Kasi Muli Kwambapo Kunozgekera Chikumbusko?

Pakaŵa pa Nisani 13, 33 C.E. Yesu wakamanya kuti kwakhala usiku umoza kuti wafwe. Pa nyengo iyi, wakaŵa pafupi kuchita Paska laumaliro na ŵasambiri ŵake na kwambiska Mugonero wa Fumu. Ungano wakuzirwa uwu ukakhumbikwiranga kunozgekera. Ntheura wakatuma Petrosi na Yohane kuti ŵakanozge vinthu. (Luka 22:7-13) Kwambira pa nyengo iyi, chaka chilichose Ŵakhristu ŵakunozgekera Chikumbusko. (Luka 22:19) Kasi tikwenera kuchita vichi pakunozgekera Chikumbusko icho chizamuchitika pa Epulero 3?

Ivyo Ŵalara Ŵakwenera Kunozgekera:

Ŵakwenera kusangirathu malo ghawemi. Yingaŵa Nyumba ya Ufumu panji malo ghanyake. Malo agha ghakwenera kuŵa na mipando, ungweru kweniso mphepo zinjirenge mwakukwana. Ŵakwenera kuwoneseska kuti malo agha ghatozgeka mwakutendekera.
Ŵakwenera kusora uyo wazamuyowoya nkhani. Waŵe uyo wakuyowoya makora nkhani. Ŵakweneraso kusora cheyamani na ŵabali awo ŵazamulomba panyengo ya chingwa na vinyo.
Usange mipingo yiŵiri panji yinandi yizamuchitira Chikumbusko mu Nyumba ya Ufumu yimoza, ŵalara ŵakwenera kupangana makora nyengo na ndondomeko yakunjilira na kufumira. Ŵakweneraso kudumbiskana za pakwimika vyakwendapo.
Ŵakwenera kusora ŵalinda na awo ŵazamwendeska chingwa na vinyo na kuŵalongosolera umo ŵazamuchitira.
Ŵakwenera kuwoneseska kuti pali chingwa na vinyo, mbale, matambulara, thebulu na salu ya pa thebulu.

Ivyo Ŵapharazgi Ŵakwenera Kunozgekera:

Ŵakwenera kunozgekera kuti ŵachiteko upharazgi wapadera wa kuchemera ŵanthu ku Chikumbusko.
Ŵakwenera kulemba mazina gha awo ŵakusambira nawo Baibolo, ŵabali ŵawo, awo ŵakusambira nawo sukulu, awo ŵakugwira nawo ntchito, na ŵanji mwakuti ŵaŵachemereko.
Ŵakwenera kuŵazga na kughanaghanirapo mavesi agho ghasankhika kuti ghaŵazgike panyengo ya Chikumbusko.
Ŵakwenera kwiza mwaluŵiro ku Chikumbusko kuti ŵapokelere ŵalendo.