Abrahamu—Munthu Wacitemwa
Abrahamu wakatondeka kujikora cifukwa ca citima. Sara, muwoli wake wakutemweka wakafwa. Apo wakasunganga muwoli wake, wakakumbukanga vyose ivyo ŵakacitiranga lumoza. Apo citima cikamba kukwera, masozi ghakamba kufuma. (Genesis 23:1, 2) Wakacita soni yayi kuthiska masozi kopa kuti ŵanji ŵangaghanaghana kuti ni mwanalume tondo. Kweni wakalira kulongora kuti wakamutemwanga comene muwoli wake.
KASI CITEMWA NI VICI? Citemwa nkhuŵa paubwezi na munthu munyake na kukolerana nayo comene. Munthu wakulongora citemwa ku awo wakuŵatemwa, kwizira mu vyakucita. Citemwa ici wakucilongora nangauli wangakhumbikwira kujinora vinyake.
KASI ABRAHAMU WAKALONGORA WULI CITEMWA? Abrahamu wakalongora kuti wakutemwa mbumba yake. Mwambura kukayika, Abrahamu wakaŵa munthu wakutangwanika. Kweni wakalekapo yayi kucezga na mbumba yake na kuyiwovwira mwauzimu. Nakuti Yehova wakawona kuti Abrahamu wakalongozganga makora mbumba yake pakusopa. (Genesis 18:19) Kweni cakuluska vyose, Yehova wakayowoya kuti Abrahamu wali na citemwa. Pakuyowoya na Abrahamu, Yehova wakayowoya kuti Yisake wakaŵa ‘mwana wakutemweka’ wa Abrahamu.—Genesis 22:2.
Tikuwonaso citemwa ico Abrahamu wakaŵa naco para tikuwona umo wakacitira apo muwoli wake wakutemweka Sara wakafwa. Abrahamu wakamulira muwoli wake. Nangauli wakaŵa wankhongono ndiposo wacikanga, kweni wakacita soni yayi kulira. Abrahamu wakalongora umo munthu wangaŵira wakukhora ndiposo waciwuravi.
Abrahamu wakalongora kuti wakatemwanga Ciuta wake. Mu umoyo wake wose wakalongora kuti wakutemwa Ciuta. Kasi wakalongora wuli? Kumbukani ivyo Baibolo likuyowoya pa 1 Yohane 5:3. Likuti: “Ili ni ng’anamuro la kutemwa Ciuta lakuti tisungilire malango ghake.” Para tawona ng’anamuro la kutemwa Ciuta ili, tikuwona kuti Abrahamu nchakuwonerapo ciwemi comene pa nkhani iyi.
Nyengo na nyengo para Yehova wamuphalira cakucita, Abrahamu wakapulikiranga nyengo yeneyiyo. (Genesis 12:4; 17:22, 23; 21:12-14; 22:1-3) Abrahamu wakapulikiranga Ciuta, kwali wapika dango lipusu kwali linonono. Wakamupulikiranga nipera nanga ni para wandamanye cifukwa ico wamupira dango ilo. Cakuzirwa kwa Abrahamu cikaŵa kupulikira. Usange Ciuta wake wakukhumba kuti wacite cinthu cinyake, Abrahamu wakaŵa wakunozgeka kucicita. Languro lililose ilo Yehova wangamupa wakaliwonanga kuti ni mwaŵi wake wakulongolera kuti wakutemwa Yehova.
KASI TIKUSAMBIRAPO VICI? Nase tingayezga Abrahamu para tikulongora citemwa ku ŵanyithu, comenecomene ŵamumbumba yithu. Tileke kuzomerezga nthangwanika za umoyo uno kuti zitimalire nyengo yakulongolera citemwa ku ŵanyithu.
Tikweneraso kufwilirapo kuti titemwenge comene Yehova. Citemwa ici cingatovwira comene pa umoyo withu. Mwaciyelezgero, cingaticiska kuti tisinthe kaghanaghaniro kaheni, kayowoyero kaheni, ndiposo nkharo yiheni mwakuti tikondweske Ciuta.—1 Petrosi 1:14-16.
Nchipusu yayi kupulikira Yehova nyengo zose. Kweni tikugomezga kuti Uyo wakawovwira Abrahamu, Mweneuyo wakati ni “mubwezi” wake, watovwirenge na ise uwo. (Yakobe 2:23) Mazgu ghake Baibolo ghakutilayizga kuti: “Wazamumuzgorani ŵakukhora, wazamumuzgorani ŵankhongono.” (1 Petrosi 5:10) Ili ni layizgo lakukondweska comene la Ciuta, uyo wakaŵa Mubwezi wa Abrahamu.
[Bokosi pa peji 11]
Kasi Mwanalume uyo Wakulira ni Mwanalume Tondo?
Ŵanandi ŵangazgora kuti enya. Kweni panji ŵangazizwa kumanya kuti Abrahamu wakaŵa yumoza mwa ŵanalume ŵankhongono comene ndiposo ŵakugomezgeka awo Baibolo likuyowoya kuti ŵakalira mu nyengo ya suzgo. Ŵanji mwa ŵanalume aŵa ni Yosefe, Davide, mpositole Petrosi, ŵalara ŵa mpingo wa mu Efeso, na Yesu wuwo. (Genesis 50:1; 2 Samuel 18:33; Luka 22:61, 62; Yohane 11:35; Milimo 20:36-38) Apa nchakuwonekerathu kuti Baibolo likusambizgapo yayi kuti mwanalume uyo wakulira ni mwanalume tondo.