Kasi Ŵakhristu Ŵakwenera Kuchitako Isitara?

Buku linyake likuti Isitara “ntchiphikiro chikuru cha Ŵakhristu cha kukumbukira kuwuka kwa Yesu Khristu.” (Encyclopædia Britannica) Kweni kasi Ŵakhristu ŵakwenera kuchitako Isitara?

Kuti ŵanthu ŵamanye makora chinthu chinyake ŵakupenjerezga ukaboni. Ntheura nase tikwenera kumanya makora ivyo vikuchitika pa Isitara kuti timanye unenesko.

Yesu wakaŵaphalirapo yayi ŵasambiri ŵake kuti ŵakumbukirenge kuwuka kwake. Kweni wakaŵaphalira kuti ŵakumbukirenge nyifwa yake. Paulosi wakati kukumbukira nyifwa ya Yesu uku ni “Mugonero wa Fumu.”—1 Ŵakorinte 11:20; Luka 22:19, 20.

Buku ilo lazunulika pachanya apa likutiso vinandi ivyo vikuchitika pa Isitara ni maluso waka gha ŵanthu kweniso vikukolerana yayi na kuwuka kwa Yesu. Ŵanthu ŵanyake ŵakugwiliskira ntchito masumbi na kalulu pa Isitara. Pakuyowoya za masumbi buku linyake likuti: ‘Ghakwimira umoyo uphya uwo ukufuma mu sumbi.’ Likutiso: “Pakuti kalulu wakubaba chomene wakwimira nyengo apo vyakumera vikuphuka panji kuchita nyambwani.”—The Encyclopedia of Religion

Philippe Walter uyo wakalembanga mabuku wakayowoya umo vikendera kuti maluso agha ghambe kuchitika pa Isitara. Iyo wakati Ŵakhristu ŵakatolera ivyo ŵanthu ŵakusopa ŵangoza ŵakachitanga. Ŵakusopa ŵangoza aŵa ŵakakondweleranga nyengo iyo vyakumera vikwamba kuphuka panji kuti kuchita nyambwani. Ŵakhristu ŵakayaniska ivi na kuwuka kwa Yesu. Iyi yikaŵa nthowa yakukopera ŵanthu ŵakusopa ŵangoza kuti ŵanjire Chikhristu chifukwa ivyo Ŵakhristu wakakondweleranga vikayanangako. Ntheura chikondwelero ichi ŵakachisintha kuti ŵakondwelerenge kuwuka kwa Yesu. Walter wakasazgirapo kuti, iyi ndiyo ni nthowa yikuru iyo ŵakanjizgira maluso gha ŵanthu ŵakusopa ŵangoza mu Chikhristu kwambura suzgo.

Mu nyengo iyo ŵapositole ŵakaŵa ŵamoyo, ivi vikachitikapo yayi chifukwa iwo ‘ŵakajandizganga’ maluso agha kuti ghaleke kunjira mu Chikhristu. (2 Ŵatesalonika 2:7) Paulosi wakayowoyerathu kuti para iyo wafumapo, “ŵanalume ŵazamuwuka na kuyowoya vinthu vyakunyongoloka kuti ŵaguzire ŵasambiri kwa iwoŵene.” (Milimo 20:29, 30) Mpositole Yohane wakati ŵanthu ŵanyake awo ŵakapuluskanga Ŵakhristu ŵakaŵa kuti ŵaliko kale mu nyengo ya Ŵakhristu ŵakwambilira. (1 Yohane 2:18, 26) Ivi ndivyo vikachitiska kuti maluso gha ŵanthu ŵambura kusopa ghanjire mu Chikhristu.

Kweni ŵanthu ŵanyake ŵangaghanaghana kuti ntchiheni yayi kutolerako maluso ghanyake agho ghakuchitika pa Isitara chifukwa ghakawovwira ŵanthu ŵakusopa ŵangoza kuti ŵapulikiske makora kuwuka kwa Yesu. Kweni Paulosi wakazomerezgapo yayi fundo iyi. Nangauli mu Romu mukaŵa maluso ghanandi gha ŵanthu ŵakusopa ŵangoza, kweni Paulosi wakatolerako yayi. M’malo mwake iyo wakachenjezga Ŵakhristu kuti: “Mungakakikanga joko mwakupambana pamoza na ŵambura kugomezga chara. Pakuti urunji ukukolerana wuli na uchikanamalango? Panji ungweru uli na wenenawene wuli na chisi? ‘Ntheura fumanipo pakati pawo, ndipo jipaturani mwaŵene,’ wakuti Yehova, ‘ndipo lekani kukhwaska chinthu chaukazuzi’”—2 Ŵakorinte 6:14, 17.

Kasi tatorapo fundo wuli pa vichoko waka iyo tawona mu nkhani iyi? Apa ntchakuwonekerathu kuti Ŵakhristu ŵaunenesko ŵakwenera yayi kuchitako Isitara.