Kasi Kosi ya Kusambira Baibolo ya Ŵakaboni ŵa Yehova Ni Vichi?

Ŵakaboni ŵa Yehova ŵangamovwirani makora kuti musambire ivyo Baibolo likusambizga. Kusambira Baibolo kungamovwirani kuti:

• Muŵe ŵakukondwa

• Muŵe mubwezi wa Chiuta

• Musambire ivyo Baibolo likulayizga kuti vizamuchitika kunthazi

Pa peji ili

• Kasi Ŵakaboni ŵa Yehova Ŵakuchita Wuli Pakusambizga Munthu Baibolo?

• Kasi nkhwenera kulipira kuti nisambire Baibolo?

• Kasi munthu wakusambira nyengo yitali wuli?

• Kasi ningachita wuli kuti nambe kusambira Baibolo?

• Kasi munganilongora dankha umo mukusambilira?

• Para nazomera kusambira Baibolo, kasi awo ŵakunisambizga ŵanichichizgenge yayi kuti niŵe yumoza wa Ŵakaboni ŵa Yehova?

• Kasi ningagwiliskira ntchito Baibolo lane?

• Kasi ningachemerako ŵanyane pa sambiro la Baibolo?

• Wuli usange nkhasambirapo Baibolo na Ŵakaboni ŵa Yehova kumanyuma? Kasi ningasambiraso?

• Kasi pali nthowa zinyake za umo munthu wangasambilira Baibolo kwambura munthu munyake wakuti wamusambizgenge?

Kasi Ŵakaboni ŵa Yehova Ŵakuchita Wuli Pakusambizga Munthu Baibolo?

Munthu uyo wakumusambizgani Baibolo wamovwiraninge kuti mupulikiske makora ivyo Baibolo likuyowoya. Apo musambirenge Baibolo munthowa yakudumbiskana pakugwiliskira ntchito buku la Mungakondwa na Umoyo Kwamuyirayira! musambirenge ivyo Baibolo likusambizga kweniso umo lingamovwilirani pa umoyo winu. Kuti mumanye vinandi, wonelerani vidiyo iyi.

Kasi nkhwenera kulipira kuti nisambire Baibolo?

Yayi. Tikulondezga ulongozgi uwo Yesu wakaphalira ŵasambiri ŵake, apo wakati: “Mukapokera kwawanangwa, pelekani kwawanangwa.” (Mateyu 10:8) Awo ŵamusambizganinge Baibolo tikuŵalipira ndalama yayi, ndipo tikuguliska yayi Baibolo panji buku la Mungakondwa na Umoyo Kwamuyirayira!

Kasi munthu wakusambira nyengo yitali wuli?

Kosi yose yili na masambiro 60. Mungasankha mwekha umo mungasambilira kuti mumalizge masambiro agha, kweni ŵanthu ŵanandi ŵakutemwa kuti tiŵasambizgenge sambiro limoza panji kujumphira apa sabata yiliyose.

Kasi ningachita wuli kuti nambe kusambira Baibolo?

1. 1. Filing’ani fomu pa intaneti. Tigwiliskirenge ntchito vinthu ivyo mwalemba vyakukhwaskana na imwe na chilato chakuti timutumirani munthu wakuti wasambirenge namwe Baibolo nga umo mwapemphera.

2. 2. Munthu uyo wamusambizganinge Baibolo wakumanenge namwe. Musambizgi winu wa Baibolo wazamumulongosolerani ivyo mukwenera kukhazga apo mukusambira Baibolo ndipo wazamuzgora fumbo lililose ilo mungaŵa nalo.

3. 3. Imwe na munthu uyo wazamumusambizgani Baibolo muzamupanga ndondomeko ya umo mungasambilira. Mungasambira maso na maso panji kwizira pa telefoni, video call, kalata, panji imelu. Mungasambira kwa ora limoza, kweniso para mungakhumba mungasambira kwanyengo yichoko waka panji kujumphirapo kuyana na ndondomeko yinu.

