NKHANI YA PA CHIKOPI | KASI MUNGATEMWA KUSAMBIRA BAIBOLO?

Tikusambira Baibolo Na Waliyose

Ŵakaboni ŵa Yehova ŵakumanyikwa chifukwa cha kupharazga.Kweni kasi mukumanya kuti ŵakusambira Baibolo na waliyose uyo wakukhumba?

Mu 2014, Ŵakaboni ŵa Yehova pafupifupi 8,000,000 mu vyaru 240 ŵakasambira Baibolo na ŵanthu pafupifupi 9,500,000 mwezi uliwose.a Tikusambira Baibolo na ŵanthu ŵanandi chomene.

Kuti ntchito ya kupharazga yende makora, Ŵakaboni ŵa Yehova ŵakusindikizga Mabaibolo, mabuku, magazini, na vinyake ivyo vikovwira pakusambira Baibolo. Pa chaka vinthu ivi vikukwana pafupifupi biliyoni yimoza na hafu mu viyowoyero 700. Pakuti mabuku agha ghali mu viyowoyero vinandi, ŵanthu ŵakusambira Baibolo mu chiyowoyero icho ŵakhumba.

Katlego wa ku South Africa wakati: “Nati namba kusambira Baibolo nkhamba kutemwa chomene kuŵerenga kuluska apo nkhaŵa ku sukulu. Ivyo nkhasambiranga mu Baibolo vikaŵa vyakupembuzga.”

Bertha wa ku Mexico wakati: “Apo nkhasambiranga Baibolo mafumbo ghane ghakazgoleka.”

Eziquiel wa ku Brazil wakati: “Ŵakaboni ŵa Yehova ŵakizanga kunyumba na kunisambizga Baibolo panyengo iyo nakhumba.”

Viniana wa ku Australia wakati: “Tikasambiranga Baibolo kwa maminiti 15 m’paka 30 ndipo nyengo zinyake tikajumphirangako. Niti waka umo ine nkhakhumbiranga.”

Aimé wa ku Benin wakati: “Nkhasambiranga Baibolo kwambura kulipira. Nkhazizwa chomene.”

Karen wa ku Northern Ireland wakati: “Awo ŵakanisambizganga Baibolo ŵakaŵa ŵalusungu kweniso ŵakuzika. Ndipo tikamba kutemwana chomene.”

Denton wa ku England wakati: “Ni waliyose yayi uyo wakusambira Baibolo wakuŵa Kaboni wa Yehova.”

MAZGORO GHA MAFUMBO AGHO ŴANTHU ŴAKUTEMWA KUFUMBA PA NKHANI YA KUSAMBIRA BAIBOLO

Kasi mukusambizga wuli munthu Baibolo?

Tikudumbiskana nkhani za mu Baibolo na kuŵazga mavesi agho ghakukolerana na nkhani izo. Mwachiyelezgero, Baibolo likuzgora mafumbo nga ni agha: Kasi Chiuta ni njani? Kasi wali na zina? Wakukhala nkhu? Kasi tingaŵa mubwezi wake? Suzgo ndakuti ŵanyake ŵakumanya yayi apo ŵangasanga mazgoro gha mafumbo agha.

Kuti tovwire ŵanthu kuti ŵasange mazgoro, tikusambira nawo buku lakuti Kasi Baibolo Likusambizgaci Comenecomene?b Buku ili likovwira ŵanthu kuti ŵapulikiske Baibolo. Likulongosora makora umo Chiuta na Yesu Khristu ŵaliri. Likulongosoraso kuti ŵakufwa ŵazamuwuka, umo tingalombera, chifukwa icho tikusuzgikira, na vinyake vinandi.

Kasi mukusambizga nyengo wuli ndipo ni nkhu uko mukusambizgira?

Munthu wakusankha yekha nyengo na malo.

Kasi mukusambizga nyengo yitali wuli?

Ŵanthu ŵanandi ŵakutemwa kuti tiŵasambizgenge Baibolo kwa ora limoza panji kujumpha apa sabata yiliyose. Kweni tikusintha para munthu wakhumba. Ŵanyake ŵakutemwa kuti ŵasambirenge kwa maminiti 10 panji 15 sabata yiliyose.

Kasi munthu wakulipira ndalama zilinga kuti wasambire Baibolo?

Munthu wakulipira ndalama yayi. Mabuku ghakusambilira nagho ngakuguliska yayi. Ivi vikukolerana na ivyo Yesu wakaphalira ŵasambiri ŵake apo wakati: “Mukapokera kwawanangwa, pelekani kwawanangwa.”—Mateyu 10:8.

Kasi munthu wakusambira m’paka pawuli?

Munthu wakusambira m’paka apo wawonera kuti wapulikiska. Buku lakuti Kasi Baibolo Likusambizgaci Comenecomene? lili na vipaturo 19. Mungasambira chipaturo icho mwasankha panji lose.

Usange nazomera kusambira Baibolo, kasi ndikuti nanjira mu mpingo winu?

Yayi. Ŵakaboni ŵa Yehova ŵakuchichizga munthu yayi kuti wanjire mpingo wawo. Tikusambizga vya mu Baibolo, ndipo munthu wakusankha yekha mpingo.

Kasi ningamanya wuli vinandi?

Mungajura pa Webusayiti ya jw.org/tum. Mungaŵerenga ivyo Ŵakaboni ŵa Yehova ŵakugomezga na kuchita.

Kasi ningachita wuli kuti nisambirenge Baibolo?

Mungapempha kusambira Baibolo na Ŵakaboni ŵa Yehova: pa intaneti, mungaŵalembera, kweniso kuŵayimbira foni

Filing’ani fomu iyo yili pa www.jw.org/tum.
Lemberani Ŵakaboni ŵa Yehova pa yimoza mwa maadiresi agho ghali pa peji 2 gha magazini iyi.
Mungafumba Kaboni wa Yehova wakufupi na imwe. Kweniso mu buku la manambara gha foni (directory) penjani apo palembeka “Ŵakaboni ŵa Yehova” kuti musange manambara gha foni.

a Tikusambira Baibolo na waliyose payekha panji mu tumagulu.

b Buku ili likusindikizgika na Ŵakaboni ŵa Yehova. Ndipo makope ghakujumpha 230 miliyoni ghasindikizgika mu viyowoyero vyakujumpha 260.

VYAKOVWIRA MABANJA

Eziquiel wakati: “Muwoli wane wati wamba kusambira Baibolo wakamba kusintha. Mu banja lithu vinthu vikamba kwenda makora. Ntheura nkhakhumbisiska kumanya ivyo wakasambiranga. Ndipo nane nkhamba kusambira. Ivyo nkhasambira vikanovwira kuti niŵe munthu muwemi. Tikamba kukolerana mu banja lithu chifukwa cha kusambira Baibolo.”

Karen wakati: “Nati namba kusambira Baibolo nkhaleka kukhweŵa hona, kumwa chomene moŵa, na kukwiya luŵiro. Sono nyumba yane njakutowa. Nkhutemwa chomene banja lane ndipo nkhuchita vinthu ivyo vikuŵakondweska. Pasono nili wakukondwa chomene.”

Viniana wakati: “Ŵanthu ŵanyake ŵakanigongoweskanga kuti nileke kusambira Baibolo. Kweni mfumu wane wakanigongoweska yayi. Iyo wakati: ‘Nilije navyo ntchito ivyo ŵanthu ŵakuyowoya. Kweni chakuzirwa kwa ine ntchakuti iwe usinthe. Lutilira kusambira.’ Sono mu banja lithu vinthu vili makora.”