Nozgekerani Cikumbusko na Mtima Wakukondwa
1. Kasi nyengo ya Cikumbusko yikutipa mwaŵi wuli?
1 Cikumbusko ico cizamucitika pa Ciŵiri, Malici 26, cikutipa mwaŵi wakukondwa na ivyo Ciuta wali kucita kuti watiponoske. (Yes. 61:10) Nanga ni apo zuŵa la Cikumbusko lindafike, kukondwa kungatovwira kuti tiŵe ŵakunozgeka. Mwawuli?
2. Kasi nchivici cikutituma kuti tinozgekere Cikumbusko?
2 Kunozgekera Cikumbusko: Nangauli Mugonero wa Fumu ngwakuzirwa comene, kweni nchiphikiro cipusu. Ndipouli, mukwenera kunozgekera mwakutendekera kuti muleke kuluwa vinthu vinyake ivyo vikukhumbikwa. (Zinth. 21:5) Mukwenera kusankha nyengo na malo. Mukweneraso kusanga vinyo wakwenelera na cingwa cakwenelera. Pa malo apo pamucitikira cikumbusko pakwenera kunozgeka makora kuti paŵe pakutowa. Uyo wamuyowoya nkhani wakwenera kunozgekera makora, ndipo ŵalinda na awo ŵamwendeska vinyo na cingwa ŵakwenera kuphalirika ivyo ŵamucita. Tili na cigomezgo kuti muli kwambapo kale kunozgekera. Cifukwa cakuti tikuwonga sembe yakuwombora, lekani tikunozgekera makora Cikumbusko.—1 Pet. 1:8, 9.
3. Kasi tinganozgekera wuli mu mtima Mugonero wa Fumu?
3 Kunozgekera mu Mtima: Kweniso tikwenera kunozgekera mu mtima kuti timanye kuzirwa kwa Cikumbusko. (Ezra 7:10) Kuti tinozgekere mu mtima, tikwenera kupatura nyengo kuŵazga malemba agho ghasankhika pa nyengo ya Cikumbusko, na kughanaghanirapo ivyo Yesu wakacita mu mazuŵa ghaumaliro gha umoyo wake pa caru capasi. Para tighanaghanirenge ivyo Yesu wakacita, tikhukenge kuti timuyezge.—Gal. 2:20.
4. Kasi nchandulo wuli ca sembe ya Yesu ico cikumukondweskani comene?
4 Nyifwa ya Khristu yikupeleka ukaboni wakuti Yehova ndiyo ngwakwenelera kuwusa. Yikutiwombora ku zakwananga na nyifwa. (1 Yoh. 2:2) Yikutovwira kuti tiphemane na Ciuta na kujura nthowa yakuti tiŵe na umoyo wamuyirayira. (Kol. 1:21, 22) Kweniso, yikutipa nkhongono zakuti tifiske ivyo tikalayizga apo tikajipatuliranga kwa Yehova na kulutilira kuŵa ŵasambiri ŵakukhora ŵa Khristu. (Mat. 16:24) Muŵe na cimwemwe cikuru apo mukunozgekera kuzakaŵapo pa Cikumbusko!