Tiyeni Tilongore Kuti Tikuwonga Cikumbusko Cizamucitika pa Epulero 17
1. Kasi wamasalmo wakayowoya mazgu wuli agho ngakwenelera comene pa nyengo ya Cikumbusko?
1 Wamasalmo wakawonga Yehova cifukwa ca kumucitira lusungu na kumuwombora kanandi waka, ndipo wakafumba kuti: “Nchici ico tindiwezgerengepo kwa Yehova pa vyakundovwira vyake vyose?” (Sal. 116:12) Mazuŵa ghano, ŵateŵeti ŵa Ciuta ŵali na vifukwa vinandi vya kuwongera. Vilimika vinandi vikati vyajumphapo kufuma apo mazgu ghapacanya agha ghakalembekera, Yehova wakapeleka cawanangwa cikuru comene ku ŵanthu, ico ni sembe yakuwombora. Apo tikunozgekera kukumbukira nyifwa ya Khristu pa Epulero 17, tili na vifukwa viwemi vya kulongolera kuti tikuwonga.—Kol. 3:15.
2. Yowoyani vifukwa vinyake ivyo tikuwongera sembe yakuwombora.
2 Vitumbiko Ivyo Tikusanga Cifukwa ca Sembe Yakuwombora: Kwizira mu sembe yakuwombora, ‘tikugowokereka zakwananga zithu.’ (Kol. 1:13, 14) Ici cikutovwira kuti tisopenge Yehova na njuŵi yituŵa. (Heb. 9:13, 14) Tingaŵa na wanangwa wa kuyowoya para tikulomba kwa Yehova. (Heb. 4:14-16) Awo ŵali na cipulikano mu sembe yakuwombora ŵali na cilindizga ca umoyo wamuyirayira.—Yoh. 3:16.
3. Kasi tingalongora wuli kuti tikuwonga Yehova pakutipa sembe yakuwombora?
3 Umo Tikulongolera Kuwonga: Nthowa yimoza yakulongolera kuti tikuwonga comene nja Kuŵazga Baibolo kwa Kunozgekera Cikumbusko na kulangurukapo. Mu Gongwe la Mulinda la Ciceŵa la Febuluwale 1, 2011 muli nkhani ya mutu wakuti “Kodi Mukukonzekera Tsiku Lofunika Kwambiri Caka Cino?” ndipo yili kulembeka kuti yitovwire kunozgekera Cikumbusko. Tingamuphaliraso Yehova mu lurombo kufumira pasi pa mtima za umo tikuzirwiskira sembe yakuwombora. (1 Tes. 5:17, 18) Para tikupulikira dango la Yesu lakuti tifikenge pa Cikumbusko tikulongora kuti tikuwonga. (1 Kor. 11:24, 25) Kweniso, tingalondezga citemwa cikuru ca Yehova mwa kucema ŵanthu ŵanandi kuti ŵazakawungane nase.—Yes. 55:1-3.
4. Kasi tikwenera kuŵikapo mtima kucitaci?
4 Ŵateŵeti ŵa Yehova awo ŵakuwonga ŵazamuwona Cikumbusko nga ni ungano bweka yayi. Ni ungano wakuzirwa comene mu cilimika. Apo Cikumbusko cikusendelera, mphanyi taŵikapo mtima kulumba Yehova nga umo wakacitira wamasalmo uyo wakalemba kuti: “Tumbika Yehova, ‘we mzimu wane; ungaluwanga vyakovwira vyake vyose.”—Sal. 103:2.