Mungachita Wuli Kuti Pakusambira Baibolo Mukondwenge na Kusanga Chandulo?

Joshuwa wakuŵazga Dango; viliŵa vya Yeriko vyawa ndipo nyumba ya Rahabi yapona; Joshuwa wakulomba uku wawuska mawoko muchanya

JOSHUWA wakapika mulimo wakusuzga. Mulimo uwu ukaŵa wa kulongozga mtundu wa Israyeli kuti ukanjire mu Charu cha Layizgano nangauli pakaŵa masuzgo ghakuru. Kweni Yehova wakamusimikizgira kuti vinthu vimwenderenge makora, ndipo wakamukhozga kuti: ‘Khwima mtima na kuŵa wankhongono. Sungilira Dango lane. Uŵazgenge muhanya na usiku, mwakuti uchitenge mwakupwelelera vyose ivyo vili kulembekamo. Para wachita nthena, vinthu vikwenderenge makora, ndipo uchitenge mwavinjeru.’—Josh. 1:7, 8.

Mu “nyengo zinonono na zakusuzga” izi, nase tikukumana na masuzgo ghakuru. (2 Tim. 3:1) Nga ni Joshuwa, nase vinthu vingatiyendera makora para tingalondezga ulongozgi uwo Yehova wakamupa. Tikwenera kuŵazga Baibolo nyengo zose, na kulondezga mwakupwelelera fundo zake pa masuzgo ghithu.

Ndipouli, taŵanandi tingazomerezga kuti vikutisuzga kusambira. Kweni pakuti ntchakuzirwa chomene kusambira Baibolo, wonani bokosi lakuti “Yezgani Masachizgo Agha,” ilo lili na fundo zakuzirwa izo zingamovwirani kuti musangenge chandulo kweniso kuti mukondwenge pakusambira Baibolo.

Wamasalimo wakimba kuti: “Nilongozgani mu nthowa ya malango ghinu, pakuti nkhukondwa nayo.” (Sal. 119:35) Mukondwenge chomene para musambirenge Mazgu gha Chiuta. Mubowozgenge fundo zinandi ziwemi para mukulutilira kusambira Baibolo.

Nangauli mulongozgenge mtundu nga umo wakachitira Joshuwa yayi, kweni namwe muli na masuzgo ghinu. Ntheura nga ni Joshuwa, sambirani Baibolo na kusungilira ivyo vili kulembekamo kuti musange chandulo. Para muchitenge nthena, namwe vinthu vimwenderaninge makora, ndipo muchitenge mwavinjeru.

YEZGANI MASACHIZGO AGHA

Lombani pambere mundambe kusambira. Mu Baibolo muli maghanoghano gha Chiuta wankhongonozose ndipo ghali kulembeka kuti tisange nagho chandulo. Ntheura para mukuŵazga Baibolo, lombani dankha kuti mulipulikiske, kuti mukumbukirenge ivyo mwaŵazga, na kuvigwiliskira ntchito mu umoyo winu.—Ezir. 7:10.
Jifumbani mafumbo para mukuŵazga Baibolo panji mabuku ghakulongosora Baibolo: ‘Kasi nkhani iyi yikuniphalirachi vya Yehova? Kasi yikukolerana wuli na fundo yikuru ya Baibolo? Kasi fundo izo nasanga ningawovwira nazo wuli ŵanji?’
Ghanaghaniranipo pa ivyo mukusambira. Yimani dankha kuŵazga, na kughanaghanirapo: ‘Kasi nkhujipulika wuli apo nkhuŵazga nkhani iyi? Chifukwa wuli nkhujipulika nthena? Kasi nkhani iyi yikukolerana wuli na ivyo vikanichitikira kumanyuma, ivyo vikunichitikira sono, panji ivyo vingazakanichitikira munthazi? Kasi ningalondezga wuli fundo izi na ulongozgi uwu mu umoyo wane?’ (Yobu 23:5; Sal. 49:3) Wonani usange mungalongosora chifukwa icho Yehova wakuchiskira ŵanthu ŵake kuti ŵagege nkharo zinyake panji ivyo vingachitika usange munthu wangaleka kulondezga ulongozgi wake.—Doto. 32:28, 29.
Ŵani nga mukuwona ivyo vikuchitika para mukuŵazga nkhani yinyake. Mwachiyelezgero, kasi mungawona ivyo vikuchitika apo ŵakuru ŵa Yosefe ŵakumuguliska ku Ŵaishimayeli? (Gen. 37:18-28) Kasi mukuwona vichi? Kasi mukupulika vichi? Jitorani nga ni ŵanthu ŵa mu nkhani iyi. Kasi ŵakughanaghana na kujipulika wuli? Para muchitenge nthena, mupulikiskenge na kusanga chandulo na ivyo mukusambira.
Gwiliskirani ntchito vinthu ivyo gulu latipa kuti vimovwirani pakuchita kafukufuku. Vimanyani makora vinthu ivyo vilipo mu chiyowoyero chinu, kwali mpha Intaneti panji vyakusindikizgika. Kuziwulika yayi kufumba ŵanyinu kuti ŵamovwirani umo mungavigwiliskira makora ntchito vinthu ivi. Mwachiyelezgero, Watch Tower Publications Index panji Buku Lakupenjera Nkhani la Ŵakaboni ŵa Yehova, vingamovwirani kusanga fundo zinyake pa nkhani zinandi izo zili kulembeka ndiposo umo mavesi ghanandi gha mu Baibolo ghali kulongosolekera. Gwiliskirani ntchito Vyakusazgirapo mu Baibolo la Malemba Ghakupatulika mu Mang’anamuliro gha Charu Chiphya usange lilipo mu chiyowoyero icho mukuchimanya. Ku Vyakusazgirapo kuli fundo ziwemi pa nkhani ya malo, mdauko, vyakupimira, na vinyake.
Weleranimo fundo zikuru mu nkhani iyo mukuŵazga kuti mukumbukenge ivyo mwasambira. Kweniso phaliraniko ŵanji ivyo mwasambira. Kasi yilipo fundo iyo mungayigwiliskira ntchito mu uteŵeti? Para muchitenge nthena, mukumbukenge fundo izo mwasambira kweniso movwirenge nazo ŵanyinu.