Umo Tingawongera Cawanangwa Cikuru Cakufuma kwa Ciuta
1. Cifukwa wuli tikuwonga comene Yehova?
1 Pa ‘vyawanangwa viwemi’ vyose vyakufuma kwa Yehova, cawanangwa cikuru comene ni sembe yakuwombora iyo yikapelekeka na Mwana wake wakutemweka. (Yak. 1:17) Tingasanga vitumbiko vinandi, kweniso tingagowokereka zakwananga zithu cifukwa ca cawanangwa ici. (Efe. 1:7) Pa cifukwa ici, nyengo zose tikuŵa ŵakuwonga. Nyengo ya Cikumbusko ndiyo tikughanaghanirapo comene pa cawanangwa cakuzirwa ici.
2. Kasi tingacitaci mu mbumba ndiposo patekha kuti tiwonge comene sembe yakuwombora?
2 Umo Tingawovwilira Mbumba Yithu: Kuti tovwire mbumba yithu kuwonga sembe yakuwombora, tingazakaweleramo fundo zakukhwaskana na sembe yakuwombora pa Nyengo Yakusopera ya Mbumba para kwakhala masabata ghacoko kuti Cikumbusko cicitike. Kweniso zuŵa lililose tiŵazgire pamoza mu mbumba Malemba ghakunozgekera Cikumbusko. Waliyose waghanaghanire umo wasangira candulo na sembe yakuwombora. Kasi sembe iyi yikumupangiskani kuti mumuwonenge wuli Yehova? Kasi yikumupangiskani kuti mujiwonenge wuli, ndipo muwonenge wuli ŵanji? Kweniso, kasi yikumupangiskani kuti muŵe na cilindizga wuli para mukughanaghanira za munthazi? Muwonengeso kuti nchacandulo kusambira kwimba sumu ziphya izo zizamwimbika pa Cikumbusko. Sumu izi ni nambara 8 na 5.—Sal. 77:12.
3. Kasi tingalongora wuli kuwonga?
3 Longorani Kuwonga: Para tikuwonga sembe yakuwombora tiphalirengeko ŵanji za Yehova na citemwa cikuru ico wakalongora pakutuma Mwana wake. (Sal. 145:2-7) Mu myezi ya Malici, Epulero, na Meyi, mbumba zinyake zikulongora kuwonga mwa kupangana kuti yumoza wacite upayiniya wakanyengo. Para mungafiska yayi kucita ntheura, kasi ‘mungajigulira nyengo’ kuti musazgireko uteŵeti winu? (Efe. 5:16) Kweniso, para tikuwonga sembe yakuwombora tovwirenge ŵanji kuti ŵazakaŵe nase pa Cikumbusko. (Uvu. 22:17) Yambani kulemba mazina gha ŵanthu awo mukaŵapharazgira, awo mukusambira nawo Baibolo, ŵabali ŵinu, awo mukugwira nawo nchito, ndiposo ŵazengezgani ŵinu awo mukukhumba kuŵacemera ku Cikumbusko. Kweniso yezgayezgani kuti muzakacite mwakukwana upharazgi wapadera wa kucemera ŵanthu ku Cikumbusko.
4. Ni mwawuli umo tingagwiliskira nchito nyengo ya Cikumbusko mwamahara?
4 Nyengo ya Cikumbusko yikutipa mwaŵi wapadera wa kulongolera kuti tikuwonga Yehova cifukwa ca kutipa cawanangwa ici. Tiyeni tigwiliskire nchito nyengo iyi kuti tisazgireko uteŵeti withu na kuwonga sembe yakuwombora ndiposo “usambazi wambura mapimiko wa Khristu.”—Efe. 3:8.