Kasi Tingasambirako Vici kwa Cigeŵenga?

Cigeŵenga ico tikuyowoya apa ni ico Yesu wakuyowoya naco pa cithuzithuzi apa. Cigeŵenga ici cikacita citima cifukwa ca kwananga kwake. Cikaphalira Yesu kuti: “Muzakanikumbuke para mwiza mu ufumu winu.” Nga umo ukuwonera pa cithuzithuzi apa, Yesu wakuyowoya na cigeŵenga ici. Kasi ukumanya ivyo Yesu wakuciphalira?—a Wakucilayizga kuti: “Nadi pano nkhukuphalira muhanya uno, uzamuŵa na ine mu Paradiso.”

Kasi ukughanaghana kuti Paradiso uyu, wazamuŵa wuli?— Kuti tisange zgoro, tiye tidumbiskane za Paradiso uyo Ciuta wakanozgera ŵanthu ŵakwambilira, Adamu na Eva. Kasi Paradiso uyu wakaŵa nkhu? Kucanya panji pa caru capasi?—

Para utenge pa caru capasi ndikuti waneneska. Ntheura, para tikughanaghanira vyakuti cigeŵenga cizamuŵa “mu Paradiso” tikwenera kuciwona kuti cizamukhala pa caru capasi. Kasi Paradiso uyu wazamuŵa wuli?— Tiye tiwone.

Baibolo likuti Yehova Ciuta wati walenga ŵanthu ŵakwamba, Adamu na Eva, wakaŵaŵika mu paradiso pano pa caru capasi. Paradiso uyu wakacemekanga kuti “munda wa Edeni.” Kasi ungaghanaghanira umo “munda wa Edeni” ukwenera kuti ukaŵira wakutowa?— Ukwenera kuti ukaŵa wakutowa comene na uwemi kukhalamo ndipo sono palije malo agho ghangayana nawo.

Kasi ukughanaghana kuti, Yesu wazamuŵa pa caru capasi na cigeŵenga ico cikacita citima cifukwa ca zakwananga zake?— Yayi, Yesu wazamuŵa kuti ni Themba kucanya kuwusa caru capasi ico cizamuŵa kuti ni Paradiso. Ntheura, Yesu wazamuŵa na cigeŵenga mu fundo yakuti wazamuciwuska ku ŵakufwa na kucipwelelera mu Paradiso pa caru capasi. Kweni cifukwa wuli Yesu wazamuzomerezga munthu uyo wakaŵa cigeŵenga kuti wazakakhale mu Paradiso?— Tiye tidumbiskane.

Mbunenesko kuti cigeŵenga ici cikacita vinthu viheni comene. Kweni ŵanthu ŵanandi nawo ŵakacita mwakuyana waka. Ndipouli, ŵanandi ŵakacitanga viheni cifukwa cakuti, ŵakaŵa ŵandasambire za Yehova kuti ŵacite ivyo wakukhumba.

Ntheura ŵanthu ŵa nga ni aŵa, kweniso cigeŵenga ico Yesu wakayowoyanga naco pa khuni, ŵazamuŵa pa gulu la ŵanthu awo ŵazamuwuskika mu Paradiso pa caru capasi. Ŵazamusambizgika khumbo la Ciuta. Para ŵasambizgika, vyakucita vyawo vizamulongora usange ŵakutemwa nadi Yehova.

Kasi ukumanya umo ŵazamulongolera kuti ŵakutemwa Ciuta?— Para ŵazamucita ivyo Ciuta wakukhumba. Cizamuŵa cakukondweska comene kuzakakhala mu Paradiso pamoza na ŵanthu awo ŵakutemwa Yehova kweniso ŵanji.