndiposo Sukulu ya Ŵabali ŵa mu Komiti ya Munthavi Pamoza na Ŵawoli Ŵawo iyo yikucitika ku Patterson, sono yiŵenge na makilasi ghaŵiri pa cilimika, ndipo paŵengeso mwaŵi wakuti awo ŵakacita kale sukulu iyi ŵasambireso.

Paumaliro wa ungano uwu Mbali John E. Barr, uyo wakaŵa na vilimika 97, uyo wakateŵetera nyengo yitali mu Wupu wa Kulongozga, wakalomba mwakujiyuyura kweniso mwakucontha mtima.b Pakufuma pa ungano uwu, waliyose wakakhorwa nadi kuti uwu ni ungano wambura kuluwika.

[Mazgu ghamusi]

[Mazgu Ghakukhozgera pa peji 19]

Ŵategherezgi wose ŵakakondwa na cigaŵa ca kufumba mafumbo

[Mazgu Ghakukhozgera pa peji 20]

Yehova watumbika mulimo wa kupharazga ku Ethiopia