Kasi munganilongora dankha umo mukusambilira?

Enya. Kuti muwone , filing’ani fomu iyo yili pa jw.org. Para mwakumana na munthu uyo wakukhumba kumusambizgani Baibolo, muphalirani kuti mukukhumba kuwona dankha umo sambiro likuchitikira kuti muwone usange vikumukondweskani panji yayi. Iyo wazamugwiliskira ntchito kabuku kakuti Mungakondwa na Umoyo Kwamuyirayira! ako kali na masambiro ghatatu, agho ghazamumuwovwirani kuti muwone usange vikunozga kusambira panji yayi.

Para nazomera kusambira Baibolo, kasi awo ŵakunisambizga ŵanichichizgenge yayi kuti niŵe yumoza wa Ŵakaboni ŵa Yehova?

Yayi. Ŵakaboni ŵa Yehova ŵakutemwa kusambizga ŵanthu Baibolo, kweni ŵakuchichizga munthu waliyose yayi kuti wanjire mpingo wawo. M’malo mwake, tikusambizga ivyo Baibolo likuyowoya, ndipo tikumanya kuti munthu waliyose wali na wanangwa wakusankha yekha ivyo wakukhumba kugomezga.—1 Petrosi 3:15.

Kasi ningagwiliskira ntchito Baibolo lane?

Enya, mungagwiliskira ntchito Baibolo lililose ilo mwakhumba. Nangauli ise tikutemwa kugwiliskira ntchito Baibolo la Malemba Ghakupatulika mu Mang’anamuliro gha Charu Chiphya ilo ndipusu kweniso lili kung’anamulika makora, kweni tikumanya kuti ŵanthu ŵanandi ŵakutemwa kugwiliskira ntchito Baibolo ilo ŵali kulizgoŵera kale.

Kasi ningachemerako ŵanyane pa sambiro la Baibolo?

Enya. Mungachemerako banja linu lose panji mubwezi winu waliyose uyo mwakhumba.

Wuli usange nkhasambirapo Baibolo na Ŵakaboni ŵa Yehova kumanyuma? Kasi ningasambiraso?

Enya. Unenesko ngwakuti, mungakondwa chomene umo mungasambilira pasono chifukwa vinthu vinyake ivyo tikusambizga vyasintha kuti vikolerane na umo vinthu viliri ku ŵanthu pasono. Pasono sambiro la Baibolo ndakunozga chomene kweniso likuchitika munthowa yakudumbiskana kuluska umo vikaŵira kale.

Kasi pali nthowa zinyake za umo munthu wangasambilira Baibolo kwambura munthu munyake wakuti wamusambizgenge?

Enya. Nangauli ŵanthu ŵanandi ŵakusambira makora Baibolo usange pali munthu munyake wakuŵasambizga, kweni ŵanyake pakwamba ŵakutemwa kusambira dankha paŵekha. Pali vinthu vinyake ivyo vingamovwirani kuti musambire Baibolo kwaulere pamwekha. Pasi apa pali vinthu vinyake ivyo vingamovwirani kuti musambire Baibolo:

• Kusambira Baibolo pa Intaneti. Kusambira Baibolo munthowa ya mafumbo na mazgoro, mungasanga mazgoro gha mafumbo ghanyake ghakuzirwa nga ghakuti: Kasi Chiuta ni njani? Chifukwa wuli pali masuzgo na vinthu viheni? Kasi Chiuta wazamuwuskapo masuzgo?

• 

  Mavidiyo Ghakulongosora Baibolo. Mavidiyo ghafupi agha ghakulongosora vinthu vyakuzirwa ivyo Baibolo likusambizga.

• 

  Mafumbo Agho Baibolo Likuzgora. Nkhani izi zikupeleka mazgoro ghanandi gha mafumbo agho ghali mu Baibolo.

• 

  Mavesi gha mu Baibolo Ghalongosoreka. Manyani ng’anamuro la mavesi na mazgu ghakumanyikwa chomene mu Baibolo.