Kasi Mungatemwa Kumanya Vinandi Vyakukhwaskana na Baibolo?
Ncifukwa Wuli Tikwenera Kuŵazga Baibolo?
BAIBOLO ndakupambana comene na buku linyake lirilose cifukwa liri na urongozgi wacitemwa wakufumira kwa Ciuta. (1 Ŵatesalonika 2:13) Usange mukugwiriskira ncito ivyo Baibolo likusambizga, mwandulenge comene. Mukuzgenge citemwa cinu pa Ciuta ndipo muŵenge pafupi na iye, Mupi wa “vyawanangwa viweme vyose, na vyawanangwa vyakufiskika vyose.” (Yakobe 1:17) Mumanyenge umo mungafikira kwa iye kwizira mu pempero. Munyengo ya masuzgo, muzamupokera wovwiri kufuma kwa Ciuta. Usange mucitenge mwakukorerana na marango gha mu Baibolo, Ciuta wazam’mupani umoyo wamuyirayira.—Ŵaroma 6:23.
Mu Baibolo muli unenesko uwo ukutingweruska. Awo ŵali na cimanyisko ca mu Baibolo ŵali kusutuka ku maghanoghano ghautesi agho ghakusuzga ŵantu ŵanandi. Mwaciyerezgero, kumanya unenesko wakukhwaskana na ico cikucitika usange tafwa kukutifwatura kuti tileke kopa ŵakufwa panji kughanaghana kuti ŵabali na ŵabwezi ŵithu awo ŵalikufwa ŵakusuzgika. (Ezekiel 18:4) Cisambizgo ca mu Baibolo cakuyowoya za ciwuka cikupereka cipembuzgo kwa awo wakutemweka wawo walikufwa. (Yohane 11:25) Kumanya unenesko wakuyowoya za ŵangelo ŵaheni kukutipangiska kuti tiŵe maso na kumanya kofya kwa kugomezga mizimu ndipo kukutovwiraso kupulikiska cifukwa ico masuzgo ghaliri ghanandi pacaru capasi.
Marango gha Ciuta gheneagho ghali mu Baibolo ghakutirongora umo tingakhalira na umoyo uwo ungatipa vyandulo vyakuthupi. Mwaciyerezgero, kuŵa “wakujikora” kukupangiska muntu kuti waŵe na umoyo uwemi. (1 Timote 3:2) Mwa ‘kujitozga ku ukazuzi wose wa thupi na wa mzimu,’ tikutceŵa kupweteka umoyo withu. (2 Ŵakorinte 7:1) Kugwiriskira ncito urongozgi wa mu Baibolo kukwiziska cimwemwe mu ntengwa ndipo kupereka muntu ncindikwa.—1 Ŵakorinte 6:18.
Usange mugwiriskirenge ncito Mazgu gha Ciuta, muŵenge muntu wacimwemwe. Kumanya ivyo vili mu Baibolo kukutovwira kuti tiŵe na mtende mu mtima withu ndipo kukutipa cilindizga. Kukutovwiraso kuŵa na mikhaliro yiwemi nga ni lusungu, citemwa, cimwemwe, mtende, wezi na cigomezgo. (Ŵagalatiya 5:22, 23; Ŵaefeso 4:24, 32) Mikhaliro iyi yikutipangiska kuti tiŵe ŵafumu panji ŵawoli ŵawemi, ŵadada panji ŵamama ŵawemi, ndiposo kuŵa ŵana ŵakupulikira.
Kasi mulikughanaghanapo za umo muntazi mwinu muzamuŵira? Maucimi gha mu Baibolo ghakutovwira kumanya nyengo iyo tilimo. Maucimi agha ghakuyowoya za mikhaliro iyo yili pacaru pera cara, kweniso ghakurongora kuti sono-sono apa, Ciuta wazgorenge caru cose kuŵa paradiso.—Civumbuzi 21:3, 4.
Umo Mungapulikiskira Baibolo
Mutepanji mukuŵazga Baibolo kweni likumuŵirani linonono kulipulikiska. Nyengo zinyake mukumanya yayi mavesi gha mu Baibolo agho mungajura kuti musange mazgoro gha mafumbo ghinu. Usange ndimo vilili, kuti ndimwe pera yayi muli na suzgo ili. Tose tikukhumbikwira wovwiri kuti tipulikiske Baibolo. Ŵakaboni ŵa Yehova, mu vyaru vyakukwana 235, ŵakupereka urongozgi wakufumira mu Baibolo ku ŵantu ŵanandi comene. Ndipo ŵangaŵa ŵakukondwa kuti ŵamovwirani.
Nyengo zose nciwemi kusambira Baibolo pacoko-pacoko, kwambira na visambizgo vyakwambilira. (Ŵahebere 6:1) Peneapo mukurutizga kusambira, muzamwamba kurya “cakurya cakukhoma,” ico cikung’anamura kumanya vinandi. (Ŵahebere 5:14) Cakurya ici cikusangika mu Baibolo. Mabuku ghakulongosora Baibolo, nga ni brosha lakuti Kasi Ncici Ico Ciuta Wakukhumba kwa Ise?, lingamovwirani kupulikiska Malemba ghakukhwaskana na nkani zakupambana-pambana.
Kasi Mungatemwa Kupatula Nyengo Sabata Yiliyose Mwakuti Mupulikiske Baibolo?
Nyengo zose mungaŵa na mwaŵi wa kusambira Baibolo panyengo na malo agho ngawemi kwa imwe. Ŵanandi ŵakusambilira panyumba zawo, pamalo ghambura ciwawa. Ŵanji ŵakusambira Baibolo kwizira pa telefoni. Kusambira Baibolo, kukucitika pa ŵantu ŵanandi nga ni mu makilasi cara, kweni kukucitika mwakuyana na nyengo iyo imwe mungatemwa kuyana na mikhaliro yinu. Pakuŵavya mayeso agho ghakuperekeka ndiposo palije ico cizam’mukhuŵazgani. Mafumbo ghinu ghakukhwaskana na Baibolo ghazamuzgoreka, ndipo muzamusambira umo mungaŵira bwezi leneco la Ciuta.
Muzamulipira cara sambiro ili la Baibolo. (Mateyu 10:8) Likucitika kwawanangwa ku ŵantu ŵa visopo vyose na ku ŵantu awo ŵakusopa cara usange mbakunweka kuti ŵamanye vinandi kufumira mu Mazgu gha Ciuta.
Ninjani wangaŵa namwe pa sambiro ili? Mbumba yinu yose ndiposo mubwezi winu uyo mungakhumba kuti waŵepo pa sambiro linu. Kweni usange mungatemwa, sambiro lingacitika na imwe pera.
Ŵanandi ŵakupatura ora limoza sabata yiliyose mwakuti ŵasambire Baibolo. Usange mungaŵa na nyengo yinandi panji yicoko waka sabata yiliyose, Ŵakaboni ŵazamucita kwakuyana na umo imwe mukukhumbira kuti ŵamovwirani.
Pempo Lakuti Mumanye
Tikumupempani kuti mukumane na Ŵakaboni ŵa Yehova. Ntowa yimoza yakucitira ici nkulemba kalata ku adiresi iyo yili pasi apa. Pamanyuma pake manozgero ghazamupangika ghakuti muntu munyake wize na kuzakasambira namwe Baibolo kwawanangwa.
□ Nitumirani brosha lakuti Kasi Baibolo Likusambizgachi Chomenechomene?
□ Nkukhumba sambiro la Baibolo lawanangwa.
Kulekapo kwekha usange kwarongoleka panyake, malemba ghose mu trakiti lino ghafuma mu Tumbuka Bible.