“Lutilirani Kucita Ici”
Cikumbusko Cizamuŵako pa Epulero 5
1. Cifukwa wuli nchakuzirwa kukumbukira nyifwa ya Yesu?
1 “Lutilirani kucita ici kuti munikumbukenge.” (Luka 22:19) Na mazgu agha, Yesu wakaphalira ŵasambiri kuti ŵakumbukirenge nyifwa yake. Pakuti pali viwemi vinandi ivyo vyacitika cifukwa ca sembe, zuŵa la Cikumbusko ndakuzirwa comene ku Ŵakhristu kuluska mazuŵa ghose. Apo zuŵa la Epulero 5 likusendelera, kasi tingalongora wuli kuti tikumuwonga Yehova?—Kol. 3:15.
2. Kasi tingalongora wuli kuti tikuwonga cifukwa ca nyifwa ya Yesu?
2 Nozgekerani: Nyengo zose tikunozgekera para ticitenge vinthu vyakuzirwa. Kuti tiŵe ŵakunozgeka mu maghanoghano ghithu, tingadumbiskana na mbumba yithu ivyo vikacitikira Yesu kuumaliro wa umoyo wake pa caru capasi na kughanaghanirapo. (Ezra 7:10) Malemba ghanyake agho ghakulongosora ivyo vikacitika ghali pa kalendara ndiposo mu kabuku ka Kusanda Malemba Zuŵa na Zuŵa. Kweni malemba ghose na uko tingasanga nkhani izi mu buku la Munthu Mukuru vili pa peji 23 na 24 mu Gongwe la Mulinda la Ciceŵa la Febuluwale 1, 2011.
3. Kasi nthowa yinyake yakulongolera kuti tikuwonga njakuti wuli?
3 Pharazgani: Kweniso tingalongora kuti tikuwonga usange tikupharazga mwakukwana. (Luka 6:45) Pa Cisulo, Malici 17, tizamwamba kucemera ŵanthu ku Cikumbusko. Nchito iyi yizamucitika pa caru cose. Kasi mungasintha vinyake kuti muzakapharazge mwakukwana, nanga nkhucita upayiniya wakanyengo? Cingaŵa ciwemi kuti mudumbiskane fundo iyi pa Nyengo Yakusopera ya Mbumba.
4. Kasi tikutumbikika wuli para tiza pa Cikumbusko?
4 Tikutumbikika nadi para tiza pa Cikumbusko! Tikukondwa na kumutemwa comene Ciuta para tikughanaghanira lusungu lwake pakutipa Mwana wake wapadera kuŵa sembe. (Yoh. 3:16; 1 Yoh. 4:9, 10) Ici cikutikhozga kuti tileke kukhalira khumbo lithu. (2 Kor. 5:14, 15) Kweniso tikuŵa na khumbo lakuti tilumbe Yehova pakweru. (Sal. 102:19-21) Pakuti ŵateŵeti ŵa Yehova ŵakuwonga ivyo waŵacitira, mbakunweka ‘kuzakathuwuska nyifwa ya Fumu’ pa Cikumbusko ico cizamuŵako pa Epulero 5.—1 Kor. 11:26.